Esekiel 33 - Khoekhoegowab New Translation 2020 (KKG20)

ǃKhūb ge Esekiela ǃkhē-aose ra ǁgaumâi

1 ǃKhūb di mîs ge tita ǃoa ge hā: 2 “Khoenôa ǀgôatse, sa khoen ǀkha ǃhoa î ǁîna mîba, toroba ta ga ǃhūb ǃnâ hā-ū tsîn ga ǃhūb di khoena ǀgui khoeba ǁîn ǃnâ ǁhûi tsî ǁîn di ǃkhē-aose ǁgaumâi, 3 tsîb ga torob ra ǃhūb ǃnâ hāsa mû tsî xâiǁnâsa xâi tsî khoena ǃkhâikhom, 4 tsî i ga khoe-e xâiǁnâs ǀōba ǁnâu tsî xawe ǁae tama i tsîb ga toroba hā tsî ǁî-e ǃgam, ob ge ǁî-i ǀaoba ǁî-i danas ai hâ. 5 ǁÎ-i ge xâiǁnâs ǀōba ǁnâu tsî xawe ǃkhâikhom kaisen tama go i, ǁî-i ǀaob ge ǁî-i ǂû-i ai hâ. ǃKhâikhomsa i ga ūǃoa hâ, o i ge ûib â-e ga sâubasen hâ. 6 Xawe ǃkhē-aob ga toroba mûǃgoaxa tsî xawe xâiǁnâsa xâi tama i, khoenab nî ǃkhâikhomse, tsîb ga toroba hā tsî ǁîn di ǀgui-e ǃgam, o ta ge ǁî-i ǀaoba ǃkhē-aob ai nî ôa.

7 “Satsa khoenôa ǀgôatse, tita ge satsa Israels ommi din ǂama ǃkhē-aose ge mâi. Tita xuts ga mîsa ǁnâu ǁaeb hoabats ǁîna ti ǃkhâikhomsa nî māse. 8 Eloxoresa khoe-e ǃoa ta ga, sa eloxoresatse, amasets ge nî ǁō, ti a mî, tsîts ga ǁî-e ǃkhâikhom tama i, ǁî-i daoba xu i nî ūdabasense, o i ge eloxoresa-e ǁî-i ǂhanuoǃnâsiba xu nî ǁō, xawe ta ge ǁî-i ǀaoba satsa xu nî ǂgaoǀkhā. 9 Xawe eloxoresa-ets ga ǃkhâikhom ǁî-i daoba xu i nî ūdabasense tsî i ga ūdabasen tama i, o i ge ǁî-i ǂhanuoǃnâsiba xu nî ǁō, xawe sats ge sa ûiba nî sâu.”

ǃEreamxase ûis

10 ǃKhūb ge tita ǃoa ge mî: “Khoenôa ǀgôatse, Israels ommi dina mîba, nēti du ge ra mî: ‘Sida ǃûǂamdi tsî sida ǁoren tsîn ge sida ai hâ, tsî da ge ǁîn xa ra toa. Mâti da kha ǁnâi nî ûi?’ 11 ǁÎna mîba, tita a ûitsama ǃkhais ao tib ge ǃKhūb Eloba ra mî, tita ge eloxoresa-i di ǁōb ǃnâ ǃgâiǃgâibasen-e ūhâ tama hâ, xawe eloxoresa-i nî ǃhobasen tsî nî ûi ǃkhais ǃnâ. ǃHobasen a ǃhobasen du re sadu ǂkhaba daoga xu. Tarexa du kha ǁnâi ra ǁō ǂgao, sadu Israels ommi dido?

12 “Tsî satsa khoenôa ǀgôatse, sa ǁaesa mîba re. ǂHanu-ai-i di ǂhanu-aisib ge ǁî-e ǃûǂams â-i di tsēs ai ǃnora kai tide. Tsî eloxoresasib eloxoresa-i dib ge ǁî-e ǃnôa kai tide, ǁî-i eloxoresasiba xu i ga ǃhobaseno. Tsî ǂhanu-ai-i ge ǁî-i ǂhanu-aisiba xu ûi ǁkhā tide, ǁî-i ǁoreb di tsēs. 13 ǂHanu-ai-e ta ga ǁî-i ge amase nî ûi ti mîba tsî i ga ǁî-i ǂhanu-aisib ai ǂgomaiǂnûi tsî ǂkhabadīo, ob ge ǁî-i di ǂhanu-aisib hoaragaba ǂâihes tsîna hî tide, xaweb ge dīb go ǂkhawadīb ǃnâ nî ǁō. 14 Tsî eloxoresa-e ta ga sats ge amase nî ǁō ti mîba, xawe i ga ǁî-i ǁoreba xu ǃhobasen tsî ǂhanub tsî ǂhanu-aisiba dī, 15 ǁî-i ga mâiǁkhaes â-e mā-oa, ǁkhâuǁnâ-i gena madaba, tsî ûib di ǂnûiǂgādi ǃnâ ǃgû, ǂhanuoǃnâsi-eb dī tidese, o i ge amase nî ûi tsî ǁō tide. 16 Dī i ge ǁoren hoana i ge ǃgôabahe tide. ǁÎ-i ge ǂhanub tsî ǂhanu-aisiba ge dī; ǁî-i ge amase nî ûi.

17 “Xawen ge sa khoena ‘ǃKhūb di daob ge ǂhanu tama hâ’ ti ra mî, ǁîn di daob ǂhunub ǂhanu tama hîa. 18 ǂHanu-ai-i ga ǂhanu-aisib â-e xu ūdabasen tsî ǂkhabadī, o-i ge ǁîb ǃaroma nî ǁō. 19 Tsî eloxoresa-i ga eloxoresasib â-e xu ǃhobasen tsî ǂhanub tsî ǂhanu-aisiba dī, o i ge ǁnās ǃaroma nî ûi. 20 Xawe du ge sadu Israels ommi dido, ‘ǃKhūb di daob ge ǂhanu tama hâ’ ti ra mî. Tita ge sado sadu dīga ǃoa nî ǀgoraǃgâ.”

Jerusalems di ǁnās

21 Disiǀgamǀaǁî kurib sida ǃkhōsis dib di disiǁî ǁkhâb di koroǁî tsēs aib ge ǀguib Jerusalemsa xu ge ûiǂoaba, ǃās ge ǁnā ǃkhaisa hā ge mîba te. 22 Tsî ǁnā ǃuia, ûiǂoa geb nî hās aiǃâb ge ǃKhūb di ǃomma tita ai ge hâ i. ǁÎb ge ti amsa ge khowaba te, nē khoeb ǁgoaga tita ǃoa nî hās aiǃâ. ǁNātis ge ti amsa ge khowahe tsî ta ge ǃaruǀî ge ǃgome tama hâ i.

ǁAes di ǁoren

23 ǃKhūb di mîs ge tita ǃoa ge hā: 24 “Khoenôa ǀgôatse, hîkākāsa ǃkhaidi Israeli didi ǃnâ ǁan hâ khoen ge ra mî: ‘Abrahammi ge ǀgui khoes ǀguisa ge ī i, xaweb ge ǃhūba ūhâxūse ge hōbasen. Sida ge a ǂgui tsî da ge ǃhūba ūhâ da nîse ge māhe.’

25 “ǁNā-amaga ǁîna mîba nētib ge ǃKhūb Eloba ra mî: Sadu ge ǁgan-e ǀaob hâǃnâse ra ǂû. Sadu ge ǁgôa-eloga ra ǀgoreǀî. Sadu ge ra ǀaoǂnâxū. Tsî du kha ǃhūba ūhâxūse ra ǂhâba? 26 Sadu gôab ai du ge ra ǂgomaiǂnûi; ui-uisa xūna du ge ra dī; mâb hoab ge naub di taras ǀkha ra ǁgoe. Tsî du kha ǃhūba ūhâxūse ra ǂhâba?

27 “ǁÎna mîba nētib ge ǃKhūb Eloba ra mî: Tita ûi hâ ǃkhais aon ge ǁnān, hîkākāsa ǃkhaidi ǃnâ ǁan hâna amase nî ǃgamhe. ǁNān hîa ǃaub ǃnâ ǂgāgu ai ǁan hân ge ǀgurun xa nî hapuhe. ǁNān hîa ǁkhui-omgu tsî ǁhoagu ǃnâ hân ge ǂhīǁōb xa nî ǁō. 28 Tsî ǃhūba ta ge ǃū-aisa tsî hîkākāsa ǃkhaise nî dī, tsîb ge ǁîb di ǀgaib, ǁîb aib ge ǂnīsa iba nî ǀam. Israeli di ǃhomgu ge nî ǃū-aisa, tsî i ge khoe-i xare-e ǁîgu ǃnâ-u ǃkharu tide. 29 ǃHūba ta ga ǃū-aisa tsî hîkākāsase xūse dī, ǁîn gere dī ui-uisa xūn ǃaroma, on ge tita a ǃKhū ǃkhaisa nî ǂan.

Kēbo-aob ǂhôas di ǃnurib

30 “Satsa khoenôa ǀgôatse, sa ǁaes di khoen ge ǂnubiǂgoagu tawa tsî omdi dao-amdi ǃnâ sats xa ra ǃhoa; mâ-i hoa-i ge nau-e ǃoa ra mî: ‘Hā, î da mâ mîs go ǃKhūba xu a hā ǃkhaisa sī ǁnâu.’ 31 Tsîn ge ǂnubis ase sats tawa hā tsî sats aiǃâ ti ǁaes ase hā ra ǂnû, tsîn ge sa mîde ra ǁnâu, xawen ge ǁîde dī tama hâ. ǀNammi mîdi ge ǁîn amǁgaugu ai hâ, xawe ǁîn ǂgaogu ge xūǃgunuxasiba ra sauruǃgon. 32 Tsî mû, sats ge ǁîna ǀnammi tsanasa ra ǁnaeb, ǃgâi ǁnaedomma ūhâb tsî ǃgâise ǀkhō ǁkhāb khami ǀgui iba. ǁNā-amagan ge sa mîden ra ǁnâu, xawe ǁîde dī tama hâ. 33 Xawe sats ra mîn ga hāo, amasen ge nî hā, on ge kēbo-ao-i ge ǁîn ǁaegu hâ i ǃkhaisa nî ǂan.”