Egipteb gao-aob ge krokodili ǀkha ra ǀgopeǀnōhe
1 Disiǀgamǀaǁî kurib di disiǀgamǀaǁî ǁkhâb di ǂguro tsēs ais ge ǃKhūb di mîsa tita ǃoa ge hā. 2 “Khoenôa ǀgôatse, Egipteb gao-aob Faraob ǂama ǃgae, î ǁîba mîba: Sats ge xammi khami ǃhaodi ǃnâ ra tanisen, xawets ge ǁgam-i ǃnâ hâ krokodili khami i. Sats ge ǃāgu âts ǃnâ ge tsâǃganu tsî ǁgamga sa ǂaigu ǀkha ǂgomaǂgoma tsî ǁîn ǃāga ge ǀuriǀuri. 3 Nētib ge ǃKhūb Eloba ra mî: Ti ǀûisa ta ge ǂgui ǁaedi ǀkha sats ai nî aoǂui, tsî ta ge ǁîs ǀkha nî ǂgaeǂui tsi. 4 Tsî ta ge ǃhūb ai nî aoǁgui tsi tsî ta ge hoaraga ǀhomanina sats ai nî ǀhao kai tsîn ge ǃhūbaib di ǀgurun hoana satsa nî ǂû. 5 Tita ge sa ǁgan-e ǃhomgu ai nî aoxū tsî ǃgoaǃnāga sa soros ǀkha nî ǀoaǀoa. 6 Tita ge ǃhūba ǃhomgu kōse sa ǀaob ǀkha nî ǀâǀâǃganu tsî gu ge ǃāroga sats xa nî ǀoa. 7 Satsa ta ga hîkākā, o ta ge ǀhomma nî ǃgū-ai tsî ǀgamirode nî ǃkhaeǃkhae. Soresa ta ge ǃâudi ǀkha nî ǃgū-ai tsî ǁkhâb ge ǃnâ-e mā tide. 8 ǀHomaib ai hâ ǃnân hoana ta ge sa ǂamai nî ǃkhaeǃkhae tsî ǃkhaenaba sa ǃhūb ai nî hā kai,”
tib ge ǃKhūb Eloba ra mî.9 “Tita ge ǂgui ǁaede nî ǂâiǂhansen kai, sa hîkākāhesa ta ga ǃhaodi ǃnâ ǀūts ge i ǃhūgu ǃnâ ǂanǂano. 10 ǂGui ǁaedi ge sats ǂama nî burugâ tsî gao-aogu ge nî ǃhurigâ, ti gôaba ta ga ǁîn ais ai sabuo. ǁÎn hoan ge ǀkhū tsî ǁîn ûiba nî ǃaoba, sa ǁnās di tsēs ai.”
11 Nētib ge ǃKhūb Eloba Egipteb gao-aob ǃoa ra mî: “Babilons gao-aob di gôab ge nî hāǂam tsi. 12 Tita ge nî dī, îs sa ǂnubisa ǀgaisagu di gôab ǃnâ ǁnā, ǁîn hoana kaise ǁkhō ǂkhabadī-aon ǃomǁae. ǁÎn ge Egipteb di ǂnīsasiba nî hîkākā tsî ǁîb di ǁaes hoasa nî hîǀhuru. 13 Tita ge sa goman hoana ǁgammi amǃgâ nî hîkākā tsî i ge khoe-i kas, goma-i kas hoasa ǁkhāba ǁîba dāǃnâ tide. 14 Tita ge ǁîn di ǁgamga nî ǃnomsa kai tsî gu ge ǁîn di ǃāga oli-i khami nî dâu,”
tib ge ǃKhūb Eloba ra mî.15 “Egipteba ta ga ǃū-aisa kai tsî ǁîb ǃnâ hân hoana hîkākā, on ge tita a ǃKhū ǃkhaisa nî ǂan. 16 Nē ǃgae-ams ge nî ǁnaehe; ǃhaodi di khoedi ge ǁîsa nî ǁnae, Egipteb tsî ǁîb di ǁaes ǂama,”
tib ge ǃKhūb Eloba ra mî.ǁŌhân Hâǃkhaib
17 Disiǀgamǀaǁî kurib di ǂguro ǁkhâb di disikoroǀaǁî tsēs ais ge ǃKhūb di mîsa tita ǃoa ge hā. 18 Khoenôa ǀgôatse, Egipteb di ǁaesa āba, î ǁîna ǀgaisa ǃhaodi din ǀkha ǁŌhân Hâǃkhaib ǃoa sîǁgôa, ǁnān ǃhūbaib di ǃgamsib ǃnâ hân ǁga.
19 “Tari-i xats ǃnāǂamsase îsa?
ǁŌhân Hâǃkhaib ǃoa ǁgôa,
îts ǁnāpa ǃgaohesa taman ǀkha ǀguipa ǁgoe.
20 “Egipteǁîn ge gôab ǀkha ǃgamhe hân ǀkha ǀhûpe nî ǁnā, gôab ge ǁîn hoana nî ǃgamse ǂhomitoasa. 21 ǀGaisa ǁē-aogu ge ǁîb tsî ǁîb di hui-aogu tsîna ǁŌhân Hâǃkhaiba xu nî gowaǀî: ‘ǁÎn ge ge ǁgôaxa tsîn ge nēpa ǁgoe, ǁnān gôab xa ge ǃgamhen ǀkha.’
22 “Asiriab ge ǁnāpa hâ tsî ǁîb toroǃkhamaogu di ǀhobade ǁîb ǂnamipe. ǁÎgu hoagu ge ge ǁō, ǁîgu ge gôab ǀkha ge ǃgamhe. 23 ǁÎgu di ǀhobadi ge āb di ǃgam ǃkhaidi ǃnâ hâ tsî ǁîs di ǂnubis ge ǁîs ǀhobas ǂnamipe hâ. ǁÎgu hoagu ge gôab ǃnâ ge ǁnā, ǁîgu hîa ǃaorosasiba ûitsaman di ǃhūb ǃnâ gere aiǃgû kaiga.
24 “Elammi ge ǁnāpa hâ tsî ǁîb toroǃkhamaogu di ǀhobade ǁîb ǂnamipe. ǁÎgu hoagu ge ge ǁō, ǁîgu ge gôab ǀkha ge ǃgamhe. ǁÎgu ge ǃgaosa tama gu hâse ǃgamsib ǃhūbaib dib ǃnâ ge ǁgôa, ǁîgu hîa ǃaorosasiba ûitsaman di ǃhūb ǃnâ gere aiǃgû kaiga. ǁÎgu ge ǁîgu taosiba ǁnān āb ǃnâ ge ǁgôan ǀkha ra tani. 25 ǁÎban ge ǃgamhe hân ǂguin ǁaegu ǁgoeǃkhai-e ge dība, ǁîn di ǀhobade ǁîb ǂnamipe. ǁÎn hoan ge ǃgaohesa taman, gôab ǀkha ge ǃgamhena. ǁÎn di ǂkhawadīb ge hoaraga ǃhūb ûitsaman dib ǃnâ ge ǂapaǂoa, xawe nēsin ge āb ǃnâ ge ǁgôan ǀkha taosib âna ra tani. ǁÎn ge ǃgamhe gen ǀkha ǀguipa ǁgoe.
26 “Mesexi tsî Tubali tsîkha ge ǁnāpa hâ tsî ǁîkha toroǃkhamaogu di ǀhobade ǁîkha ǂnamipe. ǁÎgu hoagu ge ge ǁō, ǁîgu ge gôab ǀkha ge ǃgamhe. ǁÎgu ge ǃgaosa tama gu hâse gôab ǀkha ge ǃgamhe, ǁîgu hîa ǃaorosasiba ûitsaman di ǃhūb ǃnâ gere aiǃgû kaiga. 27 ǁÎgu ge ǃgaosa tamase ge ǁō ǃgari-aogu, ǁâtanin âgu ǀkha ge ǁŌhân Hâǃkhaib ǃoa ǁgôagu ǀkha ǀguipa ǁgoe tama hâ. ǁNā ǃgari-aogu gôagu âgu ge danadi âgu ǃnaka ǁguihega tsî ǁkhaukhōde ǁîgu ǂkhōgu ai, ǃaorosasiba gu ge ûitsaman di ǃhūb ǃnâ gere aiǃgû kai amaga.
28 “ǁNātits ge sats Egiptets tsîna khôaǂkhūhe tsî ǃgaosa taman ǁaegu nî ǁgoe, ǁnān gôab ǀkha ge ǃgamhen ǀkha.
29 “Edommi ǁnāpa hâ ǁîb gao-aogu tsî gaoǀgôagu ǀkha. ǁÎgu hoagu ge kaise gu ge ǀgaisa i xawe gôab ǀkha ge ǃgamhen ǀkha ǀguipa ǁgoe. ǁÎgu ge ǃgaosa tama gu ǀkha āb ǃnâ ge ǁgôa.
30 “ǀApasǀkhāb di gaoǀgôagu hoagu tsî hoaraga Sidonǁîgu tsîgu ge ǁnāpa hâ. ǁÎgu hoagu ge taosib ǃnâ ǃgamhe ge gu ǀkha ge ǁgôa, ǁîgu ǀgaib ǀkha gu ge ǃaroma ǃaorosasib ǃaroma. ǁÎgu ge ǃgaosa tamase gôab ǀkha ge ǃgamhe gu ǀkha ǀguipa ǁgoe. ǁÎgu ge āb ǃnâ ge ǁgôagu ǀkha ǁîgu taosiba ra tani.
31 “Faraob ge ǁîna mû tsî hoaraga ǂnubis âb ǂama nî ǁkhaeǂgaosen, Faraob tsî ǁîb di ǂnubis, gôab ǀkha ge ǃgamhes ǂama,
tib ge ǃKhūb Eloba ra mî.32 “ǁÎb ge ǃaorosasiba ûitsaman di ǃhūb ǃnâ ge ǂapaǂoa kai, ǁnā-amagab ge ǃgaosa tama gu ǀkha ǀguipa nî ǁguihe; ǁnāgu gôab ǀkha ge ǃgamhe gu, Faraob tsî ǁîb ǂnubis digu ǀkha,”
tib ge ǃKhūb Eloba ra mî.© Khoekhoegowab Elobmîs © Bible Society in Namibia, 2020.
