1 Elob ge tita ǃoa ge mî: “Khoenôa ǀgôatse, nē ta ra mā tsi-e ǂû; nē ǂkhanisa ǂû, îts ǃgû tsî Israeli omma sī ǃhoaǀî.” 2 O ta ge ti amsa ge ǁkhowa-am tsîb ge ǂkhanisa ǂû tanise ge mā te. 3 ǁÎb ge tita ǃoa ge mî: “Khoenôa ǀgôatse, nē ta ra mā tsi ǂkhanisa ǂû, îts sa ǃnāba ǁîs ǀkha ǀoaǀoa.” O ta ge ǁîsa ge ǂû tsîs ge ǁîsa ti amǃnâs ǃnâ dani-i khami ge ǂkhon i.
4 Ob ge Eloba tita ǃoa ge mî: “Khoenôa ǀgôatse, Israeli ommi ǃoa ǃgû, î ti ǂhunuma mîde ǁîna mîba. 5 Sats ge ǃhao ǃhoaǀgaub tsî ǃgom gowaba ūhâ khoen ǁga sîhe tama hâ, xawe Israeli khoen ǁga. 6 ǂGui khoen ǃhao ǃhoaǀgaugu tsî ǃgom gowaga ūhân ǁgas ose, mîdi ânats ǁnâuǃā tidena. Amase, ǁîn ǁga ta ga sî tsi, on ge ǁîna nî ǃgâ tsi. 7 Xawe Israeli khoen ge ǃgâ tsi tide, ǁîn ǃgâ tsi ǂgao tama xui-ao. Hoaraga Israeli khoen a ǃnâudanaxa tsî karosaǂgao amaga. 8 Mû, tita ge ǁîn aidi ǃoa-ai karosa aisa nî dība tsi, tsî ǁîn ǃūdi ǃoa-ai sa ǃūsa nî ǃgariǃgari. 9 Sa ǃūsa ta ge diamantǀuis khami nî dī, ǃgareǀuib ǃgâ-ai karosase; ǁîna tā ǃao tamas ka io tā ǃhuri ǁîn ra mûsen ǀgaub xa, ǁîn a khâikhâisenxa ǁae xuige.”
10 ǃAruǀîb ge Eloba tita ǃoa ge mî: “Khoenôa ǀgôatse, ti mîdi tita ga satsa mîbadi hoade, sa ǂgaob ǃnâ ū, îts sa ǂgaera ǀkha ǃgâ. 11 ǃKhōsaben ǁga ǃgû, sa khoen ǁga, î ǁîna mîba: ‘Nētib ge ǃKhūb Eloba ra mî’: Nēsin ga ǃgâs, ǃgâ taman ga is hoasa.”
12 Ob ge gagaba ge ūkhâi te tsî ta ge ǃKhūb di ǂkhaisib ra ǁîb ǃkhaisa xu khâimâ khami ti ǃgâb ai ǃgari dommi kai ǂkhupiba ūhâba ge ǁnâu. 13 Nēb ge ûitsama kurusabegu ǁgabogu hîa gere tsâǀkhāgu gu di ǀō ge iba, tsî ǀnūdi di ǀōba ǁîgu xōǀkhā, kai ǃhūǂgubib khami gere ǀōba. 14 Gagab ge ūkhâi te tsî ge tanibē te; tsûaǂgao hâse ta ge ǁaixa hâ gagas ǀkha ge ǃgû, ǃKhūb ǃommi tita ai ǀgaisase hâ hîa. 15 Tel-Abibs tawa hâ ǃkhōsaben, Kebarǃāb tawa ge ǁan hâ in tawa ta ge ge sī. Tsî ta ge burugâ hâse ǁîn ǁaegu hû tsēde ge hâ.
ǃKhūb ge Esekiela ǃkhē-aose ra ǁgaumâi
(Esekiel 33:1-9)16 Hû tsēdi khaoǃgâs ge ǃKhūb di mîsa tita ǃoa ge hā: 17 “Khoenôa ǀgôatse, tita ge ǃkhē-aose Israeli khoen ǂama ge ǁgaumâi tsi. Ti mîsats ga ǁnâu ǁaeb hoabats ge ǁîna tita xu hâ ǃkhâikhomsa nî mā. 18 ǂKhabadī-aon ǃoa ta ga mî: ‘Amase du ge nî ǁō,’ ti, tsîts ga ǁîna ǃkhâikhom tama i tamas ka io ǂkhabadī-aona ǁîn ǂkhaba daoga xu ǃkhâikhom tama i, ǁîn ûiba sâus ǃaroma, on ge ǁnāti ī ǂkhabadī-aona nî ǁō, ǁîn tsūdīn ǃaroma; xawe ǁîn di ǀaob ge sats ai nî ôahe. 19 ǂKhaba khoebats ga ǃkhâikhom tsîb ga ǁoreǀû tama i, ob ge ǁîba nî ǁō, noxopab a ǁore-aose, xawe sa ûib ge nî sâuhe.
20 “ǁKhātin ga ǂhanu-aina ǁîn ǂhanu-aisiba xu dabasen tsî tsūdī, tsî ta ga tita ǁîn aiǃâ ǃnôa-aiǃnao-e ǁgui, on ge ǁîna nî ǁō. ǁÎnats ge ǃkhâikhom tama hâ i xui-aon ge ǁîna, ǁîn ǁoren ǃaroma nî ǁō tsî ǁîn ǂhanu-ai dīgu ge ǂâihōhe tide; xawe ta ge ǁîn ǀaoba sats ai nî ôa. 21 Xawets ga ǂhanu-aina ǁoren tidese ǃkhâikhom, tsîn ga ǁore tama i, on ge ǁîna amase nî ûi, ǃkhâikhomsan go ǁnâu-am xui-ao; tsîts ge sa ûiba nî sâu.”
Esekieli ge ǃhoa ǁkhā tide
22 Ob ge ǁnāpa ǃKhūb ǃomma tita ai ge hâ i; tsîb ge tita ǃoa ge mî: “Khâimâ, ǃgoaǃnāb ǁga ǃgû, ǁnāpa ta ge tita sats ǀkha nî ǃhoa.”
23 O ta ge khâimâ tsî ǃgoaǃnāb ǁga ge ǃgû; tsîb ge ǃKhūb di ǂkhaisiba ǁnāpa ge mâ i, ǁnā ǂkhaisib Kebarǃāb tawa ta ge mû hâ ib khami; o ta ge ti ais ai ge ǁnāǁgoe. 24 Gagab ge tita ǃnâ ge ǂgâ tsî ti ǂaira ai ge mâi te; tsîb ge ǃKhūba tita ǃoa ge mî: “ǃGû, î sa oms ǃnâ sī ǂganamǂgāsen. 25 Sats xasa, khoenôa ǀgôatse, sats ai gu ge tsuriga nî ǁguihe tsîts ge ǁîgu ǀkha nî ǃgaeǃnonhe, khoen ǁaeguba ǃoats ǂoa tidese. 26 Tsî tita ge sa namsa sa ǂkharub ai nî ǂae kai, ǃhoats tide tsîts ǁîna ǂgai-oa tidese. ǁÎn a khâikhâisenxa ǁae xui-ao. 27 Xawe tita ga sats ǀkha ǃhoa, o ta ge sa amsa nî ǁkhowa-am tsîts ge ǁîn ǃoa nî mî: ‘Nētib ge ǃKhūb Eloba ra mî:’ An ǃgâ ǂgao rana ǃgâ tsî ǂgao tama ga ina ǂkhā; ǁîn a khâikhâisenxa ǁae xuige.”
© Khoekhoegowab Elobmîs © Bible Society in Namibia, 2020.
