Egipteb ǃoagu hâ kēbos
1 Disiǁî kurib ǃnâ, disiǁî ǁkhâb di disiǀgamǀaǁî tsēs ais ge ǃKhūb di mîsa tita ǃoa ge hā: 2 “Khoenôa ǀgôatse, sa aisa Egipteb gao-aob, Faraob ai ǃammâi, î ǁîb tsî hoaraga Egipteb tsîn ǃoagu kēbo 3 tsî mî: Nētib ge ǃKhūb Eloba ra mî: Tita ge sats ǃoagu hâ, Farao, Egipteb di gao-aotse, sats kai draki ase ǃāgu ǁaegu ǁgoe tsî ra mîtsa: Ti Nylǃāb ge a ti, tita ge ǁîba, tita ǃaroma ge kuru.”
4 Tita ge ǂhaoǀuriga sa ǃnanikha ǃnâ nî ǃkhāǃkharu tsî ǁaun sa ǃāgu dina sa ǂhapirogu ai nî ǂae kai. Tita ge ǃārogu âtsa xu nî ǂgaekhâi, sa ǃārogu hoaraga ǁaun ǂhapirogu â tsi ǂaemâse. 5 Tita ge sats tsî sa ǃārogu di ǁaun sa ǂhapirogu ai ǂaemân hoan ǀkha ǃgaroǃhūb ǃnâ nî ǁnāxū du. Sats ge ǃaub di ǂgās ǃnâ nî ǁnā tsî ǀhaoǀhaohe tsî ǁkhōhe tide. Tita ge ǂû-i ase ǃhūbaib di xamarin tsî ǀhomaniron tsîna ge mā tsi. 6 On ge hoaraga ǁanǂgāsaben Egipteb dina tita a ǃKhū ǃkhaisa nî ǂan.
“Israeli omma du ge ǂāb khami ība i xui-ao. 7 ǃOmmi ǀkha du ga tsubuhe, o du ge ra khôa tsî ǁîn hoaraga ǃhōdi ge ra tsoba. Tsîn ga sa ai ǃgâsen, ots ge ra khôa tsî ǀnūgu ân hoana ra ǂkhabu kai. 8 ǁNā-amagab ge ǃKhūb Eloba nēti ra mî: Tita ge gôaba sats ǂama nî hā kai tsî satsa xu khoen tsî xamarin tsîna nî ǃgaoǁnâ. 9 Egipteb ge nî ǃū-aisa tsî ǃgaroǃhū kai. On ge tita a ǃKhū ǃkhaisa nî ǂan. Sats ge mî xui-ao: ‘Nylǃāb ge a ti, tita ge ǁîba ge kuru’, ti. 10 ǁNā-amaga ta ge tita sats tsî sa ǃārogu tsîn ǃoagu hâ, tsî tita ge Egipteba ǃgaroǃhūse tsî ǃū-aisase nî dī, Migdolsa xu Sienes kōse, tsî Etiopiab di ǃhūǀgoras kōse. 11 Khoe-i xare-i ge ǁnāpa-u ǃkharu tide tsî xamari-i xare-i tsîn ge ǁnāpa-u ǃkharu ǁkhā tide. ǁÎb ge hakadisi kuriga ǁanaihe ǁkhā tide. 12 Tita ge Egipteba ǃū-aisa ǃhūgu ǁaegu nî ǃū-aisa kai. ǁÎb di ǃādi ge hakadisi kuriga ǃgaroǃhūb ǃnâ ǁgoe ǃādi ǀkha nî ǃū-aisa kai. Tita ge Egipteǁîna ǁaedi ǃnâ nî ǀgaruǀgaru tsî ǃhūgu ǁaegu nî ǀgoraǃā.”
13 ǃAruǀîb ge ǃKhūb Eloba nēti ra mî: “Tita ge hakadisi kurigu di ǀams ai Egipteǁîna ǀgaruǀgaruǃnâhen ge hâ i khoen di ǁaeguba xu nî ǀhaoǀhao. 14 Tita ge Egipteǁîna ǃkhōsis âna xu nî ǃnoraǃnora tsî ǁîna Patrosǃhūb ǁga nî oahā-ū, ǃhūb ǁîn ǃnaes diba. ǁNāpan ge ǁîna xū-e ǃoaǂui tama gaosis ase nî hâ. 15 ǁÎb ge nau gaosigu hoagu xa nî ǂkhabusa tsî ǁkhawa ǁî-aitsama ǁaedi ǂama ǀgapiǀgapisen tide. Tita ge ǁîna kaise nî ǂkhariǂkhari, în tātsēs tsîna tā ǁkhawa ǁaedi ǂama gaosîsen. 16 Egipteǁîn ge tātsēs tsîna ǁkhawa Israeli ommi di ǂgomǃgâse hâ tide. ǁÎn ge ǁîn ǁoren xa nî ǂâi-oa, ǁîn ǃoan ga huib ǃaroma dabaseno. On ge ǁîna tita a ǃKhū Elo ǃkhaisa nî ǂan.”
Gao-aob Nebukadnesari ge Egipteba ra dan
17 ǀGamdisihûǀaǁî kurib ǃnâ, ǂguro ǁkhâb di ǂguro tsēs ais ge ǃKhūb di mîsa tita ǃoa ge hā: 18 “Khoenôa ǀgôatse, Babilons gao-aob, Nebukadnesari ge ǁîb toroǂnubisa ǀkhoase Tires ǃoagu ge sîsen kai. Mâ danas hoas ge ge ǃgora tsî mâ ǃhōs hoas ge ge tsuruǁnâhe. Xawe ǁîb tamas ka io ǁîb toroǂnubis ge Tiresa xu sîsenni ǃaroma matare-i xare-e hō tama ge i. 19 ǁNā-amagab ge ǃKhūb Eloba nēti ra mî: ‘Tita ge Egipteba Babilons di gao-aob Nebukadnesari ai nî mā. ǁÎb ge ǁîs ǃkhūsiba tanibē, ǃnari tsî nî ǁgūǀhana; nēn ǀkhab ge ǁîb toroǂnubisa nî matare. 20 Tita ge ǁîba Egipteba dīb ge sîsenni di matares ase ge mā, ǁîgu ge tita sîsenba xui-ao,’
tib ge ǃKhūb Eloba ra mî.21 “ǁNā tsēs ai ta ge Israeli omma nî ǀgaiǀgai tsî sa amǁgaukha ǁîn ǁaegub ǃnâ nî ǁkhowa-am. On ge ǁîna tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
