1 mî ra-e: “Khoenôa ǀgôatse, khâimâ, sa ǂaira ai mâ, î ta sats ǀkha ǃhoa.” 2 ǁÎb tita ǀkha ra ǃhoa hîa i ge gaga-e tita ǃnâ ge ǂgâ tsî ti ǂaira ai ge mâi te; tsî ta ge tita ǀkha ra ǃhoaba ge ǁnâu. 3 ǁÎb ge tita ǃoa ge mî: “Khoenôa ǀgôatse, Israeli khoen ǃoa ta ge ra sî tsi, khâikhâisenxa khoen ti ǃoagu ge khâikhâisenn ǃoa. ǁÎn tsî ǁîn aboxan tsîn ge nētsēs kōse tita ǃoagu ge ǃûǂam. 4 ǁÎn surib ge mâǃoaxa tsî a ǃnâudanaxa. Tita ge ǁîn ǃoa ra sî tsi, tsîts ge ǁîna nî mîba: ‘Nētib ge ǃKhūb Eloba ra mî.’ 5 Nēsin ga ǃgâ tamas ka io ǃgâ ǂgao tama is hoasa, ǁîn a khâikhâisenxa ǁae xui-ao. ǁÎn ge nî ǂan kēbo-ao-i ǁîn ǁaegu hâ ǃkhaisa.
6 “Xawe satsa khoenôa ǀgôatse, tā ǁîn xa ǃao, î tā ǁîn mîde ǃao, ǀkhininin tsî ǁkhūn tsîn ga xāǂgā tsi tsîts ga ǁaruben ǁaegus tsîna hâ xawe; tā ǁîn mîde ǃao tsî tā ǁîn xa ǃhuri, ǁîn a khâikhâisenxa ǁae xuige. 7 Ti mîdets ge ǁîna nî mîba, nēsin ga ǃgâ tamas ka io ǃgâ ǂgao tama i xawe. ǁÎn a khâikhâisenxa ǁae xui-ao.
8 “Xawe satsa khoenôa ǀgôatse, tita ra mîba tsîna ǃgâ. Tā ǁnā khâikhâisenxa ǁaes khami khâikhâisen. Sa amsa ǁkhowa-am, îts mā tsi ta ra-e ǂû.” 9 Kō ta ge, o ta ge tita ǃoa ǀhōǂuihe hâ ǃomma ge mû, ǁîb ǃnâ i ge xoa-aisa ǂkhani-e ge ūhâ i. 10 ǁÎb ge ǁî-e ti aiǃâ ge khora tsî i ge ǁî-e hoaǀkhākha ai ge ge xoa-aisa i; ǁî-i ain ge ǃgae-amdi, ǀhaimâinǀomdi tsî tsûgu tsîna ge xoasa i.
© Khoekhoegowab Elobmîs © Bible Society in Namibia, 2020.
