ǃOab di ǁnaetsanas
1 ǃKhūb ge ǃoab di ǁnaetsanasa ta Israeli di gao-aokha nî ǁnaeba ǃkhaisa ge mîba te:
2 Tareǃnôa xamsa sa îsa xamn ǁaegu!
ǁÎs ge ǂkham xamn ǁaegu ǁgoe;
ǁîs ge ôasan âsa ra kaikai.
3 Tsîs ge ǂkhamn âs di ǀguiba ge kaikai,
ǁîb ge ge ǂkham xam kai.
ǁÎb ge amǀnē-e ǃkhōsa ge ǁkhāǁkhāsen,
ǁîb ge khoena gere ǂû.
4 ǁAedi ge ǁîb xa ǁnâu tsî ge ǃkhâikhom;
ǁîn āb ǃnân ge ge ǃkhō bi.
ǁÎn ge khedegu ǀkha ǃgae bi hâse
Egipteb tawa ge sī-ū bi.
5 ǃÂuǁkhuis ge ǃkhaisas ge mû tsî ǃâubasens âsa toa,
os ge naub ǂkhamn âs di ǀguiba ū
tsî ǁîba ǂkham xamse ge dī.
6 ǁÎb ge nau xamn ǁaegu ge kaikhâi;
ǁîb ge ge ǂkham xam kai.
ǁÎb ge amǀnē-e ǃkhōsa ge ǁkhāǁkhāsen,
ǁîb ge khoena gere ǂû.
7 ǁÎb ge ǁîn ǀgaisa ǂnubiǂgoaga hîkākā
tsî ǁîn ǃāde ge khôaǁnâ.
ǃHūb tsî ǁîb ǃnâ hân hoan ge
ǁîb di ǃgurub xa ge ǃao.
8 O di ge ǁaede hoaraga ǃhūǃâde xu
ǁîba ge ǃnamiǂgā.
ǁÎn ge ǀûis ana ǁîb ai khoraǂui
tsî ǁîn di āb ǃnâ ge ǃkhō bi.
9 ǁÎn ge khedegu ǀkha ǃgaeǃao bi
tsî Babilons gao-aob tawa ge sī-ū bi.
ǁÎn ge ǃkhōsis ǃnâ ge ǂgā bi,
ǁîb dommi ǁkhawa Israelǃhommi tawa ǁnâuhe tidese.
10 Sa îs ge ǁgam-i tawa ǂgāsa
draibeǃhanab khami ī.
ǁÎs ge ǂûtanixa,
ǂâusa ǁgam-es ūhâ xui-ao,
ǁnâugu âs ge ǂnabogu tsî ǂûn xa ǀoa hâ.
11 ǁÎs ge ǀgaisa ǂgonaga ge ūhâ i,
gaosib gaohaise anu hâga.
ǀGom ǂgonan ǁaegus ge mâ ǂgonab hoab ǃgaosa ǀgapise gere mâǂoa,
tsîs ǂgonagu âs di ǂguib ǀkha ǀgapib âs ǃaroma gere mâǂoa.
12 Xawes ge ǁîsa ǁaib ǃnâ ǃhomǂuihe
tsî ǃhūb ai ge aoxūhe.
Aiǂoas ge ǁîs ǂûna ge ǂnâ kai,
tsî ǂgonagu âs ge khôaǁnâhe
tsî ǂnâ tsî ǀaes xa ge khauǃkhūhe.
13 Nēsis ge ǁîsa ǃgaroǃhūb ǃnâ ge ǂgāhe,
ǂnâsa tsî ǁgâsa ǃhūb ǃnâ.
14 Tsî ǀaes ge ǃgaos âsa xu ge ǂoaxa,
tsî ǁîs ǂgonagu tsî ǂûn tsîna ge ǂhubiǂui.
ǁÎs ge ǃaruǀî ǀgaisa ǃgaoǃgao-i xare-e ge ūhâ tama hâ i,
gaosis ǃaroma.
Nēs ge ǃoab ǁnaetsanasa; ǁîs ge ǁkhawa tsî ǁkhawa gere ǁnaehe.
© Khoekhoegowab Elobmîs © Bible Society in Namibia, 2020.
