Kēbo-aoba ǃhūsabeb ase
1 ǃKhūb di mîs ge tita ǃoa ge hā: 2 “Khoenôa ǀgôatse, sats ge khâikhâisenxa ommi din ǁaegu ǁan hâ, mûn nîse mûde ūhâ, xawe mû tamana, ǁnâun nîse ǂgaede ūhâ, xawe ǁnâu tamana, khâikhâisenxa ommi din a xui-ao.
3 “ǁNā-amaga, khoenôa ǀgôatse, ǃkhōsis di ǁgaruba ǂhomibasen, îts tsēa ǁîn di mûǁae ǃkhōsis ǃnâ ǃgû. ǃKhōsis ǃnâ ra ǃgû-i khamits ge sa ǃāsa xu nau ǃās ǃoa ǁîn mûǁae nî ǃgû. ǀNîsin ge nî ǁnâuǃā, khâikhâisenxa ommi din a xawe. 4 Sats ge sa ǁgaruba tsēa ǁîn mûǁae nî tani, ǃkhōsis di ǁgarub ase tsî ūǃgûhe ra ǃkhōsabe-i asets ge ǃuia ǁîn mûǁae ǂoa tsî nî ǃgû. 5 ǁÎn mûǁae ǂnubiǂgoaba khaoǃkhopa, îts ǁnāpa-u ǁgarub âts ǀkha ǂoa. 6 ǁÎn mûǁae ǁgarub âtsa ǃhōs ai tani hâse ǃkhaeb ǃnâ ǂoaxa. Ais âtsa ǃgū-ai, îts tā ǃhūba mû ǁkhā, Israeli ommi din ǃaroma ta ge satsa saose dī xui-ao.”
7 Tita ge mîmāhe ta ge khami ǀgui ge dī. Ti ǁgaruba ta ge ǂgāǃnâsase tsēa tani hâse ge ǂoaxa, ǃkhōsabe-i di ǁgarub ase. ǃUis ǃnâ ta ge ǂnubiǂgoaba ti ǃomkha ǀkha ge khaoǃkhopa. Tita ge ǃkhaeb ǃnâ ti xūna ǃhōs ai tani hâse ǁîn mûǁae ge ǂoaxa.
8 Tsî ǃnauǁgoagas ge ǃKhūb di mîsa tita ǃoa ge hā: 9 “Khoenôa ǀgôatse, Israeli di khâikhâisenxa ommi dina kha ‘Tare-ets ra dī?’ ti mîǀî tsi tama hâ? 10 ǁÎna mîba: ‘Nētib ǃKhūb Eloba ra mî: Nē ǂhôas ge Jerusalems di gaoǀgôab tsî Israeli ommi ǃnâ hân hoan ǃoagu hâ.’ 11 ǁÎna mîba: ‘Tita ge sado buruxa sao-i ase ība, tita ge dī khamin ge ǁîna nî dī-ūhe. ǁÎn ge ǃkhōsis ǃnâ ǃkhōsaben ase nî ūǃgûhe.’ 12 Tsî ǁnā gaoǀgôab, ǁîn ǁaegu hâb ge ǁgarub âba ǃhōs ai ǃkhaeb ǃnâ ǂnûi tsî nî ǂoaxa; ǁîb ge ǂnubiǂgoab ǃnâ-u khaoǃkhopa, tsî ǁnāpa-u nî ǂoa. ǁÎb ge ais âba nî ǃgū-ai, ǁîb mûra ǀkhab ǃhūba mû tidese. 13 Xawe tita ge ti ǀûisa ǁîb ai nî ǁgui tsîb ge ǁîba ǁîs xa nî ǃkhōhe tsî tita ge ǁîba Babilons tawa, Xaldeaǁîn di ǃhūb ǃnâ nî sī-ū, xaweb ge ǁnā ǃhūba mû tide tsî ǁîb ge ǁnāpa nî ǁō. 14 Tsî ǁîb ǂnamipe hân hoan, ǁîb hui-aon tsî ǁîb di ǂnubidi hoadi tsîna ta ge hoa ǂoadi ǃnâ nî ǀgaruǀgaru. Tita ge ǁîna gôab ǀkha nî ǃgôaǃgon.
15 “ǁÎn ge tita a ǃKhū ǃkhaisa nî ǂan, tita ga ǁîna ǁaedi ǃnâ ǀgaruǀgaru tsî ǃhūgu ǃnâ ǂapaǂoa kaio. 16 Xawe ta ge tita ǀnîrona gôab, ǃâtsūǀkhāb tsî ǂhīǁōb tsîna xu nî ǃkhō-oa, în ǁîna ǃgûn ra ǃkhai-i hoa-i tawa ǁaede ǁîn di ui-uisa dīgu xa ǂhôa, on ge tita a ǃKhū ǃkhaisa nî ǂan.”
ǀKhū ra kēbo-aob di saos
17 ǃKhūb di mîs ge tita ǃoa ge hā: 18 “Khoenôa ǀgôatse, sa pereba ǀkhū rase ǂû, î sa ǁgam-e ǀkhūb tsî ǃoab ǀkha ā. 19 ǃHūb di khoen ǃoa mî: ‘Nētib ge ǃKhūb Eloba Jerusalems ǁanǂgāsaben Israeli ǃnâ ǁan hân xa ra mî: ǁÎn ge ǃaob ǀkha pereb âna ǂû tsî ǁîn ǁgam-e ǃaob ǀkha nî ā, ǁîn di ǃhūb ǀoasasib âb hoab ǀkha ǁîb ǃnâ ǁan hân di ǂkhabadīb ǃaroma nî ǀkhaiǀkhaiǃnâhe xui-ao.’ 20 ǁAnǃnâsa ǃādi hoadi ge nî ǃū-aisa tsîb ge ǃhūba nî ǃgaroǃhū kai, tsî du ge tita a ǃKhū ǃkhaisa nî ǂan.”
ǂAnsa ǂkhoamî-i tsî ǂgaohe tama ǂhôas
21 ǃKhūb di mîs ge tita ǃoa ge hā: 22 “Khoenôa ǀgôatse, mâ ǂkhoamî-i Israeli ǃhūb ǃnâ a ǂansa-i hîa ‘Tsēdi ge nî gaxugaxuhe tsî mâ ai-i hoa-i ge nî kā’ ti ra mî-e? 23 ǁNā-amaga ǁîna mîba: ‘Nētib ge ǃKhūb Eloba ra mî: Tita ge nē ǂkhoamîsa nî toa kai, Israeli ǃnân ge ǁîsa ǃaruǀî sîsenū tide.’ Xawe ǁîn ǃoa mî: ‘Tsēdi ge go mâtoa mâ ai-i hoa-i nî dīǀoaǀoahesa.’
24 “ǃAruǀî-i ge ǁkhawa ǂhumi ai-i tamas ka io ǂgaeǂhapuxa kēbo-ai-e Israeli ommi ǃnâ hâ tide. 25 Xawe tita ǃKhūta ge mîs hîa ta ra ǃhoasa nî ǃhoa tsî ǁîs ge nî dīǀoaǀoahe. ǁÎs ge ǃaruǀî mâiǂuihe tide. Xawe sa khâikhâisenxa ommi dido, sadu tsēdi ǃnâ ta ge ti mîsa nî ǃhoa tsî ǁîsa nî dīǀoaǀoa,”
tib ge ǃKhūb Eloba ra mî.26 ǃKhūb di mîs ge tita ǃoa ge hā: 27 “Khoenôa ǀgôatse, Israeli ommi din ge ra mî: ‘ǁÎb ra mû ai-i ge ǃgoaxa ǂgui kurigu ǃaroma hâ tsî ge ǃgoaxa ǁaegu ǃaroma ra kēbo.’ 28 ǁNā-amaga ǁîn ǃoa mî, nētib ge ǃKhūb Eloba ra mî: ‘ǀGuis ti mîdi dis tsîn ge ǃaruǀî mâiǂuihe tide. Tsî mîs hîa ta nî ǃhoas ge nî dīǀoaǀoahe,’ ”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
