ǃKhūb di Tentommi kuruhes
(Eksodus 36:8-38)1 ǃKhūb ge ǃaruǀî ge mî: “Tentommi di ǂganagaba disi ǂgāmâisagu, tsaura lapin ǀkha ǂomsaga xu kuru. Nē ǂgāmâisagu ge ǂhoa, ǂhoaǀapa tsî ǀapa gūǀûn ǀkha hâ xerugu ǀkha nî ǂomanihe. 2 Mâ ǂgāmâisab hoaba ǀguitikōse ǂom, disiǀgamǀa metergu di gaxusib tsî ǀgam meterkha di ǂhabasib tsîna ūhâse. 3 Koro ǂgāmâisaga ǀgui kai ǂgāmâisab ase ǂomǁae, î nau korogu tsîna ǁnāti ǂomǁae. 4 Mâ ǂomǁaesa ǂgāmâisab hoab di ǀamma ǂhoa sarab ǀkha ǃkhāǃkharuhe ǁkhāse ǂomamǃgâ. 5 Korodisi āde mâ ǂgāmâisab hoab di amǃgâb ai kuru, î ǁîkha mâiǃoagu. 6 Korodisi ǃhuniǀuriǃgaeǁare-ūdade kuru, î ǁîdi ǀkha nē ǀgam ǂgāmâisakha ǀgui ǂgāmâisab ase ǀhaoǀhao.
7 “Tentommi nî ǃgū-ai-ūhese disiǀguiǀa ǂgāmâisaga piriǀûn ǀkha kurusa saraba xu ǂom. 8 Mâ ǂgāmâisab hoaba ǀguitikōse ǂom, disiǃnonaǀa metergu di gaxusib tsî ǀgam meterkha di ǂhabasib tsîna. 9 Koro ǂgāmâisaga ǀgui kai ǂgāmâisab ase ǂomǁae tsî nau ǃnanigu tsîna ǁkhawa ǀguiba ǂomǁae. ǃNaniǁî ǂgāmâisaba ǀgamǃnâguse dī, î Tentommi ǂgâ-ams ai ǀgui ǃâba ǁgui. 10 Korodisi āde mâ ǂgāmâisab hoab di amǃgâb ai kuru. 11 Korodisi brons ǃgaeǁare-ūdade kuru, î ǁîdi ǀkha nē ǀgam ǂgāmâisakha ǀgui ǂgāmâisab ase ǀhaoǀhao. 12 ǃGau ra ǃkhareǃâba Tentommi di ǃgâbǀkhāba ǃgū-ū. 13 ǃNamkha ai korodisi sentimetergu ǀkha ǃnāsase ra ǃkhāǂoa ǃâkha ge Tentommi di ǃnamkha nî ǂganamūhe.
14 “Baib di khōb ǀkha kuruhe tsî ǀapaǀapahe hâ khōba ǀgamǁî ǃgū-aib Tentommi dib ase ǂom tsî ǃnonaǁî ǃgū-aib ǀgapise nî ǃgū-ai-ūheb ge tsaura khōb ǀkha nî kuruhe.
15 “Gaxuse ra mâ ramde akasiahain ǀkha Tentommi ǃaroma kuru. 16 Mâ rams hoas ge haka meterga gaxu tsî ǃnanidisiǃnaniǀa sentimeterga nî ǂhaba. 17 Mâ rams hoas ge ǀgam ǁôakha ǁîs ra ǁgâiǂgā-ūhekha nî ūhâ, ǁnā-amaga di ge hoaraga ramde ǁnāti ī ǁgâiǂgā-ūǁôagu ǀkha nî kuruhe. 18 ǀGamdisi ramde Tentommi di ǃkhawagasǀkhāb ǃaroma kuru 19 tsî hakadisi ǀhaiǀuriǂaidi, ǁîdi ra ǂgâǃnâdi tsîna. ǀGam ǂaira mâ rams hoas ǃnaka, rams ǁôakha nî ǁnāpa ǁgâiǂgāhese. 20 ǀGamdisi ramde Tentommi di ǀapasǀkhāb ǃaroma kuru 21 tsî hakadisi ǀhaiǀuriǂaide, ǀgamra mâ rams hoas ǃnaka nî hâse. 22 ǃNani ramde Tentommi di ǃgâbǀkhāb, huriǂoasǀkhāb ǃaroma kuru 23 tsî ǀgam ramra Tentommi di ǃkhawagas ǁhôara ǃaroma. 24 Nē ǁhôaramra ge ǃnakab ai ǀhaoǀhaohe tsî ǀgapika ǃhuniǀurirâis ǀkha ǁaposase nî ǃkhōǀhaohe tsî ǀgui rams ase hoa ǁhôara nî ǃkhōǁare. 25 Nēs ge ra ǂâibasen ǁkhaisa ramde, ǁîdi disiǃnaniǀa ǀhaiǀuriǂaidi ǀkha, ǀgam ǂaira mâ rams hoas ǃaroma.
26 “Disikoroǀa ǃnâǃkhâ ra ǁguihe haiga akasiahain ǀkha kuru, koroga Tentommi ǀgui ǀkhāb di ramdi ǃaroma, 27 koroga nau ǀkhāb di ramdi ǃaroma tsî nau koroga Tentommi di ǃgâbǀkhāb, huriǂoasǀkhāb ai hâ ramdi ǃaroma. 28 ǁAegub di ǃnâǃkhâ ǁgoe haib, ramdi ǁaegu ǀgapise ra ǁguiheb ge ǀgui ǀkhāb Tentommi diba xu nau ǀkhāb kōse nî ǃkharu. 29 Ramde ǃhuniǀurib ǀkha ǃkhûǀkhā, î ǃnâǃkhâ ra ǁguihe haigu, ǁîgu tsîn nî ǃhuniǀurib ǀkha ǃkhûǀkhāhegu nî ǃgae-aihe ǃhuniǀurirâide ǁîdi ai kurumâi. 30 Tita ge ǃhommi ai ǁgau tsi ǀapeǁguib ǃoa Tentomma ǂnubi.
31 “ǂGāmâisab ǂhoa, ǂhoaǀapa tsî ǀapa gūǀûn ǀkha kurusaba tsaura lapin ǀkha ǂom, î ǁîba xerub di īsib ǀkha ani. 32 Haka akasiahaigu ǃhuniǀurib ǀkha ǃkhûǀkhāhe hâgu tsî ǃhuniǀuriǃgaeǁare-ūdadi, ǀhaiǀuriǂaidi ai mâdi ai ǀkha ǂgāmâi. 33 ǂGāmâisaba Tentommi ǂamǃnâb ai hâ ǃhuniǀuriǃgaeǁare-ūdadi ai ǂgāmâi, î ǃGaeǀhaos ǂGaesa ǁîb ǃgâb ai mâi. Nē ǂgāmâisab ge ǃAnu ǃKhaiba nî Hoan xa ǃAnu ǃKhaiba xu ǀgora. 34 ǂGanaisa ǃGaeǀhaos ǂGaes ai ǂnûi. 35 Hoan xa ǃAnu ǃKhaib di ǃauga, Tentommi di ǀapasǀkhāb ai tāba mâi, î ǁîb ǃoagu ǃkhawagasǀkhāb ai ǃamǀaekandelara mâi.
36 “Tentommi di ǂgâ-ams ǃaroma ǂhoa, ǂhoaǀapa tsî ǀapa gūǀûn ǀkha ǂgāmâisaba tsaura lapin ǀkha ǂom, î ǁîba ǂomani-ani. 37 Nē ǂgāmâisab ǃaroma koro akasiahaigu ǃhuniǀurib ǀkha ǃkhûǀkhāhe hâgu tsî ǃhuniǀuriǃgaeǁare-ūdadi tsîna kuru. Koro bronsǂaidi ǁîgu nî mâǃnâdi tsîna kuru.
© Khoekhoegowab Elobmîs © Bible Society in Namibia, 2020.
