Israelǁîn ra ǀApahuriba ǃgâu
1 Ob ge ǃKhūba Moseb ǃoa ge mî: 2 “Israelǁîna mîba în oa tsî Pi-Hahirots, Migdols tsî ǀApahurib tsîra ǁaegu tsî Baal-Sefons hîa ǀgūse ǁgoes tawa sī hâǃkhaiba ge ǂnaumâi. 3 Ob ge Faraoba Israelǁîn ra ǃgaroǃhūb ǃnâ ǂgâsa ǃao tsî ǀnaremas ǀguisa hî, ti ǁîb ǃnâ nî ǂâi. 4 Tsî ta ge ǁkhawa Faraob di ǂgaoba sadob nî ǃgôaǃgonse nî karokaro tsî ta ge ǁnās ǃnâ ǁîb tsî ǁîb di toroǂnubis tsîn ǂama dans di ǃgôasiba nî hō. Egipteǁîn ge nî mûǂan tita a ǃKhū ǃkhaisa.” Tsîn ge Israelǁîna mîbahen ge khami ge dī.
5 Egipteb di gao-aob ge Israelǁîn ge Egipteba xu ǃkhoeni ǃkhaisa mîbahe, o gu ge ǁîb tsî ǁîb ǂammâisagu tsîga ǂâi-unuǃgâ tsî ge mî: “Tare-e ge go dī tsî Israelǁîn, sada khobona sada ǃoabasa xu ǃnoraǃnora?” 6 Gao-aob ge ǁîb kunisa ǂgāǃao kai tsî ǁîb di toroǂnubisa ge ǂhomi. 7 ǁÎb ge ǃnanikaidisi ǁhûiǂuisa torokunidi tsî ǁkhāti nau hâ hoaraga torokunidi Egipteb dide ge ǂhomi kai, mâ torokunis hoasa ǁîs di toromîmā-aob ǀkha. 8 ǃKhūb ge Faraob ǂgaoba ge karokaro tsîb ge gao-aoba Israelǁîn hîa ge kai ǁkhoaǂgaosib ǀkha Egipteba xu ǃkhoenina ge ǃgôaǃgon. 9 Egipteb di toroǂnubis, kunidi, hātoroǃkhamaogu tsî ǀnūtoroǃkhamaogu tsîn ge Israelǁîna ǃgôaǃgon tsî ǁîna ǀApahurib ǀgūsen Pi-Hahirots tsî Baal-Sefons tsîra tawa hâǃkhaiba ǂnaumâi hâ hîa ge sīǃgâ.
10 Faraob ge ǀgūse hā, on ge Israelǁîna kō-oan ge, o Egipteǁîn ra ǁîna sīǃnâ ǃkhaisa mû tsî kaise ǃao tsî ǃKhūb ǃoa huihen nîse ge ǂgaiǂui. 11 Tsîn ge Moseb ǃoa ge mî: “ǀHoba-i Egipteb ǃnâ a ǀkhai osa sats ge ǁnāpa xu ūbē dasa, î da ǃgaroǃhūb ǃnâ hā ǁō? Mû, sida Egipteba xū ǂoaxa-ūs ǀkhats ge tare-e a dī ǃkhaisa! 12 Egipteb ǃnâ da kom ǀnai ge mîba tsio, îts sida ǁnāxūǂui, î da ǁnāpa Egipteǁîn di khobose ǁîna ǃoaba, nēpa da ǃgaroǃhūb ǃnâ hā nî ǁōs xa.”
13 Ob ge Moseba ǁîna ge ǃeream: “Tā ǃao, mâǀgai, î nētsē kō mâtib ǃKhūba nî ore dusa. Egipteǁîn nētsē du ra mûna du ǁkhawa mû tide xuige. 14 ǃKhūb ge aitsama nî ǃkhamba du, sadu nî dī xū-i tsîn a ǀkhai.”
15 ǃKhūb ge Moseb ǃoa ge mî: “Tare-i ǃaromats tita ǃoa ra ǂgai? Israelǁîna mîba în aiǃâb ǃoa ǃgû. 16 Sa ǀkharuba ūkhâi, î hurib ǀgapika ǃkhōmâi. Hurib ge nî ǀgora tsîn ge Israelǁîna ǂnâsa ǃhūb ai huriba nî ǃgâu. 17 Tita ge ǁnātikōse Egipteǁîn di ǂgaoga Israelǁînan nî hurib ǃnâ sauruǂgās kōse nî karokaro. Tsî ta ge tita Faraob, ǁîb di toroǂnubis, torokunidi tsî hātoroǃkhamaogu tsîn ǂama dans di ǃgôasiba nî hō. 18 Egipteǁîn ge tita ga Faraob, ǁîb torokunidi tsî hātoroǃkhamaogu tsîna ǃkhamdan, o nî mûǂan tita a ǃKhū ǃkhaisa.”
19 Elob di ǀhomǃgāb Israeli toroǂnubis aisǀkhāb ai ge hâ ib ge khaosǀkhāb ǃoa ge hā, tsîs ge kai ǃâus ǁîn aiǃâ ge hâ is tsîna khaosǀkhāb ǃoa hā, 20 tsî Egipteb toroǂnubis tsî Israeli toroǂnubis tsîn ǁaegu hā ge mâ. Nē kai ǃâus ge hoaraga tsuxuba, nē ǀgam ǀkhākha ǀgūgu tidese Egipteǁîn ǀkhāba ǃkhaeǃkhae tsî Israelǁîn ǀkhāba ge ǃnâǃnâ.
21 Ob ge Moseba ǁîb di ǃomma hurib ai ge ǀhōǂui tsîb ge ǃKhūba hoaraga tsuxuba aiǂoas di ǀgaisa ǂoab ǀkha huriba ǂhā-oa tsî huriba ǂnâsa ǃhūb ǃnâ ge ǀkharaǀkhara. Hurib di ǁgammi ge ge ǀgora 22 tsîn ge Israelǁîna hurib di ǁaegu, ǂnâsa ǃhūb ai ge ǃgâu, ǁgammi ǃnamkha ai ǂnubiǂgoakha khami mâse. 23 Egipteǁîn ge Faraob hoaraga hān, torokunidi tsî hātoroǃkhamaogu tsîn ǀkha Israelǁînan gere sauru hîa hurib ǃnâ ge āǁō, ǀgui-i ân tsîn ǃgau tamase. 24 Sores nî ǁhais aiǃâb ge ǃKhūba khau ra ǀaes tsî kai ǃâus tsîna xu Egipteǁîn ai kōǁnâ tsî ǁîna kai ǃaob ǀkha ge ǃnamiǂgā. 25 ǁÎb ge ǁîn torokunidi di ǀnūde ge tsōmâ kai tsîn ge huriba ge ǃgâu ǁoa i, on ge Egipteǁîna ge mî: “ǃKhūb ge Israelǁîn ǃaroma sada ǃoagu ra ǃkham, xuige ǀkhī, î da nēpa xu ǂoa!”
26 Tsîb ge ǃKhūba Moseb ǃoa ge mî: “Sa ǃomma hurib ai ǀhōǂui, îb ǁgamma hoaraga Egipteǁîn, ǁîn di torokunidi tsî hātoroǃkhamaogu tsîn ai hā.” 27 Moseb ge ǁîb di ǃomma hurib ai ge ǀhōǂui tsîb ge ǁgamma sores ǁhaib ai ǀnaib ra hâ khami hā ge ǁgoe. Egipteǁîn hîa ǁgamma xu ǂoasa gere dītsân ge ǃKhūb xa ǁgammi ǀkha ge ǃnamiǂgāhe. 28 ǁGammi ge dâutsoatsoa tsî hoaraga Faraob di torokunidi, hātoroǃkhamaogu tsî Egipteb di toroǂnubis hîa Israelǁîna hurib ǃnâ ge sauruǂgān tsîna, ǀgui-i tsîn ǃgau tamase ge āǁō kai. 29 Xawen ge Israelǁîna ǂnâsa ǃhūb ai ǁgamǂnubiǂgoakha ǃnamkha ai mâse huriba ge ǃgâu. 30 ǁNā tsēs aib ge ǃKhūba Israelǁîna Egipteǁîn ǃomma xu ge huiǂui, tsîn ge Israelǁîna mâti di Egipteǁîn di ǁō hâ sorode huri-ammi ai ǁgoe ǃkhaisa ge mû. 31 Israelǁîn ge ǃKhūb di kai ǀgaib, Egipteǁîn ǃoagub ge sîsenūba mû, on ge ǁîna ǃKhūba ǃaoǃgâ tsî ǁîb tsî Moseb, ǁîb di ǃgāb tsîkha ǃnâ ge ǂgom.
© Khoekhoegowab Elobmîs © Bible Society in Namibia, 2020.
