Egipteb di ǂguroǃnaesagu ǁōb
1 Ob ge ǃKhūba Moseb ǃoa ge mî: “Nēb ge ǀuni ǁkharab Faraob tsî Egipteb ǂama ta nî sîǂuiba. ǁNās khaoǃgâb ge ǁîba sado ǃnoraǃnora tsî hoado Egipteba xu nî ǁgariǂui. 2 Nēsi Israelǁîn hoana, mâ aob tsî taras tsîn hoana mîba, în Egipteǁîn ai ǃhuniǀuri tsî ǀhaiǀuri-anixūna ǂganbasen.” 3 ǃKhūb ge Egipteǁîn nî Israelǁîna ǃgôasiba mā ǃkhaisa ge dī. Hoaraga Egipteb ǃnâb ge Moseba kaise ǃgôaǃgôasa khoeb ase Faraob ǂammâisagu tsî khoen xa gere ǃgapaǀîhe.
4 Moseb ge Faraob ǃoa ge mî: “Nētib ge ǃKhūba ra mî: ‘Tsuxub di ǁaegub ǃnâ ta ga Egipteb hoab ǃnâ-u ǃgû 5 o gu ge hoaraga ǂguroǃnaesagu Egipteb digu, Faraob di ǂguroǃnaesab, trons di ǀumi-aoba xu ǃhoroba ra ǁkhami ǃgās di ǂguroǃnaesab kōse nî ǁō. ǁKhāti gu ge hoaraga ǂguroǃnaesagu ǀgoan tsî goman digu tsîna nî ǁō. 6 Egipteb hoaragab ǃnâb ge ǃgari āb noxopa ge ǁnâuhe tama hâ ib tsî ǁkhawa ǁnâuhe tideba nî hâ. 7 Xawe Israelǁîn ǁan hâpa i ge ari-i tsîna ǁîn tamas ka io ǁîn di ǀgoan tsî gomana ǁhū tide. Nēs ǃnâ du ge ǃKhūb ǃkharagagusiba Egipteǁîn tsî Israelǁîn tsîn ǁaegu ra dī ǃkhaisa nî mûǂan.’ ” 8 Moseb ge ǀams ai sao rase ge mî: “Hoaraga ǂammâisagu ge tita tawa hā ǃhonǁgoa tsî hoaraga Israelǁîna ū tsî ta nî ǃgû ǃkhaisa nî ǀkhoma te. Tsî ǁnās khaoǃgâ ta ge nî ǃgû.” Moseb ge kaiseb ǁaixa hâse Faraoba xu ge ǃgû.
9 Ob ge ǃKhūba Moseb ǃoa ge mî: “Faraob ge ǃgâ kho tide. ǁNā-amaga ta ge ǃnāsa buruxa saode Egipteb ǃnâ nî dī.” 10 Moseb tsî Aron hâkha ge nē saodi hoade Faraob mûǁae gere dī, xaweb ge ǃKhūba Israelǁînab ǃnoraǃnora tidese ǂgaob âba gere karokaro.
© Khoekhoegowab Elobmîs © Bible Society in Namibia, 2020.
