Jodeǁîn ge ǁîn di khākhoena ra hîkākā
1 [1] Disiǃnonaǀaǁî tsēs Adari dis, gao-aosi mîmās ge ǁîs ai sîsentsoatsoas 2 [2] ain ge Jodeǁîn di khākhoena ge hîkākāhe. ǀGui khoe-i tsîn ge Jodeǁîna ge mâǃoa ǁoa i, ǁînan gere ǃao xui-ao. 3 [3] ǁKhāti gu ge ǀkharib di gowoniagu, ǃkhōdana-aogu tsî gaosib xoa-aogu tsîga Mordekaiba gu gere ǃao xui-ao, Jodeǁîna ǃgôasiba gere mā. 4-5 [4-5] Gao-aosi mîmās ge ǁîb di ǀons nî hoaraga gaosib ǃnâ ǂanhe ǃkhaisa ge ǃaroma.
6 [6] Susas ǃnân ge Jodeǁîna korokaidisi khoena ǃgam 7-10 [7-10] tsî ǁîn di xūna ge ūbasen. ǁÎn ǁaegu gu ge Hamanni, Hamedatab Bougaiǁîb ôab, Jodeǁîn di khākhoeb di disi ǀgôagu Farsanestainni, Delfonni, Fasgab, Faradatab, Bareab, Sarbaxab, Marmasimab, Aroufaeub, Arsaeub tsî Saboutaeub tsîga ge hâ i.
11 [11] ǁNā tsēs ǁkhās aib ge gao-aoba Susas ǃnâ ge ǃgamhe khoen di ǃgôaba ge ǂanǂanhe. 12 [12] Ob ge Esters ǃoa ge mî: “Kaiǃās Susas ǀguis ǃnân go Jodeǁîna korokaidisi khoena a ǃgam, o tare-en ǁnâi nau ǀkharigu ǃnâ go dī! Mîba te re, tare-es noxopa ra ǂgaosa, os ge nî dībahe.”
13 [13] Os ge Estersa ge ǃeream: “An Jodeǁîna nētsēn go dī xūnan nî ǁaris tsîna dī ǃkhaisa mā-amhe, î ǁkhāti Hamanni disi ǀgôagu di sorodi nî ǂgāmâihe ǃkhais tsîna mîmā.” 14 [14] Gao-aob ge kaiǃās di Jodeǁîna Hamanni disi ǀgôagu di sorodi nî ǂhaisase ǂgāmâihe ǃkhaisa ge mā-am. 15 [15] Disihakaǀaǁî tsēs Adari dis ain ge Susas di Jodeǁîna ǁkhawa ǀhao tsî ǃnonakaidisi khoena kaiǃās ǃnâ ge ǃgam, xawe xū-e ǃnari tama ge i.
16 [16] Nau ǀkharigu ǃnâ ge hâ i Jodeǁîn ge ǁkhāti ǀhao tsî ge ǁkhaubasen. ǁÎn ge ǁîn di khākhoena xu disikoroǀaǀoadisi khoena disiǃnonaǀaǁî tsēs Adari dis ai ge ǃgam, tsî ǁnās ǀkha ǁîna xu ge ǃnorakaisen, xawe xū-e ǃnari tama ge i. 17 [17] Disihakaǀaǁî tsēs ain ge sâ tsî ǁnā tsēsa sâtsēs ase ǂnûiǂgā tsî dâb tsî ǃgâiaǂgaob ǀkha gere ǁâudī.
18 [18] Susas Jodeǁîn ge ǁîn di khākhoenan ge disiǃnonaǀas, disihakaǀas tsî disikoroǀas kōse ǃgamtoa tama hâ i, xui-aon ge ǁîna disikoroǀaǁî tsēsa sâtsēs ase ge dī. 19 [19] ǁNā-amagan ge Jodeǁîn hîa ǂkhari ǃādi ǃnâ ǁan hâna disihakaǀaǁî tsēs Adari disa sâtsēs ase ǃgapaǀî tsî ǀkhaexūn ase ǂûna ǁîǃnābe ra sîbagu, kai ǃādi ǃnâ ǁan hân ra ǁkhā ǀgaub ai disikoroǀaǁî tsēsa tsēdī tsî ǁîǃnābe ǀkhaexūna sîbagu hîa.
Purimǁâudīb di ǂnûiǂgāhes
20 [20] Mordekaib ge nē xūna ǂkhani-i ǃnâ xoamâi tsî hoaraga Jodeǁîn, ǀgūse tsî ǃnūse Artaxerxeb di gaosib ǃnâ hân ǃoa sîǂui 21 [21] tsî nē ǂkhani-i ǃnâ ǁîna ge mîba, în disihakaǀaǁî tsēs tsî disikoroǀaǁî tsēs Adari dis tsîra sâtsēdī. 22 [22] Nēra ge Jodeǁîn ge ǁîn di khākhoena xu ǃnorakaisen tsēra. Jodeǁîn ge hoaraga ǁkhâb Adari, hîab ge ǁîn mâsib, tsûaǂgaob tsî ǃoab diba ǃgâiaǂgaob tsî dâb ǃnâ ǀkharaǀkharaheba sâǁaeb ase nî ǃgapaǀî. ǁÎn ge ge mîbahe, în nē tsēdi ǃnâ dâxase ǁâudī tsî ǀhōsan tsî ǀgâsan tsîna ǂûna ǀkhae. 23 [23] Jodeǁîn ge Mordekaib ge ǁîna mîmā khami ge dī.
24 [24] Mordekaib ge mâtib ge Hamanni, Hamedatab Masedoniaǁîb ôaba Jodeǁîn ǃoagu ǃkham ǃkhais, mâtib mîmā-e dī tsî ǀkhūsa ge ao, tsēs ǁîs aib Jodeǁîna nî hîkākāsa ǁapoǁapos ǃaroma ǃkhais, 25 [25] tsî mâtib ge Mordekaib nî ǂgāmâihe ǃkhaisab gao-aoba nî mîbase ǁîb tawa ǂgâ ǃkhais tsîna ge xoamâi. Xawes ge Hamanni ge Jodeǁîn ǃoagu dī ǂkhaba ǀapesa ǁîb ǂûb ai ge hā, tsî gu ge ǁîb tsî ǁîb ôagu tsîga ge ǂgāmâihe. 26-28 [26-28] Mordekaib di sîǂkhanis, ǁîn ge tsâ ǃgomgu tsî ǁîn ǀkha ge ī xūn hoan xa ǃaromahe hâsen ge Jodeǁîna Mordekaib di ǀapesa ūǃoa tsî ǁîn, ǁîn surib tsî khoe-i hîa ga Jodeǁî kai-i ǃaroma, xoaǁguisa ǁgarab ase ge dī; nē tsēdi nî ǁîn di saoǃgâgu ra ôananôagub xa, mâ ǃās, ǀkharib tsî ǃhūb hoab ǃnâ ǂâiǂâisens tsēdi ase ūhâhe tsî nî ǃkhōǀgarahe ǃkhaisa. Jodeǁîn ge nē Purim tsēde hoaǁae ǂâis ǃnâ ūhâ tsî ǁnākhao tide. (Nē sâtsēdi ge “Purim” ti ge ǀonǂgaihe, “purim” ti hâ mîs ǁîn gowab dis, “ǀkhūs” ti ra ǂâibasen xui-ao.)
29-30 [29-30] Gao-aos Esters, Aminadab ôas ge Mordekaib, Jodeǁîb ǀkha ǀhao hâse, ǁîn ge dī xūna xoamâi tsî ǀoasa ǂkhâǃnâsa nē sîǂkhanis Purims xa hâsa ge mā. 31 [31] Mordekaib tsî gao-aos Esters hâra ge ǁâudīgu di ǂnûiǂgās ǃereamsa ū tsî ǁnās ǀkha ǁîra ûiba ǃaorosasib ǃnâ ge mâi. 32 [32] Esters ge nē ǁâudība ǀamoseb nî tsēdīhese ge ǂnûiǂgā tsîs ge nē ǃkhaisa, ǂhanusi ǂnûiǂgās ase ge xoaǁguihe.
© Khoekhoegowab Elobmîs © Bible Society in Namibia, 2020.
