ǀAsa ûib Xristub* ǃnâ
1 Sadu dīsādi tsî ǁoren ǃnâ du ge ge ǁō hâ i. 2 ǁNā ǁaeb ǃnâ du ge nē ǂkhaba ǃhūbaib, danaǂgaeǂgui-aob ǀgapiseb ǃnâ hâ ǁkhāsigu dib, gagab hîa ǁnān Elob ǃoagu a ǁnâuǀnamoǃnân ǃnâ ra sîsenna gere sao. 3 ǁÎn ǁaegu da ge sada tsîna aibe sorosi turagu ǃnâ ûi tsî sada soros tsî ǁnâuǃāb gere ǂgao ǀgauba gere sao, tsî da ge naun khoen ǁkhān khami Elob di ǁaiba anu hâ.
4 Xawe Elob ǀnammi di kaisib ge mâtikōseb ǁîba ǀkhomxasib xa ǃkhū hâ ǃkhaisa ra ǁgau da. 5 Sada ǁoren ǃnâ da ge ǁō hâ i, ob ge Xristub ǀkha ge ûi kai da, ǀkhomma xus ge ǃgâiǃō kaihe da gesa. 6 ǁÎb ge Xristub Jesub ǃnâ sada ǁîb ǀkha ǁōba xu ūkhâi tsî ǁîb ǀkha ǀhommi ǃnâ hâǃkhaisa ge mā. 7 Nēs ǃnâb ge ǃgoaxa ǁaegu hoagu ǃnâ mâtikōseb ǁîb di ǀkhomma ǃnāǂamsa ǃkhaisa ǁîb di ǃgâisib, Xristub Jesub ǃnâ sada ǃoa hâba nî ǁgau da. 8 ǀKhomma xu du ge ǂgoms ǃnâ-u ǃgâiǃō kaihe xui-ao, tsî nēsa sadu ǃoaǂuisa xu tama, xawe Elob di mās ase. 9 ǁKhātis ge nēsa sadu sîsenga xu hâ tama, ǁnā-amaga i ge ǀgui-i tsîna a koasen ǁoa. 10 Elob ge ī da ase ge kuru da. ǁÎb ge ǀnaib ge dī da nîse aiǂhomi ǃgâi sîsengu di ûiǂuib ǃaroma Xristub Jesub ǃnâ ge kuru da.
ǀGui khoese Xristub ǃnâ
11 ǂAn ǁnâi re sadu Jodeǁî tamado, aibe du ge “ǃgaosa taman” ti ǁî-aitsama “ǃgaosan a” ti ra ǂgaisen Jodeǁîn xa gere ǂgaihe, khoesi ǃomgu ǀkha soros ai dīhe hâ sîsenni a xawe. 12 ǁNā ǁaeb ǃnâ du ge Xristub ose gere ûi. Tsî du ge Israeli di ǁanisisa xu ǁaraǁnâhe tsî Elob ǃgaeǀhaodi di mîmâis ǃhaokhoese, ǃâubasenoǃnâ tsî Elob ose ǃhūbaib ǃnâ gere ûi. 13 Xawe nēsi du ge Xristub Jesub ǃnâ sadu hîa ge ǁîba xu ǃnū i do, Xristub di ǀaob ǃnâ ge ǀgūǀgūhe. 14 Xristub ge a sada di ǂkhî, ǁnāb Jodeǁîn tsî Jodeǁî taman* tsîna ge ǀgui khoe kaiba. ǁÎb di sorosa mās ǀkhab ge khākhoesib di ǂnubiǂgoab, sada gere ǀgoraba ge khôaǁnâ. 15 ǁÎb ge Jodeǁîn ǂhanuba mîmādi tsî ǁgaragu tsîn âb hoab ǀkha ge dībē, nē ǀgam ǃhaorab ǀgui ǀasa khoese ǁîb ǂûb ǀkha ǀguiǃnâxa kais ǃaroma. ǁNā ǀgaus aib ge ǂkhîba ge dī. 16 ǁÎb di ǁōb, ǃgâuhaib* dib ǀkhab ge ǁîba khākhoesib hîa Jodeǁîn tsî Jodeǁî taman tsîn ǁaegu ge hâ iba toa kai, tsî Elob ǃoa hoa ǀgamna ǀgui khoese ge ǀhaoǀhao. 17 Tsî hāb ge ob ge ǂkhîb di ǃGâiǂhôasa ǁnān ǃnūse tsî ǀgūse hân hoana gere aoǁnâba. 18 ǁÎb ǃnâ-us ge Jodeǁîn tsî Jodeǁî tama da hoada ge ǀgui Gagab ǃnâ-u ǁGûb kōse sīsa. 19 ǁNā-amaga du ge ǃaruǀî ǃhaokhoe tsî ǃhūsabe tama hâ, xawe du ge nēsisa Elob khoen ǀkha ǀhûǁanǂgāsabe tsî ǁîb omaris di ǁani. 20 Sadu ge apostelgu tsî kēbo-aogu tsîn ge ǁgui ǃgaoǃgaob, Xristub Jesub ǂûba ǁhôaǀuib ase ūhâb ai ge ǂnubihe. 21 ǁÎb ǃnâs ge mâ ǃâro-i ommi di-i hoa-i ge ǀhaoǀhaohe tsî ǃKhūb di ǃgôasib ǃaroma ǃanu Tempel-i kōse a dīhesa. 22 Sadu tsîn ge ǀgui ǁanǃkhais Elob dis ǃnâ ǁîb di Gagab ǃnâ-u ge ǂnubikhâihe.
© Khoekhoegowab Elobmîs © Bible Society in Namibia, 2020.
