Elob ge mâ xū-i hoa-i ǃaroma ǁaeba ǂnûiǂui hâ
1 Mâ xū-i ǃhūbaib ai ra ī-i hoa-i ǃaromab ge Eloba ǁaeba ǂnûiǂui hâ.
2 ǁAeb ǃnaes dib tsî ǁaeb ǁōs dib,
ǁaeb ǃhanas dib tsî ǁaeb ǃhanahe hâna ǃhomǂuis dib,
3 ǁaeb ǃgams dib tsî ǁaeb ǂuruǂurus dib,
ǁaeb khôaǁnâs dib tsî ǁaeb ǂnubikhâis diba.
4 ǁAeb ās dib tsî ǁaeb âis dib,
ǁaeb ǃoas dib tsî ǁaeb ǂnās dib,
5 ǁaeb ǀuina aoxūs dib tsî ǁaeb ǀuina ǀhaoǀhaos dib,
ǁaeb ǁnams dib tsî ǁaeb ǁnamsa xu ǃnūse hâs diba.
6 ǁAeb ôas dib tsî ǁaeb ôaǀûs dib,
ǁaeb ūhâǀgaras dib tsî ǁaeb aoxūs dib,
7 ǁaeb doas dib tsî ǁaeb ǂoms dib,
ǁaeb ǃnōs dib tsî ǁaeb ǃhoas diba.
8 ǁAeb ǀnams dib tsî ǁaeb ǁkhans dib,
ǁaeb torodīs dib tsî ǁaeb ǂkhîb diba.
9 Tarebe harebesas nēsa sîsenao-i, ǁîs ǃnâ ra sîsen-e ūba hâ? 10 Tita ge sîsenni Elob ge ǁîb ôan, khoen ôana māb, ǁîb ǃnân ǁîna nî ǀhaweba ge mû. 11 Elob ge mâ xū-i hoa-e ǁî-i di ǂhunuma ǁaeb ai ra dī. ǁÎb ge khoesiba ǀamosiba ra mâi-aiǃâ, xawe da ge nēs tsîn ǃnâ tātsēs tsîna Elob sîsenna ǀoasase ǁnâuǃā tama hâ. 12 Tita ge ǃgâiaǂgao tsî ǃgâise ûis ose i ǀnî ǃgâi ûi-e ǁîn tawa a ǀkhai ǃkhaisa a ǂan. 13 ǁÎ-i ǃnâ i mâ-i hoa-e ǂû tsî nî ā, tsî ǁî-i ge ǀhupuba xūna nî ǀamasa. Nēs ge a Elob di mā. 14 ǂAn ta ge a mâ xū-i Elob ra dī-i hoa-i ǀamose ra hâsa. ǁÎ-i tawats ge ǀaro tamas ka io ūbē tide. Nēsab ge Eloba khoesib nî ǁîba ǃaoǃgâba ūhâbase ra dī. 15 Hâ an ge ǀnai ge hâ i, tsî hā nîn ge ǁkhāti ǀnai ge hâ i. Elob ge ǀnai ge ǃgû-īna ǁkhawa ra ôa.
ǃHūbaib ǂhanuoǃnâsib
16 ǁKhawa ta ge ǃhūbaib ai ge mû: ǂHanu-aisib amǃnâs aib ge ǂkhabasiba hâ. Tsî ǂhanu-aisiba da ra mû ǂgaopab ge ǂhanuba hâ. 17 Tita ge ǂgaob ǃnâ ge ǂâi: ǂHanu-aib tsî ǂkhababab ge Eloba ǂhanu ǁaeb ai nî ǀgoraǃgâ, mâ xū-i hoa-e, mâ dīb hîa ga hâb hoab ǀkha. 18 ǁKhāti ta ge Elob ra ǃâitsâ da tsî xamarin tsî ǀguruna xu da ǀkhara tama ǃkhaisa ǁgau dasa ge ǂan. 19 Khoena ra hāǂam xūn ge ǁkhāti ǀgurun tsî xamarin din ǀkha a ǀgui. Nē-i ra ǁōs ǁkhās khami i ge nau-i tsîna ra ǁō, hoan ǀgui ǀoms ǀguisa ūhâ xui-ao. Tsîs ge khoe-i di harebesa ǀgurun tamas ka io xamarin dis ǂamai hâ tama hâ; hoan ge a harebeoǃnâ. 20 Mâ-i hoa-i ge ǀgui ǃkhaib ǁga ǀgui ra ǃgû, tsaraba xu ge hā tsî i ge tsarab ǁga ra oa. 21 Tari-e khoe-i ǀoms ra ǀhommi ǃoa ǃapa tsîs xamari-i tsî ǀguru-i ǀomsa ǃhūb ǃnâ ra ǁgôa ǃkhaisa a ǂan? 22 Tsî ta ge ge mûǂan, sada ge ǀhupuba xūn di ǃgâiba da nî ǀama ǃkhaisa. Tari-e ǁîb ga ǁō o-i tare-e nî īsa nî ǂan.
© Khoekhoegowab Elobmîs © Bible Society in Namibia, 2020.
