1 Sa Kuru-aob xa ǂkhamsis âts ǃnâ ǂâi re,
ǁnā ǂkhaba tsēdi ǁîdi ǃnâts
“ǃGâi-i xare-e ta ǁîdi ǃnâ hō tama”
ti nî mîdi nî hās aiǃâ.
2 Sores tsî ǃnâb,
ǁkhâb tsî ǀgamirode ǃkhaeǃkhaehe
tsî di ǃâude ǀnanub khaoǃgâ nî ǁarus aiǃâ.
3 Omsa ra ǃûikha ǀkhū, ǀgaisakha ǂkhabu,
ǁnādi ǃhoroba ra ǁkhamide ǁkhamiǀû
tsî di mûǂuidaode-u ra kōǃkharu mûde nî ǀhai kaihes aiǃâ.
4 Daodi ǃgangu ǃoa ra ǂoade ǂganamhe;
ǃhoroǁkhamis di ǀōba ǂam,
khoe-e ani-i āb xa ǂkhaiǂkhaihe
tsî di ǁnae-aodi di ǁnaetsanade nî ǀhoes aiǃâ.
5 Khoen ǀgapi ǃkhaigu ai
tsî daogu ai ǃgûsa ra ǃao ǁaeb,
amandelhaide ǃkhā,
ǂhomma ǂause ǂhana
tsîb hoaraga turaba ra ǀkhaib ǃnâ sa Kuru-aob xa ǂâi re,
khoen ǁōb di ǃkhaib ǃoa garu
tsîn ǃoa-aona ǃgangu ǃnâ ra ǃgûma xuige.
6 Sa Kuru-aob xa ǂâi re ǀhaiǀuri ǃhâuba ǂgaeǃgaohe,
ǃhuniǀuri xapasa khôaǂkhūhe,
ǁgamxapab ǁgam-e ǀaus tawa ra ǂgae-ūheba ǂkhūǂkhūhe
tsîs ǀnūs, tsaus tawa ra sîsenūhesa nî khôahes aiǃâ.
7 Soros nî ǃhūb, ǁîba xus ge ǂnubiheb ǃoa
tsî ǀomsa Elob, ǁîsa ge mā hâ ib ǃoa oas aiǃâ.
8 Hoaraga xūn ge a harebeoǃnâ, tib ge Aoǁnâ-aoba ra mî,
harebeoǃnâ a.
ǀAmǀams
9 Gā-aisib âb xōǀkhāb ge Aoǁnâ-aoba ǂgui ǂkhoamîde ǂōrisase ôaǃnâ, ǀhaoǀhao tsî xoa tsî khoena ǁîb ǂan xūna gere ǁkhāǁkhā. 10 Aoǁnâ-aob ge ǀgaisase ǃgâi mîde gere ôa tsîb ge hoaǁae amaba gere ǃhoa. 11 Gā-ai khoe-i di mîdi ge haib hîan gūre-aona ra ǀgoadī-ūb khami ī. ǀĀ spaikergu khami di ge ǀhaoǀhaosa mîdi, gā-ai khoe-i dide ī.
12 Ti ôatse, a ta ǁkhāti ǃkhâikhom tsi. ǂKhanina xoatoas ge ganupe a ǀkhai tsîs ge ǃnāsa ǁkhāǁkhāsensa nî ǂkhabu kai tsi.
13 Nē hoaraga xūn khaoǃgâs ǁîsa ra ǃgaumâs ge:
Eloba ǃaoǃgâ î mîmādi âba ǁnâuǀnam,
hūs di ǃaromas khoesib ge ǂnubibahes a ǁî xuige.
14 Elob ge mâ xū-i dī da ra-i hoa-e nî ǀgoraǃgâ,
nēsin ga ǃgâis tamas ka io tsūs hoasa,
ǂganǃgâsib ǃnâ ra dīhen tsîna.
© Khoekhoegowab Elobmîs © Bible Society in Namibia, 2020.
