Moseb ǁōb
1 Moseb ge Moab ǃgoaǃnāba xu Neboǃhommi ai, Pisgaǃhommi Jerixos ǃoagu ǁgoeb di ǂamǃnâb kōse ge ǂoa. ǁNāpa xub ge ǃKhūba Moseba hoaraga ǃhūb, Gileadsa xu Dans kōse ǁgoeba ge ǁgau. 2 ǃAruǀîb ge ǁîba Moseba hoaraga ǀkharib Naftalib dib, Efraimmi tsî Manaseb ǀkharib tsî hoaraga Judab ǀkharib Mediteraneahurib kōse ǁgoeb kōse, 3 ǃkhawagasǀkhāb Judab dib tsî ǃgoaǃnāb Soarsa xu Jerixos, palmhaidi ǃās kōse ǁgoeb tsîn hoana ge ǁgau. 4 ǁNās khaoǃgâb ge ǃKhūba Moseb ǃoa ge mî: “Nēb ge ǃhūb Abrahammi, Isaki tsî Jakob hâga ta ge ǁîgu suriba ta nî mā, ti mîmâibaba.”
5 Moseb, ǃKhūb di ǃgāb ge ǃKhūb ge mî hâ i khami, ǁnāpa Moabǃhūb ǃnâ ge ǁō. 6 ǃKhūb ge Moseba Moabǃgoaǃnāb, Bet-Peors ǃoagu ǁgoeb ǃnâ ge ǁkhō, xawe nētsēs kōse i ge khoe-i xare-e mâ ǃkhais ǂhanis aib ge Moseba ǁkhōhe ǃkhaisa a ǀū. 7 Moseb ge ǀguikaidisi tsî ǀgamdisi kurigu ǀkha ge ǁō; ǁîb ge mûǃgomsi-e ge ūhâ tama hâ i tsî ǁkhāti sorosise noxopa ge ǀgaisa i. 8 Israelǁîn ge Moab ǃgoaǃnāgu ǃnâ ǃnonadisi tsēdi ǁaeba Moseb ǁōb ǂama ge ǃoa.
9 Moseb ge ǁōb nîs aiǃâ Nunni ôab Josuaba ǃomǁgui-ais ǀkha ge ǀnau, tsîb ge gā-aisib di gagab xa ge ǀoa. Israelǁîn ge Josuaba ǁnâuǀnam tsî ǃKhūb ge Moseba mîmā xūn hoana ge dī.
10 Moseb khami ī kēbo-ao-i ge tātsēs tsîna Israeli ǃnâ ge hōhe tama hâ i. ǁÎb ge ǃKhūba aisa xu ais ǁga ge mû. 11 ǁÎb ǀguib ge ǃKhūb ge sî tsî mîmā bi ǁgauǁgaudi tsî buruxa dīn tsîna Egipteb ǃnâ, Faraob, ǁîb hoaraga ǂammâisagu tsî hoaraga ǃhūb ǃoagu ge dī. 12 Moseb ǀguib ge hoaraga Israelǁîn di mûǁae ǀgaisa dīgu tsî ǃaoǃaosa dīgu tsîga ge dī ǁkhā i.
© Khoekhoegowab Elobmîs © Bible Society in Namibia, 2020.
