1 “Sa ǃgâsa Israelǁî-i di goma-i tamas ka io ǀgoa-ets ga kā-i hâse a mû, o tā ǁae tamase tanisen, xawe ǁî-e ǁkhae, î sa ǀgūkhoe-e oasī-ūba. 2 Xawe i ga goma-i tamas ka io ǀgoa-i di ǀhonkhoe-e satsa xu ǃnūse hâ, tamas ka iots ga ǀū tari-i a kā hâ goma-i tamas ka io ǀgoa-i di ǀhonkhoesa, o sa oms ǁga ǁaru-ū, î-i ǁnāpa ǁî-i ǀhonkhoe-i nî ǁî-e ôasīs kōse hâ. 3 ǁKhās ǁkhāsats ge ǁî-i dâuki-i tamas ka io sara-i tamas ka io tare-i ǀgui-i ga sa ǃgâsa Israelǁî-e xu a kā, o sa huiba ǂgae-oa tamase nî dī.
4 “Sa ǃgâsa Israelǁî-i daob ai garu hîa i ga ǁî-i dâuki-i tamas ka io goma-e ǁnāǁgoe, tsîts ga ǁnāsa mû ots ge tā ǁae tama nî i, tsî ǁî-e nî hui, ǁî-i dâuki-i tamas ka io goma-e ūkhâisa, î-i ǁkhawa ǁî-i ǂaidi ai mâ.
5 “Tarekhoes ge aorekhoesarana ana tide tsî aorekhoeb ge tarekhoesarana ana tide. ǃKhūb sadu Elob mûǁaen ge ǁnāti ra dī khoena a ui-uisa.
6 “Ani-omrosats ga hais ai tamas ka io ǃhūb ai a mûǂnôa, tsî anirosa ǁîs ǃnâ ǂkhari aniron ǀkha hâse tamas ka io ǃupun ai ǂnôase hō, ots ge aniron di îsa aniron hoan ǀkha ū tide. 7 ǂKhari anironats ge a ūbasen ǁkhā, xawets ge ǁîn îsa nî ǁnāxū, îs ǁkhanabē; o-i ge sats ǀkha ǃgâise ǃgû tsîts ge ǂomxa ǁaeba nî ûi.
8 “Omsats ga om, ots ge oms ǂamǃnâba ǁkhaeb ǀkha nî omǂnami. Ots ge khoe-i ga sa oms ǂamǃnâba xu ǁnā tsî ǁō, o ǀhapixa tide.
9 “Tā draibeǃhanabats ǂgā hâpa ǀkhara ǃhanaǂûn di ǃkhomna ǂgā. ǁNātits ga dī, on ge draibeǃhanab ǂûn tsî nau ǃhanaǂûn hîats ǂgāǁae-ū hân hoana sîsenūsa mā-amsa tama hâ.
10 “Tā gomab tsî dâukib tsîkha ǀguipa ǃgao-ūdas ǃnâ ǂgāǃaoǀhao.
11 “Tā sara-i hîa gūǀûn tsî tsaura lapin tsîna xu ǂomǀhaosa-e ana.
12 “Tsuriga sadu saran ǂomamǃgâgu di haka ǁhôadi ai ǂommâi.
Sorosi ǁgoe-ūgus di ǃanusib ǂhanumādi
13 “Khoeb ga khoesa ǃgame tsî ǁîsab ga sorosise ǁgoe-ūs khaoǃgâ, ǃaruǀî ǂgao tama i, 14 tsî ǁîsa ǂhumiǂgā-amo: ‘Nē taras ge ǁîm ge ǃgame, o ge oaxae tama hâ i.’
15 “O ra ge ǀgôas di îra kharob di ǃgamelapib, ǀaoǂnaode ūhâb, ǀgôas ge oaxae i ǃkhaisa ra ǁgauǂuiba ū tsî ǃās di ǂgaeǂgui-aogu, ǃās ǂgâ-ams tawa ǁhōga ǀgoraǃgâs ǃaroma hâgu tawa nî sī-ū. 16 ǀGôas di îb ge ǁîgu ǃoa nî mî: ‘Ti ôasa ta ge nē khoeba ǃgameb ǃaroma ge ǁkhaeǁnâ, xaweb ge ǁîba ǁîsa ǃaruǀî ǂgao tama hâ. 17 ǁÎb ge taotaosase ǁîsa ǂhumiǂgā-am tsî ǁîsab ge ǃgame os ge ǁîsa oaxae tama hâ i ti ra mî. Xawe nēs ge ti ôas ge oaxae i ǃkhais di ǁgauǁgausa; kō re, ǀaoǂnaodi hîa nē ǃgamelapib, ǁîra kharob dib ai hâde!’ 18 O gu ge ǃās di ǂgaeǂgui-aoga khoeba ǃkhō tsî ǃnabas ǀkha nî ǂnau. 19 ǁÎgu ge ǁîba ǀguikaidisi ǀhaiǀurimaride ǁkharab ase nî ǁgui-ai, tsîs ge nē marisa ǀgôas di îba nî māhe, ǁnā khoeb ge ǂkhaba tsî taotaosa ǀonsa Israelǁî tarekhoes ai ǃaroma xui-ao. ǁÎs ge ǃaruǀî ǁîb di tarase ǁîb ûi hâs kōse nî hâ, tsîb ge ǁîsa tātsēs tsîna ǀgoraxū tide.
20 “Xawe i ga khoeb ra mîsa ama tsî ǁîs ge oaxae ǃkhais di ǁgauǁgau-e a ǀkhai, 21 o gu ge ǃās di ǂgaeǂgui-aoga ǀgôasa ǁîs îb oms di ǂgâ-ams tawa nî sī-ū tsî gu ge ǁîs ǃās di aorekhoegu hoaga ǁîsa nî ǀuiǁhomǃan. ǁÎs ge ganupes ǃgame tama hâ hîa ǁîs îb di oms ǃnâ sorosise ǁgoe, amagas ge ǁîsa sida khoen ai taotaosasiba nî hā-ū. Nē ǀgaus ai ǀgui du ge nēti ī ǂkhababa sadu ǁaeguba xu nî ǀariǂui.
22 “Khoeb ga ǀnî aob di taras ǀkhab sorosise ǁgoe hîa a ǃkhōhe, o ra ge ǁîb tsî ǁnā taras tsîra hoara nî ǃgamhe. Nē ǀgaus ai ǀgui du ge nēti ī ǂkhababa Israelǁîn ǁaeguba xu nî ǀariǂui.
23 “Khoeb ga ǀnî khoeb xa ǂnûiǃomhe hâ oaxaesa ǃās ǃnâ ǀhao-ū tsî ǁîs ǀkha sorosise ǁgoe, 24 o ǁîra ǃās ǃauga ǂoa-ū, î ǀuiǁhomǃan. Khoes ge ǃās ǃnâs ge huib ǃaroma ǃau tama hâ i ǃkhais ǃaroma nî ǃgamhe, tsî khoeba ǁîb ǀgūkhoeb ge ǂnûiǃom khoes ǀkhab ge sorosise ǁgoe xui-ao. Nē ǀgaus ai ǀgui du ge nēti ī ǂkhababa sadu ǁaeguba xu nî ǀariǂui.
25 “Khoeb ga ǃgarob ǃnâ ǀnî khoeb xa ǂnûiǃomhe hâ oaxaesa ǀhao-ū tsî ǁîsa ǀgaiǃkhō, ob ge ǁnā khoeb ǁîsa ge ǀgaiǃkhōb ǀguiba nî ǃgamhe. 26 Khoes ge ǁōb ǁkharaba anu hâ ǁore-es dī tama xui-ao xū-i xare-e dīhe tide. Nēs ǁîb ǀgūkhoeba ra ǁnāǂam tsî ǃgam khoeb di ǂkhabadīb ǁkhāb ǀkha a ǀgui xui-ao. 27 Khoeb ge ǀnî khoeb xa ǂnûiǃomhe hâ khoesa ǃgarob ǃnâ ǀgaiǃkhō, tsî huib ǃaromas ǃau, xawes ge ǁnâuhe ǁoa i xui-ao.
28 “Khoeb ga oaxaes hîa ǂnûiǃomhe tamasa ǀhao-ū tsî ǁîsab ra ǀgaiǃkhō hîa ǃkhōhe, 29 ob ge ǁnāti ī khoeba oaxaes di îba korodisi ǀhaiǀurimaride ǃgamemaris ase nî matare, ǁîsab ge ǀgaiǃkhō xui-ao. ǁÎb ge ǁîsa ûib hâs kōse tātsēs tsîna ǀgoraxū tide.
30 “ǀGôab ge ǁîb îb di tara ge is ǀkha ǃgame tide; tsîb ge ǁkhāti ǀgôaba ǁîb îb di tara-i ǀkha sorosise ǁgoe tide.
© Khoekhoegowab Elobmîs © Bible Society in Namibia, 2020.
