ǃGamao-i ǂansa tama ǁōgu
1 “ǃKhūb sadu Elob nî mā du ǃhūb, ūbasen du nîseb ǃnâ i ga khoe-e ǃgarob ǃnâ ǃgamhe hâse hōhe, tsî du ga ǀū tari-i ǁî-e ge ǃgamsa, 2 o gu ge sadu ǂgaeǂgui-aogu tsî ǀgoraǃgâ-aogu tsîga ǁnā khoe-i ge ǃgamhe ǃkhais tawa sī tsî ǁnāpa xu ǀgūse ǁgoe ǃādi hoadi di ǃnūsiba nî ǀnōǁnâ. 3 ǁNās khaoǃgâ gu ge soros ǀgūse ǁgoe ǃās di ǂgaeǂgui-aoga tranutsâus noxopas tsîna ge ǂgaeǃaohe tama hâ isa nî ôaǂui. 4 ǁÎgu ge tranutsâusa tātsēs tsîna dâuǀû tama ǁgamǃāb ǀgūse ǁgoe ǃkhais, tātsēs tsîna ge ǃgaohe tamas ga io ǃhana-aihe tama hâ is tawa sī-ū, tsî ǁnāpa ǃaos âsa nî khôa. 5 Leviǁî pristergu ǃKhūb sadu Elob xa ǁîba nî ǃoabase ge mâihegu ge ǁnāpa ǃKhūb di ǀons ǃnâ ǀkhae tsî mâ ǂkhaba ǁhō-i hoa-e nî ǀgoraǃgâse nî sī. 6 ǁNās khaoǃgâ gu ge ǁō hâ soros ǀgūse ǁgoe ǃās di ǂgaeǂgui-aoga, ǃaos âsa ge khôahe tranutsâus ǀgapika ǃomgu âga ǁā, 7 tsî nî mîmâi: ‘Sige ge nē khoe-e ǃgam tama hâ tsî ǁkhāti mû tama hâ tari-i ge ǁî-e ǃgam ǃkhais tsîna. 8 ǃKhūtse, sa khoen, Israelǁaes hîats ge Egipteba xu a ǃnoraǃnorasa ǀûba re, îb tā ǀhapio ǀaob hîa ge ǂnâxūheba ǁîn ǃoagu hâ.’ 9 ǁNā-amaga, ǃKhūb mûǁae a ǃgâi xūn hoana du ga dī, o du ǀhapio ǀaob hîa ge sadu ǁaegu ǂnâxūheba xu nî ǃnoraǃnorahe.
Torob ǃkhōsabedi nî ûi-ūhe ǀgaub
10 “Toroba du ga ǃkham tsîb ga ǃKhūb sadu Eloba sadu khākhoena ǃkhōsaben ase sadu ǃomgu ǃnâ a māǁnâ, 11 ob ge sago ǀguiba îsa khoesa mû tsî ǁîs xa ǃgâibahe tsî ǁîsa nî ǃgame ǂgao. 12 ǁÎsa sa oms tawa ǀkhī-ū, îs ǁnāpa ǁîs danaǀûn tsî ǃomkha ǁgoron tsîna ǂkhomǁnâ, 13 tsî ǃkhō-ūhes ge hâ i sarana ǁhû tsî ǀkhara sarana ana. ǁÎs ge sa oms ǃnâ hâ tsî ǁkhâb ǁaeba ǁîs îra ǃaroma nî ǃoa. ǁNās khaoǃgâts ge ǁîs ǀkha sorosise ǁgoe tsî ǁîsa a ǃgame ǁkhā. 14 ǁÎsats ga ega ǂgao tama i, ots ge ǁîsa nî ǃnoraǃnora, îs ǂgaos ra ǃkhai-i hoa-i ǁga ǃgû. ǁÎs mā-ams osets ge ǁîsa sorosise ǁgoe-ū xui-aots ge ǁîsa khobodī tsî ǁamaxū tide.
ǂGuroǃnaesab ǀumis
15 “Aob ga ǀgam tarara ūhâ, ǀguis hîab a kaise ǀnams tsî naus hîab ǁnātikōse ǀnam tamas tsîra, tsî ra ga hoara, mâs hoasa ǀgôaba ǁora, tsîb ga kaiseb ǀnam tama taras di ǀgôaba a ǂguroǃnaesa; 16 ob ge aoba ǀumisab ga ǀgoraǂuio, kaiseb a ǀnam taras di ǀgôaba kaiseb ǀnam tama taras di ǂguroǃnaesab ǃgâ-ai ǁhûiǂui tsî ǁîb di ǃâs ǀumis disa mā tide. 17 ǁÎb ge ǂguroǃnaesab a ǃkhais di ǂanǃgâs ase, kaiseb ǀnam tama taras di ǀgôaba ǀgamǃnâgu ǃâs ǀumis disa nî mā. ǁÎb ge aob di ǂguro ǀgaiba tsî ǁnā-amaga ǂguroǃnaesab ase a anu.
ǁNâuǀnamoǃnâ ǀgôab
18 “Khoe-i ga ǁîb di îra xab ra ǁnamahe, xawe ǃnâudanaxasib tsî khâikhâisenxa ǀgôab, ǁîb îra ǁnâuǀnam tamaba ūhâo, 19 o ra ge ǁîba ǃās di ǂgaeǂgui-aogu tawa, ǁnâuǃgâheb nîse ǃās di ǂgâ-ams tawa nî sī-ū. 20 ǁÎb di îra ge ǁîgu ǃoa nî mî: ‘Nē ǀgôab sim dib ge ǃnâudanaxa tsî a khâikhâisenxa. ǁÎb ge a ǁnâuǀnamoǃnâ, mariba ra ǁoreǂui tsî a ǀhorosema.’ 21 O gu ge ǃās di aorekhoegu hoaga ǁîba nî ǀuiǁhomǃan tsî ǁnā ǀgaus ai nēti ī ǂkhababa ǀhûhâsiba xu nî ǀariǂui. Mâ Israelǁî-i hoa-i ge nē ǃnaeǃkhaisa ǁnâu tsî kaise nî ǃao.
ǃKharagagu ǂhanumādi
22 “Khoe-i ga ǂkhabadī-i, ǁōb ǁkharaba anu hâ ǂkhabadīb ǃaroma ǃgamhe tsî soros â-e haib ai ǂgāmâihe, 23 os ge ǁî-i sorosa hoaraga tsuxuba ǁnāpa ǁnāxūhe tide. ǁNā tsēs ǁkhās ais ge sorosa nî ǁkhōhe; Elob ge ǁnā khoe-i hîa ge ǂgāmâihe-e ǀâxarexū xui-ao. Î du tā ǃKhūb sadu Elob ge ūbasen du nîse mā du ǃhūba ǃanuoǃnâ kai.
© Khoekhoegowab Elobmîs © Bible Society in Namibia, 2020.
