ǂGaeǂguiǂgās
1 Nē ǂkhanis ǃnâ di ge Moseb ge hoaraga Israelǁîn ǃoa Jordanǃāb di aiǂoasǀkhāb ai ǁgoe ǃgaroǃhūb ǃnâ ǃhoa mîde xoamâisa. ǁÎn ge Jordanǃgoaǃnāb Sufs ǃoagu, ǀgui ǀkhāb ai Parans tsî nau ǀkhāb ai Tofels, Labans, Haserots tsî Disahabs tsîdi ǁaegu ǁgoeb tawa ge hâ i. 2 (Sinaiǃhomma xu ǃhomxa ǃhūb Edommi dib ǃnâ-u Kades-Barneas ǁga ǃgûs ge disiǀguiǀa tsēdi ǀguide gere ū.) 3 Moseb ge ǂguro tsēs disiǀguiǀaǁî ǁkhâb dis ai, hakadisiǁî kurib ǃnâ, Israelǁîn ge Egipteba xu ǃnoraǃnorahes khaoǃgâ ǁîna ǃKhūb ge mîmā bi xūn hoana ge mîba. 4 Nēs ge Moseb ge Amorǁîn di gao-aob, Sihonni Hesbons dib tsî gao-aob Ogi Basans dib, Astarots tsî Edreis tsîra ai gere hâb tsîkha ǃkhamdans khaoǃgâsa. 5 Jordanǃāb di aiǂoasǀkhāb, Moab ǀkharib ǃnân Israelǁîna hâ hîa ge is ge Moseb ge ǁîna Elob mîmādi tsî ǁkhāǁkhādi tsîde ǁguiǃābatsoatsoasa.
ǁÎb ge ge mî: 6 “Sinaiǃhommi tawa da ge hâ i, ob ge ǃKhūba sada ǃoa ge mî: ‘ǂÂu hâ kōse du ge nē ǃhommi tawa go hâ. 7 Sadu hâǃkhaiba khôakhâi, î aisǀkhāb ǁga ǃgû. Amorǁîn di ǃhomxa ǃhūb tsî ǁîb ǂnamipe ǁgoe ǀkharigu ǃoa: Jordanǃgoaǃnāb ǃoa, ǃhomxa ǃhūb tsî ǃgoaǃnāb ǃoa, ǃkhawagasǀkhāb di ǀkharib tsî Mediteraneahuri-ammi kōse. Nēb ge Kanaanǃhūba, Libanonǃhomgu nau ǀkhāba xu Eufratǃāb kōse ra sība. 8 Nē ǃkhaigu hoagab ge ǃKhūba sadu aboxagu Abrahammi, Isaki tsî Jakob hâgu tsî ǁîgu suriba māsa ge mîmâiba. ǃGû, î nē ǃhūba ūbasen tsî sī ǁanǃnâ.’ ”
Moseb ge ǀgoraǃgâ-aoga ra ǁgaumâi
(Eksodus 18:13-27)9 Moseb ge khoena ge mîba: “Sinaiǃhommi tawa da hâ hîa ta ge ge mîba du: ‘Sado ǂgaeǂguis di ǃereams ge a kai, tsî ta ge ǁnāsa ǀguri a dīǁoa. 10 ǃKhūb sadu Elob ge sado ǀhommi di ǀgamiron a ǂgui khami ge ǂguiǂgui. 11 Ab ǃKhūb sadu aboxagu di Eloba ǀguiǀoadisi ǃnādi xa ǃnāsase ǂguiǂgui du tsî ǁîb ge mîmâise ǀkhae du! 12 Xawe mâti ta sadu ǁhōga ǀgoraǃgâs ǃaroma ǀguri ǃereamsa nî tani? 13 Mâ ǃhaos hoasa xu gā-ai, ǁnâuǃāxa tsî ǂansa ūhâ aoga ǁhûi, î ta ǁîga sadu ǂama ǃereamsa mā.’ 14 Tsî sadu ge nēs xa ge ǃgâibahe. 15 ǁNā-amaga ta ge gā-ai tsî ǂansa ūhâ aogu, sadu ǃhaode xu du ge ǁhûiga, sadu ǂama ǃereamsa ge mā. ǀNîgu ge ǀoadisi khoen ai, ǀnîga kaidisi khoen ai, ǀnîga korodisi khoen ai tsî ǀnîga disi khoen ǂama ǃereamsa ge ūhâ i. ǀNîga ta ge ǃhaodi ī khami xoa-aose ge ǂgaimâi.
16 “ǁNā ǁaeb ai ta ge ǀgoraǃgâ-aoga ge mîmā: ‘Sadu khoen ǁaegu hâ ǂnoagude ǃgâ re. Hoa ǂnoagu-aina ǂhanu-aise ǀgoraǃgâ, nēsi i ga sago khoen ǂûna xu hâs tamas ka io ǃhaokhoen, sadu ǁaegu ǁan hâna xu hâ xawe. 17 Tā sago ǀgoraǃgâdi ǃnâ ǀkhāǁhûi; mâ-i hoa-e ǀguitikōse ǀgoraǃgâ, tari-i ǀgui-i ka xawe. Tā khoe-i xare-e ǃao, sago ra ū mîǁguigu Eloba xu ra hā xuige. Xawe i ga ǁhō-e ǃgomba go, o tita tawa hā-ū, î ta tita mîǁguisa dī.’ 18 ǁNā ǁaeb ǁkhāb ai ta ge taren hoana go nî dīsa ge mîmā go.
ǀHôagao ǃkhē-aogu ge ra sîhe
(Numeri 13:1-33)19 “ǃKhūb sada Elob ge mîmā da khami dī tsî da ge Sinaiǃhomma xu kai tsî ǃaoǃaosa ǃgaroǃhūb ǃnâ-u Amorǁîn di ǃhomxa ǃhūb ǁga ge ǃgû. Kades-Barneas tawa da ge sī, 20-21 o ta ge ge mî: ‘Amorǁîn di ǃhomxa ǃhūb, ǃKhūb sada Elob, sada aboxagu di Elob ge mā dab tawa da ge go hā. Mû, ǁnāb ge ǁîba. ǁÎb ge mîmā khami ǁîba ūbasen î ǁanǃnâ. Tā ǃao tamas ka io îganǀgē.’
22 “Xawe du ge sado tita tawa hā tsî ge mî: ‘A da aoga sada aiǃâ sî, ǃhūba nî sī ǃkhēǂuiǃnâse, î gu mâb a ǂhanu dao ǁîba da nî ǁhûise tsî mâti-ī ǃādi ǁnāpa hâs tsîna sī ǀhôagaose ôaǃnâǂui.’
23 “Tita ge ǁnā aoǁguib xa ǃgâibahe tsî ǁnā-amaga disiǀgamǀa aoga, ǀguiba mâ ǃhaos hoasa xu ge ǁhûiǂui. 24 ǁÎgu ge ǃhomxa ǃhūb ǃoa ǃgûǃapa tsî Eskolǃgoaǃnāb tawa sī tsî ǁîba ge ǃkhēǂuiǃnâ. 25 ǁÎgu ge ǀnî ǂûn ǁnā ǃhūb din ǀkha oahā tsî ǃKhūb sada Elob ge ǂûtanixa ǃhūba mā da ǃkhaisa ge ǃnuri.
26 “Xawe go ge sago ǃKhūb sago Elob di mîmās ǃoagu khâikhâisen, tsî ǁnā ǃhūb ǃnâ ǂgâ ǂgao tama ge i. 27 Sadu tentomdi ǃnâ du ge ǂkhîoǃnâ tsî gere mîǀîgu: ‘ǃKhūb ge sadab a ǃhuisa xui-ao, sada Egipteba xu ǂgaeǂguiǂui tsî Amorǁîn ǃomǁae, ǁîn xa da nî hîkākāhese ge māǁnâ. 28 Mâǀî da kha ra ǃgû? Sida ge ra ǃao. Aogu hîa da ge sîgu ge ǁnāpa hâ khoen a sida xa ǀgaisa tsî kaikara tsîn ǁîna ǀhommi kōse ǀgapi ǂnubiǂgoagu ǀkha omǂnamisa ǃādi ǃnâ ra hâsa ge mîba da. ǁÎgu ge Anakǁîn suriba xu hâ kaikara khoen tsîna ǁnāpa ge mû!’
29 “Xawe ta ge ge mî: ‘Tā ǁnā khoen xa ǃao tamas ka io ǃhuri. 30 ǃKhūb sadu Elob ge Egipteb ǃnâb ge sadu mûǁae dī khami, sadu aiǃâ ǃgû tsî nî ǃkhamba du. 31 ǁKhāti du ge ǃgaroǃhūb ǃnâ ge mû, mâ ǀgaus aib ǃKhūb sadu Eloba nē ǃkhais kōse sâu du tsî ge tani dusa, ǁgûb ra ǁîb di ǀgôaba sâu tsî tani khami.’ 32 Xawe tare-i ǀgui-e ta ga mî, xawe du kom ǃKhūb sadu Eloba ǂgomǃgâ tama ge i, 33 ǁîb gere hoaǁae sadu aiǃâ ǃgû tsî hâǃkhaiba du nî ǂnaumâi-ai ǃkhaiba sī ǂhomiba du hîa. Sado daoba ǁgaus ǃaromab ge ǃKhūba sadu aiǃâ, tsēa kai ǃâus ǀkha tsî tsuxub ǃnâ khau ra ǀaes ǀkha gere ǂgaeǂgui du.
ǃKhūb ge Israelǁîna ra ǁkhara
(Numeri 14:20-45)34 “ǃKhūb ge sadu ǂkhîoǃnâsibab ge ǁnâu, o ǁaixa tsî ge mîmâi: 35 ‘ǀGui-i sadu di-i, nē ǂkhaba suriba xu hâ-i tsîn ge sadu aboxaga ta ge mîmâiba ǂûtanixa ǃhūb ǃnâ ǂgâ tide. 36 Jefuneb ôab, Kaleb ǀguib ge ǁnā ǃhūb ǃnâ nî ǂgâ. ǁÎb ge ǂgomǂgomsa i xui-ao ta ge ǁîb tsî ǁîb di surib tsîna ǁîb ge sī mû ǃhūǃâsa nî mā.’ 37 Sadu ǃaromas ge ǃKhūb ge tita tsîn ǀkha ǁaixa tsî mîsa: ‘Mosetse, sats tsîn ge Kanaanǃhūba ǂgâǃnâ tide. 38 Xawe sa hui-aob, Nunni ôab, Josuab ge ǁnāpa nî ǂgâ. ǁÎb ge Israelǁaesa Kanaanǃhūban nî sī ūbasen tsî ǁanǃnâse nî ǂgaeǂguiǂgâ, ǁnā-amagats ge ǁîba ǁnās ǃoa nî ǂgaoǂgaoǃnâ.’
39 “Ob ge ǃKhūba hoada ǃoa ge mî: ‘Sadu ǀgôaron hîa noxopa ǃgâi-i tsî tsū-i ǁaegu ǀgorasa a dī ǁoan hoan, sadu khākhoen xa nî ǃkhōsis ǃnâ ūhe, ti du gere mîn, ge ǁnā ǃhūb ǃnâ nî ǂgâ. Tita ge ǁîna ǁnā ǃhūba nî mā tsîn ge ǁîna ǁîba nî ūbasen. 40 Xawe sado dabasen î, du ǃgaroǃhūb ǃnâ-u ǀApahurib ǀkhāb ǁga ǃgû.’
41 “Sadu ge ge ǃeream: ‘Mosetse, ǃKhūb ǃoagu da ge go ǁore! Xawe da ge ǃgûǂoa tsî sida ǃKhūb tsî Elob ge mîmā da khami nî sī ǃkham.’ Mâ khoe-i hoa-i ge ǁâtanisen tsî supuse i ǃhomxa ǃhūba nî ǁnāǂam ti ge ǂâi.
42 “Xaweb ge ǃKhūba tita ǃoa ge mî: ‘ǁÎna mîba în tā ǃkhamǃgû, tita ǁîn tawa hâ tide, tsîn ǁîn khākhoen xa nî danhe xuige.’ 43 ǃKhūb ge mî ǀgauba ta ge ge mîba du, xawe du ge ǁnâu ǂgao tama i, tsî ǃKhūb di mîmās ǃoagu khâikhâisen tsî ǃhomxa ǃhūb ǁga ge ǃgû. 44 Xawen ge Amorǁîn ǃhomxa ǃhūb ǃnâ ge ǁan hâ ina ǃhabun di ǂhoms khami sado ǂnû-ai tsî Edomsa xu Hormas kōse sauruǀgaruǀgaru tsî ge hîkākā. 45 ǁNās khaoǃgâ du ge ǃKhūb ǃoa, huib ǃaroma ge ǂgai, xaweb ge ǁîba ǃgâ du ǂgao tama i tsî ǂâi-i tsîna sadu ai ǂnûi tama ge i.
Kadesa xu Arnons kōse
46 “ǁNā ǀgaub ai da ge gaxu ǁaeba Kades tawa ge hâ.”
© Khoekhoegowab Elobmîs © Bible Society in Namibia, 2020.
