1 Jerusalemse, sa ǃoab tsî ǁgâiǀāb ǃnâs ge ana hâ i sarana ǂgaeǂui î ǀamo îsasib Elob ǂkhaisib dib ǀkha anasen. 2 Elob di anaǂamsarab ǂhanu-aisib diba ana, î krons ǁîb di ǀamo ǂkhaisib disa ǀgapa. 3 Elob sa ǂkhaisiba ǃhūbaib ai hâ ǁaedi hoade nî ǁgau amaga. 4 Tsîb ge ǀamose nē ǀasa ǀonsa nî mā si: “ǂKhîb ǂhanu-aisib dib tsî ǂkhaisib eloǃaoǃgâsib dib.”
5 Jerusalemse khâi, ǃhommi ai mâ, î aiǂoas ǃoa kō, î mâtib Elob ǃAnuba sa ôana aiǂoas tsî huriǂoasa xu ra ǀhaoǀhao ǃkhaisa mû. ǁÎn ge Elob xan ǂâis ǃnâ ūhe hâ ǃkhais xa gere ǃgâiaǂgao. 6 Jerusalemse, sa ôan ge ǁîn khākhoen xa ǂgaeǂguibēhe on ge ǀnūǃgû tsî sasa ǀguri ge ǁnāxū, xaweb ge Eloba ǁîna kai ǃgôasib ǀkha gao-aon trondi ai tanihe hân ase sa ǃoa ra oahā-ū. 7 Elob ge mâ ǀgapi ǃhommi hoab tsî ǀamo ǃnâugu tsîn nî ǂamǂamhe ǃkhaisa ge mîmā. ǁÎb ge mâ ǃgoaǃnāb nî ǀoaǀoahe tsî ǃhūba ǂhauǂhauhe ǃkhaisa Israelǁaes nî Elob ǂkhaisa ǃnâb ǃnâ ǃnorasase ǁaruhāse ge mîmā. 8 Elob di mîmās ai di ge mâ haiǀgoms tsî ǃgâise ra ham haidi hoade Israelǁîna somma nî mā, 9 Elob Israelǁîna ǁgâus ǃoa nî ǂgaeǂgui xui-ao. ǁÎn ge kai ǃgâiaǂgaob ǀkha ǁîb ǀkhommi tsî ǂhanu-aisib xa ǂgaeǂguihe tsî ǁîb di ǂkhaisa ǃnâb ǃnâ nî oahā.
© Khoekhoegowab Elobmîs © Bible Society in Namibia, 2020.
