1 Gā-aisib ge Elob mîmādi di ǂkhani, ǂhanub hîa nî ǀamose hâba. Hoan hîa ǁîs ai ra ǃkhōǀgaipen ge nî ûi, xawe ǁnān ǁîsa ra aoxūn ge nî ǁō. 2 Israelǁîdo, Gā-aisib tawa ǂgaeǂguisa ôa, î ǁîs di ǀapemāsa sao, î ǀkhâuǂoa ra ǃnâb ǁîs dib ǃoa ǃgû re. 3 Tā sada ǂkhaisiba ǀnî khoe-i tamas ka io ǃhaokhoena mā. 4 Sida ge hūs di khoeda tare-i xab Eloba ra ǂkhîǂkhîhe ǃkhaisa a ǂan da; mâtikōse da sida Israelǁîda ǃgâiǃgâxa.
Jerusalems di ǁkhaeǂgaob
5 ǁKhoaǂgaosiba ūhâ ti khoedo, sadu Israelǁaes ǀonsa ûitsamase nî ūhâdo. 6 Elob ge sado khākhoen xa du nî hîkākāhese māǁnâ tama hâ xawe du ge ǁîn ai ge māǁnâhe Eloba du ge ǁaiǁai amaga. 7 Elob, ǁîb sado ge kuruba du ǁguiba tama xūna du ga ǀnî elona ǁguiba, o du ge ǁîba ra ǁaiǁai. 8 Sadu ge ǀAmosib di Elob, sado ge kaikaiba ǀuru tsî ǁnā ǀgaus ai Jerusalems, sado ge ǁgûse ība isa ge ǃoa kai. 9 Jerusalems ge mû Elob ra ǁaib âb ǃnâ ǁkhara du ǃkhaisa, os ge ǀgūse ǁgoe ǃādi ǃoa ge mî: “Elob ge ti ǂama hā-ū ǃoaba kō re. 10 Tita ge ti ôan ge ǃkhōsis ǃnâ ūhe ǀgausa ge mû. ǀAmosib ge ǁnāsa ǁîn ai ge hā-ū. 11 Ti ôana ta ge kai ǃgâiaǂgaob ǀkha kaikai, xawe ta ge āb tsî ǃoab ǀkha ǁîna ge sîbē. 12 Tā-i khoe-i xare-e ti tsâb ǃoatara ta a tsî ǂgui ǀgôan tita xu ūbēhe hâ ǃkhais dib ǃnâ ǃgâiǃgâibasensa ūhâ. Ti ôan ge Elob ǂhanuba xu tsîn ge ǁîn ǁorena tita ǃū-aisa ǃāse ge dī. 13 ǁÎn ge ǃgôasi-e ǁîb mîmāde ūhâba tama i tsî ǁîdi ǃoa ge ûi tama hâ i tsî ǁîb ǂhanu-aisib daob ǃnâ ǃgûsa ge ǂkhā.
14 “ǀGūse ǁgoe ǃāso hoasa, hā î mâtib ǀAmosib di Eloba ti ôana ǃhūsis ǃnâ ge sîǂgā ǃkhaisa mû re. 15 ǁÎb ge ǃnūseba xu ǁîn ǃoagu tao-oǃnâ ǁae-i, ǃhaogowa-e ǃhoa, kaikhoena ǃgôasi-e ūhâba tama i tsî ǀgôana ǀkhom tama-e ge hā-ū. 16 Nē ǁaes ge ti ǀnam ǀgôaga tita xu ge ūbē tsî ta ge hoaragase ǀguri ge ǃgau.
17 “Ti ôadu ǃhūsis ǃnâ hâdo, mâti ta a hui du ǁkhā? 18 ǁNāb hîa nē ǁkharaba ge ǁgui-ai dub ǀguib ge khākhoen âdo xu a ore ǁkhā. 19 Ti ôado, sadu ûib ǀkha aiǃgû re, tita ǃū-aisase xūhe hâ xuige. 20 ǂKhîb di tsēdi ǃnâ ta ge ana hâ i sarana ǂgaeǂui tsî ta ge ǃoab sarana ge ana. Ûi ta hâs kōse ta ge ǀAmosib ǃoa, huib ǃaroma nî ǂgaiǂui.
21 “ǁKhoaǂgaosiba ūhâ ti ôado, î Elob ǃoa huib ǃaroma ǂgaiǂui. ǁÎb ge sadu khākhoen di ǁgâiǀāb tsî ǀgaiba xu nî huiǂui. 22 Ti ǃâubasens sadob nî huiǂuis disa ta ge ǀAmosib ǃnâ ge mâi. ǁNāb ǃAnub, sadu ǃGâiǃōdī-aob ge sado ǃhaese ǀkhomxas ǀkha tita nî ǂkhîǂkhî. 23 Tita ge sadu ge ūbēheo, ā tsî gere ǃoa, xawe Elob ge sado oahā-ū tsî tita ǀamose nî ǃgâiaǂgao kai. 24 ǀGūse ǁgoe ǃādi khoen ge sadu ge ǃkhōsis ǃnâ ūhe ǀgausa mûs ǁkhās khamin ge ǁîna ǃhae ǁaeb ǃnâ sadu ra ǀAmosib xa kai ǃgôasib tsî ǂkhaisib ǃnâ orehe ǀgausa nî mû. 25 Ti ôado, Elob di ǁkharaba ǃnūǃnâxasib ǀkha tani re. Sadu khākhoen ge sado ge ǃgôaǃgon, xawe du ge ǃhae ǁaeb ǃnâ ǁîna hîkākāhe hâse nî mû tsî du ge ǀgaiba ǁîn ǂama nî ūhâ. 26 Ti ôan, tita xa ge ǀnammi ǀkha kaikaihen ge ǀkhora daoga ge sao tsî gūn hîa khākhoe-i di ǁnāǂams ǃnâ ra ǂgaeǂguibēhen khami ī.
27 “ǁKhoaǂgaosiba ūhâ ti ôado, î Elob ǃoa huib ǃaroma ǂgaiǂui. ǁÎb ge ǁkhara dub ge xawe ǀuru du tide. 28 Sadu tsîn ge Eloba xu du nî dabasen ǃkhaisa ǂâibasen hâ i khami du ge nēsi dabasen tsî ǁîba disi ǃnāde ǃnāsa ǀaexasib ǀkha nî ǃoaba. 29 ǁKhā Elob hîa ge nē tsūǀkhāgu ǀkha ǁkhara dub ge ore tsî ǀamo ǃgâiaǂgaoba nî mā du.”
Jerusalems huib ge ra ǁapoǁapohe
30 ǁKhoaǂgaosiba ūhâ Jerusalemse. Elob hîa ge ǀonsa mâsib ge nî ǁkhaeǂgaoba hā-ūba si. 31 Tsūǀkhāb ge ǁnān sasa tsūse sîsenū tsî sas ge hîkākāhe, o gere ǃgâiaǂgaon ǂama nî hā. 32 Tsūǀkhāb ge ǁnā ǃādi sa ôana ge khobodīdi ai nî hā. Tsūǀkhāb ge Babilons, sa ôana ge ūsa nî hāǂam. 33 ǁNā ǃās ge sadu di ǁnās tsî hîkākāhes ǂamas gere ǃgâiaǂgaos ǁkhās khami, nēsi ǁîs hîkākāhes xa nî ǃoa kaihe. 34 Tita ge ǁîs di ǂgui khoesib âs ǀkha koasensa ǃoab ǃnâ nî ǀkharaǀkhara 35 ǀAmosib ge ǀaes, ǂgui tsēde nî khausa ǁîs ai nî hā kai tsî gu ge ǁgâuaga ǂomxa ǁae-e ǁîs ǃnâ nî ǁan. 36 Jerusalemse aiǂoas ǃoa kō, î Eloba xu sa ǃoa ǃgoaxa ǃgâiaǂgaoba mû re. 37 Mû, sa ôan sasa xu ge ūhen ge ǁaruǃgoaxa. ǁÎn ge aiǂoas tsî huriǂoasa xu Elob hîa ǃAnub di mîs ǃoa ǀhaoǀhaohe tsî nēsi Elob ǂkhaisib ǃnâ ra ǃgâiaǂgao.
© Khoekhoegowab Elobmîs © Bible Society in Namibia, 2020.
