Barux 3 - Khoekhoegowab New Translation 2020 (KKG20)

1 “ǃKhū Hoaǀgaixats, Israelǁaes di Elotse, sida ge tsau tsî ǂkhabu hâ ǂgaogu ǀkha huib ǃaroma sa ǃoa ra ā. 2 Sida ǀgorede ǁnâu-am î ǀkhomxa da re, sa mûǁae da ge ǃgâi tama xūna dī xuige. 3 Sats ge ǀamose gao-aose ra ǂgaeǂgui, xawe sida ge ǁō tsî ǀamose ra kā. 4 ǃKhū, Hoaǀgaixa Elots Israels ditse, sida ǀgoresa ǁnâu-am re. Sida aboxagu ge sats ǃKhūts, ǁîgu Elots ǃoagu ǁore tsî satsa ǁnâuǀnamsa ge ǂkhā tsî da ge sida ǁîgu ǁoren xa ǃaromahe hâse nētse ǃgomma ra tsâ. 5 Sida aboxagu ge ǃkharu ge ǁaeb ǃnâ dī ǁorena ǀuru, xawe nēti-ī ǁaeb ǃnâ sa ǂhunuma ǀgaib tsî ǂanǂansasib xa ǀgui ǂâi re. 6 Sats ǀguits a sida ǃKhū tsî Elo tsî da ge nî kare tsi. 7 Sats ge kai ǃaoǃgâba sida ǂgaogu ǃnâ sa ǃoa da nî huib ǃaroma dawasense ge ǂgā. Nē ǃhūb hîa da ǃhūsis ǃnâ hâb ǃnâ da ge satsa nî kare. Sida ge hoa ǂkhaba xūn sida aboxagu gere dīna dīǀû amaga. 8 Sats ge ǁaedi ǁaegu ge ǀgaruǀgaru da tsîts ge ǁîna sida ǃharaxū tsî ge ǀâxare kai. Sats ge sida aboxagu di ǁoren ǃaroma, ǁîgu ge sats ǃKhūts, sida Elotsa mâǃoa xui-ao sida ge ǁkhara.”

Xoa-aob ge Elob gā-aisiba ra koa

9 Israelǁîdo, Elob di mîmāde ǃgâ re. ǁÎdi ge sado ǀoasa tsî ǃgâi ûib ǃoa ǂgaeǂgui tsî gā-aisib ra tare-e ǂâibasen ǃkhaisa ra ǁgau. 10 Tare-i ǃaroma du kha Israelǁîdo, sadu khākhoen di ǃhūb ǃnâ hâ? Tare-i ǃaroma du kha ǃhao ǃhūb ǃnâ ge kaira? Sadu ge ǃKhūba ǀgoreǀîsa anu tama hâ tsî du ge ǁō hâ soro-i khami a ǃanuoǃnâ. 11 Sadu ge ǀnai ǁō hân ǁaegu ǃgôahe hâ. Tare-i ǃaroma? 12 Sadu ge Elob hîa gā-aisib di ǀauba xu ge dabasen xui-ao. 13 Elob di daob ai du ga ǃgû hâ, o du ge ǂkhîb ǃnâ ǀamose ga ûi hâ. 14 Mapab ǁnâuǃāb, gagasi ǀgaib tsî mûǂgāb tsîna hōhe ǁkhā ǃkhaisa ǁkhāǁkhāsen, o du ge mâpa du nî gaxu tsî ǀoasa ûib tsî ǁkhāti ǃnâb sado nî ǂgaeǂguib tsî ǂkhîb tsîna hō ǃkhaisa nî ǂan. 15 Khoe-e xare Elob ǁîb di gā-aisiba sâu hâ ǃkhaiba hō-i ge, tamas ka io nē ǃgomǀgausa amab sâuhe hâ ǃkhaib ǃnâ ǂgâ-i ge? 16-17 Gaoǀgôagu ǁaedi diga ǀnai Gā-aisib di omsa hō gu ge? ǁNān hîa ǀgurun tsî xamarin tsî ǀhomanina ra ǃaun tsî ǁîn di daoga ǂanna Gā-aisiba hōn ge? ǃNāsa xūna ūhân hîa ǀhaiǀurib tsî ǃhuniǀurib tsîn ǃnâ kai ǂgomǃgâsa ūhân xa mâtis? 18 ǀHaiǀuriǂnau-aogu hîa hoa ǃamkusib tsî sîsenǁkhāsiba ūhâga, Gā-aisib di omsa hō gu ge? 19 Hî-î, ǁÎn hoan ge kā tsî ǁŌhân Hâǃkhaib ǃoa ge ǁgôa. ǀNîn ge ǁîn ǃkhaide nî ǃkhōǃkhunise ge ǃnae. 20 Sao ra surib ge ge ǃnae tsî nē ǃhūbaib ai ǁan hâ, xawen ge ǁîn tsîna ǂans ǃoa hâ daoba hō tama hâ. ǁÎn ge Gā-aisib ǃoa hâ daoba hō tama tsî ǁkhāti ǃkhōǃkhai-e Gā-aisib ai hō tama ge i. 21 ǁÎn di surib tsîn ge ǁkhāti daob Gā-aisib ǃoa garuba hō tama ge i. 22 Kanaanǁîn tsî ǁkhāti Edomǁîn ge tātsē Gā-aisiba hō tama ge hâ i. 23 Hagars di ôananôagub ge hoaraga ǃhūbaib di ǂansan ūhâ ti ǂâi hâ, xawen ge tātsēs tsîna Gā-aisib ra tare-e ǂâibasen ǃkhaisa hōǂui tama hâ. ǁNās ǁkhās ge Merans tsî Temans di ǂharugu-aogu, ǀgarubeǃhoa-aogu tamas ka io xūn di ǂansa ra ôagu ǀkha ge ī. ǀGuib ǁîgu dib tsîn ge ama Gā-aisib ǃoa garu daoba ǁkhāǁkhāsen tama ge hâ i.

24 Israelǁîdo, Elob ge kuru ǀhommi tsî ǁîb di ǁanǃkhaib ge a kai. 25 ǁNāpa i ge mâtikōseb hara tamas ka io ǀgapi ǃkhaisats nî ǀnō ǀgau-e a ǀkhai. 26 ǁAeb ǃkharu hâse gu ge nēpa koahegomxa kaikara khoega ge ǃnae. ǁÎgu ge ǀgapimâ, ǀgaisa tsî torob ǃnâ ǃkhams ǁkhāsiba ge ūhâ i. 27 Xaweb ge Eloba ǁîga ǁîb khoegu ase ǁhûi tamas ka io ǁîga ǂans ǃoa hâ daoba ǁgau tama ge i. 28 ǁÎgu ge ǁnâuǃāb tsî gā-aisiba gu ge ūhâ tama hâ i xui-ao ge ǁōǂoa. 29 ǀGui-i xare-i ge tātsē ǀhommi ǃoa Gā-aisiba nî hōse ǃapa tsî ǃhūbaib ǃoa ǁîba ǁgôaxa-ū tama hâ. 30 ǀGui-i xare-i ge huriba Gā-aisiba nî hōse ǃgâu tsî ǁîba ǃgomǀgausa ǃhuniǀurib ǀkha ǁama ǁkhā tide. 31 ǀGui-i tsîn ge mâti i nî ǁîba hō tamas ka io ǁîb ǃoa garu daoba hōǂuisa ǂan tama.

32 Elob ǀguib ge Gā-aisiba ǂan. Tsîb ge ǁkhāti hoa xūna a ǂan. ǁÎb ge ǁîb ǁnâuǃāb ǀkha Gā-aisiba ge ǂnubi. ǁÎb ge ǃhūbaiba hoa ǁaegu ǃaroma ǂnubi tsî ǃkharagaǃnâgu ûitsama xūn ǀkha ge ǀoaǀoa. 33 Elob ga napaba sîǂui, ob ge ra ǂoa; tsî ǁîbab ga ǂgai-oa, ob ge ǃao tsî ra ǁnâuǀnam. 34 ǀGamirodeb ge ǂgai, o di ge ǁîde ǁkhoase ge ǃeream. ǁÎdi ge ǃkhaidi âde ūǂgā tsî ǃgâiǂgaoxase, ǁîde ge kuruba nî ǂkhî kaise ge ǃnâ. 35 ǁÎb ge a sada Elo tsî i ge ǁîb khami ī-e a ǀkhai. 36 ǁÎb ge ǁnâuǃās ǃoa ra ǂgaeǂgui daoba ǂhaiǂhai tsî Gā-aisiba ǁîb ǃgāb Israeli hîab ǀnamma ge mā. 37 ǁNā ǁaeba xus ge Gā-aisiba ǃhūbaib ǃnâ ǂhai tsî nau ǃhaodi hoadi ǃnâ ge ǂansa.