Barux 2 - Khoekhoegowab New Translation 2020 (KKG20)

1 “ǁNā-amagab ge ǃKhūba ǁîb ǃkhâikhoms, sada tsî sada ǀgoraǃgâ-aogu, Israelǁaesa ra ǀgoraǃgâgu, sada gao-aogu, sada gaoǀgôagu tsî ǀnî khoen Israelǁaes tsî Judab din ǃoagub ge mîsa ge ǁapoǁapo. 2 ǀGui ǃkhai-i ǃhūbaib di-i tsîn ai-i ge ǁnāpa ge ī xūn khami ī xū-e ī tama hâ. ǃKhūb ge Jerusalemsa Moseb ǂhanub ǃnâb ge ǃkhâikhom khami ǃgomse ge ǁkhara 3 tsîn ge khoena ǁîn ôan di ǁgan-e gere ǂû. 4 ǃKhūb ge khoen âda ǀgaruǀgaru tsî sida ǂnamipe hâ khoen ǃomǁae ge māǁnâ. ǁÎn ge sida ǃharaxūb tsî ui-uisasib ǀkha gere ǃgapaǀî. 5 Sida ge ǃKhūb, sida Eloba ǁnâuǀnamsa ǂkhā xui-ao da ge ǁîb ǃoagu ge ǁore. ǁNā-amaga da ge sida di khākhoena da nî dans ǃās ǃnâ ǁîn xa ge danhe.

6 “ǃKhūb sida Elob ge hugaǀgui a ǂhanu-ai, xawe da ge sida tsî sida aboxagu tsîda taosib ǀkha ǃgū-aihe hâ. 7 ǃKhūb ga nēsi ǁîb ge ǃkhâikhom khami ǁkhara da xawes tsîna 8 da ge ǁîb ǃoa dabasen tsî sida ǂkhaba ǂâide nî ǁnāxūse ǀgore tama hâ. 9-10 Sida ge ǁîba ǁnâuǀnam tamas ka io ǁîb ama mîmādi tawa mâ tama hâ, ǁnā-amagab ge ǃKhūba ǁîb ge ǂhomiba da hâ i hoaraga ǁkharaba sida ai ge hā-ū.

Ores ǀgores

11 “ǃKhūtse, Israelǁaes Elotse, sa ǁaesa ǀgaisa ǃommi, saodi tsî buruxa dīn ǀkha Egipteba xu ge ǂgaeǂguiǂuitse. Sats ge sa kai ǀgaiba ge ǁgau tsî ǁnās ǀkhas ge sa ǀonsa nētsēs kōse a ǂansa. 12 ǃKhū sida Elotse, sida ge ǁore, ǂhanu ǀgaub ai ǃoaba tsi tama i tsî sa mîmādi hoade ge ǁnâuǀnamoǃnâ. 13 Xawe ǃaruǀî tā sida ǀkha ǁaixa, sats ge ǁîdi ǃnâ ǀgaruǀgaru da ǁaedi ǃnâ da ǀorose ǀgui ǃgau hâ xuige. 14 ǃKhūtse sida ǀgores tsî ǀkhomasa ǁnâu-am re, î sa ǂhunuma ǃgôasib di ǃaromas ai huiǂui da re, î da ǁnān hîa ge ǃhūsis ǃnâ ū dan tawa ǀkhomma hō re. 15 Ob ge hoaraga ǃhūbaiba sats a ǃKhū sida Elo ǃkhaisa nî ǂan tsîts ge Israelǁaesa sa ǂhunuma ǁae kais nîse ge ǁhûiǂuibasen. 16 ǃKhūtse, sa ǃanu hâǃkhaiba xu sida ai kōǁnâ, î sida tsūǀkhāba mû. Sida ǀgoresa ǁnâu-am. 17 Sa mûde ǁkhowa-am, î sida ǁga kō. ǁŌ hân, ǀhobadi ǃnâ hân tsî ûi i xare-e ǁîn ǃnâ ūhâ taman ge satsa koa tsî mâtikōsets ǂhanu-ai ǃkhaisa a mîba tsi ǁoa. 18 Ûitsaman ǀguin ge ǃKhūtse, satsa koa tsî sa ǂhanu-aisiba kaisen ga tsâ, ǃgomse ǃgû, ǂkhabusase mû tsî ǃâsa xawe a ǂanǃgâ ǁkhā. 19 Sida aboxagu tsî gao-aogu di ǂhanu-ai dīgu ǃaroma tamas ge sa ai da ra ǀkhomma ǂgansa, ǃKhūtse sida Elotse. 20 Sats ge kaise sida ǀkha ǁaixa tsî ge ǁkhara da. Nēs ge sats ge sida sa ǃgāgu, kēbo-aogu ǃnâ-ū ǃkhâikhom tsî mî khami ge ī: 21 ‘Gao-aob Babilons diba ǁnâuǀnam î ǃoaba, o du ge tita ge sadu aboxaga mâ ǃhūb ǃnâ nî ǁan. 22 Xawe du ga ǃKhūb di mîmāsa ǁnâuǀnamoǃnâ tsî gao-aob Babilons diba ǃoaba tama i, 23 o ta ge hoa ǃgâiaǂgaogu tsî ǁâudīga kai ǃādi Judab didi tsî Jerusalems tsîn ǃnâ nî ǀamǀam. ǁKhāti dâxa ǀōgu ǃgameǁâudīgu digu ge ǃaruǀî ǁnâuhe tide. Hoaraga ǃhūb ge ǃū-aisa tsî nî khoeo.’

24 “Xawe da ge gao-aob Babilons diba ǃoabas di mîmāsa ge ǁnâuǀnamoǃnâ tsîts ge ǃkhâikhoms sa ǃgāgu, kēbo-aogu ǃnâ-ūts ge dīsa ge dīǀoaǀoa. ǂKhōgu sida gao-aogu tsî aboxagu digu ge ǀhobade xu khākhoen xa ūǂuihe tits ge mîsa. 25 Tsî mû, ǁîn ge tsēs di ǀgammi tsî tsuxub di ǃkhaib ǃnâ aoǁguihe hâ. ǁÎn ge ǀgâkhoesib ǃnâ, ǃâtsūǀkhāb, torob tsî ǀaeb xa ǃaromabahe hâse ge ǁō. 26 Israeli tsî Judab khoen di ǁoreb xa ǃaromabahe hâse du ge sadu ǂhunuma Tempela nētsēb hâǃnâ ǀgaub ai ge hîkākā.

27 “Xawe ǃKhūtse, sida Elotse sats ge sida ǀkha ge ǃnūǃnâxa i tsî kaise ge ǀkhomxa da, 28 sa ǃgāb Moseb ǃnâ-ūts ge mî hâ i khami, ǁnā tsēs ǁîbats ge Israelǁîn ra mûseb ǂhanuba nî xoa ti mîmās ai. 29 Sats ge ge mî: ‘Nēsi du ge a kai ǁae, xawe ǁnâuǀnam te tama du ka io, on ge sadu khākhoena nau ǃhaodi hoadi ǁaegu ǀgaruǀgaru tsî nî ǀoroǀoro du. 30 Xawe ta ge ǃnâudanaxa du a xui-ao du ǁnâuǀnam tide ǃkhaisa a ǂan. Xawe du ga ǀnî ǃhū-i ǃoa ǃhūsis ǃnâ ūhe, o ǀgui du ge tare-e du ge dī ǃkhaisa nî mûǂan. 31 Tsî du ge tita sadu di ǃKhū tsî Elo ǃkhaisa nî mûǂan. Tsî ta ge ǃgāsase ǁnâuǃā kai du tsî ǀasa turab ǁnâuǀnams diba nî mā du. 32 ǁNā ǃhūb ǃhūsis dib ǃnâ du ge tita kare tsî ǃgôasiba nî mā. 33 Sadu ge tare-i ge sadu aboxagu ǀkha Elob ǃoagu gu ge ǁoreo ī ǃkhaisa du ǂan xui-ao sadu ǃnâudanaxasib tsî ǂkhabaxasiba nî ǀû. 34 Tsî ta ge sado, sadu aboxagu Abrahammi, Isak tsî Jakob hâga ta ge hoaragase mîmâiba hâ i ǃhūb ǃoa nî oahā-ū tsîb ge ǁnā ǃhūba ǁkhawa nî sadu di kai. Tsî ta ge sado nî ǂguiǂgui tsî du ge tātsē ǁkhawa ǀoroǀorohe tide. 35 Tita ge ǀamo ǃgaeǀhaosa sadu ǀkha nî dī. Tita ge nî sadu Elo tsî du ge sado nî ti ǁae. Tita ge tātsē ǁkhawa sadu Israelǁaes dido tita ge mā du ǃhūba xu ūbē tide.’