ǃNaeǃkhaidi 6 - Khoekhoegowab New Translation 2020 (KKG20)

Hû sîsenaogu di ǁhûihes

1 Tsî ǂgomsaben ge ǃhaeǃhaebes ǃnâ ge ǀarosen tsîb ge ǁkhāti ǁîn ǃnâ kai ǂkhîoǃnâsiba ge khâi. Grikeǁîn tsî Hebreǁîn tsîn ge ǁîn di ǃoataradi tsēkorobe ǂûǂhûiǂuis ǃnâ ra kō-īǀkhāhe ti mî tsî gere ǂnoagu. 2 O gu ge disiǀgamǀaga hoaraga ǂgomsabena ǂgaiǀhao tsî ge mî:

“Sige, apostelge* ge noxopa ǂûǂhûiǂuis di ǃereams tsîna a ūhâ ǁoa, ǁkhāǁkhā tsî ge Elob di mîsa nî aoǁnâse i ī amaga. 3 Xuige kō re ǃgâsado, î sadu di ǁaegu hû ǃgôaǃgôasa khoegu, gā-aisiba ūhâ tsî ǁkhāti ǃAnu Gagab xa ǀoa hâga ǁhûiǂui. O ge ge ǁîga ǂûn di ǃereamsa nî mā. 4 ǁNās ǀguis ge nî īǁkhā kai sige nî ǀgores tsî mîsa ǂhôa tsî ǁkhāǁkhās di ǁaeba ūhâ ǃkhaisa.” 5 Nē ǂâiǀgaub xan ge hoaragana ge ǃgâibahe tsîn ge nē ra sao khoega ge ǁhûi: Stefanub hîa ǀgaisa ǂgomsa ūhâ tsî ǃAnu Gagab xa ge ǀoa hâ ib, Filipub, Proxorub, Nikanori, Timonni, Parmenab tsî Nikolaub hîa Antioxiasa xu hâb, Jodeǁî tamab hîa Jodeǁîsis ǃoa ge ǃhobasen hâ ib tsî nēsi a Xristeǁîba. 6 Tsî gu ge nē hûga apostelgu aiǃâ ge hā-ūhe, ǃomga ǁgui-ai tsî nî ǀgorebahese.

7 Elob di ǃGâiǂhôas ge hoaragase ge ǂabaǂoa tsîb ge ǂgomsaben di ǃgôaba kaise Jerusalems ǃnâ ge ǀarosen tsî gu ge ǁkhāti ǂgui pristergu tsîna ge ǃhobasen.

Stefanub di ǃkhōhes

8 Stefanub ge Elob di ǀkhommi tsî ǀgaib xa ǀoa hâse buruxa dīgu tsî saodi tsîna khoen ǃnâ gere dī. 9 O gu ge ǀnîgu ǃNora hâ Khobogu sinagogeb* diga, Stefanub ǀkha ge ǂgaenamǃgâgutsoatsoa. ǁÎgu ge Jodeǁîgu hîa Sireneb, Aleksandriab, Silisiab tsî Asiaba xu ge hâ iga. 10 Xaweb ge ǀguib âgu tsîna Stefanub gere ǁîba xu ǃhoa gā-aisib tsî Gagab tsîna ge mâǃoa ǁoa i.

11 Tsî gu ge ǁîga ǀnî khoena ge ǃhoaǁnâdana Stefanub ǃoagun “Sida ge ǁîba Moseb tsî Elob tsînab ra ǃkhāǃkhā hîa go ǁnâu” ti nî ǃkhō-amse. 12 Tsî gu ge nēs ǀkha ǁaes, Moseb ǂhanub* di ǁkhāǁkhā-aogu tsî ǂnomdomgu tsîga* Stefanub ǃoagu ge khâikhâiǃnâ. Tsî gu ge ǁîba ǃkhō tsî ǀapemāǃnans aiǃâ ge sī-ū. 13 Tsî Stefanuba ǂhumiǂgā-amsa ge ǀhûǀgui hâ i gu ge “Nē khoeb ge ǃanu Tempeli tsî Moseb ǂhanub tsîn ǃoagu ra ǃhoa. 14 ǁKhātib ge Jesub Nasaretǁîb nî Tempeli tsî Moseb ǂhanub tsî ǁnaetigu hîa da ge Moseba xu ǃkhōǃoaga ǀkharaǀkhara ti ra mî” ti ge ǃkhō-am. 15 Tsî ǁnā ǁaeb ain ge hoana Stefanub di aisa ge kōmâ, ǁîs ge ǀkharaǀkharasen tsî ǀhomǃgā-i di ais khami gere ǂkhai xui-ao.