Paulub ge Korintes ǃnâ ra aoǁnâ
1 Paulub ge nēn hoan khaoǃgâ Atenesa xu ǃgû tsî Korintes tawa ge sī. 2 ǁNāpab ge ǀnî Jodeǁîra, Pontub di ǃnaesabeb, Akwila ti ǀon hâb ǀgū ǁaeb ǃnâ ǁîb taras Priskilas ǀkha Italiaba xu hā hâb tsîra ge ǀhao-ū. ǁÎra ge Kaesari Klaudiub di mîmās, Jodeǁîn nî Romesa xu bē ti ge hâ is ai ǁnāpa ge sī. Tsîb ge Pauluba ǁîra tawa ge sī 3 tsîb ge ǀgui sîsenǃnôaban gere dī xui-ao ǁîra ǀkha hâ tsî gere sîsen, ǁîra tsîn ge tentkuru-ao i xui-ao.
4 Tsîb ge Pauluba Sabbattsēkorobe sinagogeb* ǃnâ Jodeǁîn tsî Grikeǁîn tsîn ǀkha ǃhoa tsî ǁîna gowadansa gere dītsâ. 5 Tsî Silab tsî Timoteub hâkha ge Masedoniaba xu ǀkhī, ob ge Pauluba aoǁnâ tsî Jodeǁîna Jesub a Xristu* ǃkhaisa ǃkhō-ambas ǀkha ge ǀhabe i. 6 Xawen ge Jodeǁîna mâǃoa tsî ǃkhāǃkhā bi, ob ge Pauluba tsaraba ǁîb di anaǂamsaraba xu ǃhaebeǁnâ tsî ge mî: “Sadu di ǀhapisa aitsama ū tita ge ǀhapio. Nēsisa xu ta ge Jodeǁî taman* ǁga nî ǃgû.”
7 Tsî ǁnāpa xub ge ǂoa ob ge ǀgui eloǃaoǃgâxa khoeb, Titiu Justu ti ǀon hâb, sinagogeb xōǀkhā ge ǁan hâb di oms tawa ge sī. 8 ǁKhātib ge Krispub, sinagogeb di ǂgaeǂgui-aob tsî ǁîb di hoaraga omarisa ǃKhūb ǃnâ ge ǂgom. Tsîn ge ǂgui Korinteǁîn hîa ge nē ǂhôasa ǁnâun tsîna ǂgom tsî ge ǁāǁnâhe.
9 Ob ge ǃKhūba ǀgui tsuxuba ai-i ǃnâ-u Pauluba ge mîba: “Tā ǃao! Xawe ǃhoa î tā ǃnō, 10 tita hâǀkhā tsi tsî i khoe-i xare-e ǁnāǂam tsi tide, ǂkhôa tsi i nîse xuige; nē ǃās ǃnâ ta ge ǂgui khoena ūhâ.” 11 Tsîb ge Pauluba ǁnāpa kurib tsî ǃnani ǁkhâga, Elob di mîsa ǁîn ǁaegu ra ǁkhāǁkhāse ge hâ.
12 Tsî Galiob ge Axajab di mûǂamao i ǁaeb ǃnân ge Jodeǁîna ǀhao tsî Paulub ǃoagu khâi tsî ǁîba mûǂamaob aiǃâ ǀgoraǃgâheb nîse sī-ū 13 tsî ge mî: “ǁÎb ge khoena Eloban ǂhanub ǃoagu hâ ǀgaub ai nî ǀgoreǀîse ra ǃhoaǁnâdana.” 14 Tsî nēsib Pauluba ra ǃhoa ǂgao hîab ge Galioba Jodeǁîn ǃoa ge mî: “Tsūdī-i tamas ka io ǂkhabadī-i ga hâ, o ta ge ga ǁnâuǃāxabahe hâ, sado ǃgâsa. 15 Xawes nēsa ǀondi, mîdi tsî sadu di Jodeǁî ǂhanub xa ra ǃgû xuige, ǁnâi aitsama mûbasen. Tita ge nēti ī xūn di ǀgoraǃgâ-ao ǂgao tama hâ.” 16 Tsîb ge ǁîna ǀgoraǃgâǃkhaiba xu ge ǃhaeǂui. 17 On ge khâikhâisenaona sinagogeb di danakhoeb Sosteneba ǃkhō tsî ǀgoraǃgâǃkhaib aiǃâ ge ǂnau. Xaweb ge Galioba ǀgui xū-i tsîna nēs ǀkha ǁaeǁaesen tama hâ i.
Paulub ge Antioxias ǁga ra oa
18 Tsîb ge Pauluba ǂgui tsēde Korintes ǃnâ ǂgomsaben ǀkha hâ tsî ǁnās khaoǃgâ ǁîna tawedeǁnāxū tsî Akwilab tsî Priskilas hâra ūsao tsî doe-oms ǀkha Siriab ǁga ge ǃnari. Kenxreas ǃnâb ge ǁîba ǀûn âba ge ǂkhomǁnâ, mîmâi-eb ge ūhâ i xui-ao. 19 Tsî Efeses tawan ge sī, ob ge Pauluba Akwilab tsî Priskilas hâra khaosǀkhāb ai ǁnāxū tsî ge ǃgû. Sinagogeb ǃnâ sī ǂgâ tsîb ge ǁnāpa Jodeǁîn ǀkha gere ǂnoagu. 20 Tsîn ge ǁîna noxopab ǁaero-e nî hâ ǃkhaisa ge ǂgan bi, xaweb ge ge ǂkhā. 21 ǁÎna tawedeǁnāxū tsîb ge “ǁKhawa ta ge nî oaǀkhī, Elob di ǂâis kao” ti mî tsî doe-oms ai ǂoa tsî Efesesa xu ge ǃgû. 22 Tsî Kaesareas tawab ge sī, ob ge Jerusalems ǃoa ǂoa tsî kerkheb khoena sī tawede tsî ǁnāpa xu Antioxias ǁga ge ǁgôa.
23 ǁAero-eb ge ǁnāpa hâs khaoǃgâb ge saogubes ai Galatiaǀkharib tsî Frigiaǀkharib tsîkha ǃnâ ǃgû tsî ǁkhāǁkhāsabena* gere ǀgaiǀgaiǃnâ.
Apolob ge Efeses tsî Korintes tsîra tawa ra sī
24 ǁNā ǁaeb aib ge ǀgui Jodeǁîb, Apolob ti ǀon hâb, Aleksandrias di ǃnaesabeb, ǃgâi ǃhoa-aob hîa Xoasa ge ǁkhāti ǃgâise ǂan iba Efeses tawa ge ǀkhī. 25 ǁÎb ge ǁkhāti ǃKhūb Daob xa ge ǁkhāǁkhāhe hâ i tsî ǀaexa gagas ǀkha aoǁnâ tsî ǂōrisase Jesub amab xa gere ǁkhāǁkhā, Johaneb ǁāǁnâs ǀguisab ge ǂan i xawe. 26 Tsî sinagogeb ǃnâb ge ǁkhoase ge aoǁnâtsoatsoa. Priskilas tsî Akwilab tsîra ge ǁnâu bi ra geo, ū bi tsî kaise ǂōrisase Elob di daob xa ge ǁguiǃāba bi.
27 Apolob ge kaise Axajab ǁga ǃgûsa tura, on ge ǃgâsana ǀgaiǀgaiǃnâ bi tsî ǁkhāǁkhāsabena sîǂkhanisa ge xoaba, în ǁîba ǁkhoreǁhare. Tsî sīb ge, ob ge kaise ǀkhomma xu ge ǂgomsabe kaina ge hui. 28 Tsîb ge ǁîba ǀgaisase Jodeǁîna ǂhaisase ge ǃhoadan tsî ǁîna Xoasa xu Jesub a Xristu ǃkhaisa gere ǁgau.
© Khoekhoegowab Elobmîs © Bible Society in Namibia, 2020.
