Paulub tsî Barnabab tsîkha ge Ikoniums ǃnâ ra aoǁnâ
1 O kha ge Paulub tsî Barnabab tsîkha Ikoniums tawa sinagogeb* ǃnâ kai ǀgaib ǀkha sī ge aoǁnâ tsîn ge Jodeǁîn tsî Grikeǁîn tsîn hoana ge ǂgom. 2 On ge ǂgomoǃnâ Jodeǁîna nau Jodeǁî tamana* gere khâikhâiǃnâ ǁîn di ǂgaogan nî Paulub tsî Barnabab tsîkha ǃoagu dabase. 3 Xawe kha ge nēn hoan ǃnâ noxopa ǂgui tsēde hâ tsî ǁkhoase ǃKhūb di ǀkhommi xa gere aoǁnâ. Tsî mîs amab dis di ǁgauǁgaus aseb ge Eloba ǁîkha saodi tsî buruxa sîsengu di ǁkhāsiba ge mā. 4 Xawen ge ǃās di khoena ge ǀgora, ǀnîna Jodeǁîn ǀkhāb ai tsî nauna apostelgu* ǀkhāb ai.
5 On ge khâikhâisen ra Jodeǁîn tsî Jodeǁî taman tsîna danaǂgaeǂgui-aogu ǀkha ǀhao tsî ǁîkha ǁnāǂam tsî ǀuiǁhomsa gere ǀapeǀhao. 6 Tsî taren ra ǀapehe ǃkhaisa kha ge ǁnâu, o kha ge Likaoniab ǁga, Listras tsî Derbes tsî ǁgoeǂnami hâ ǃārodi ǁga ǃhū 7 tsî ǃGâiǂhôasa ǁnāpa gere aoǁnâ.
Paulub tsî Barnabab tsîkha Listras tsî Derbes ǃnâ
8 Listras tawa kha ge sī, o kha ge ǃnaesa xu ǂaidi ǃnâ ǃhora tsî tātsē ge ǃgû tama hâ i khoeba ge mû. 9 Paulub di aoǁnâsab ra ǃgâ hîab ge Pauluba ǁîba kō tsî ge ǂan, ǂuruǂuruheb nî ǃkhais di ǂgomsab ūhâsa. 10 Ob ge Pauluba ǃgari dommi ǀkha “Khâimâ!” ti ge mî. Ob ge nē khoeba ǁnātimîsi urikhâi tsî ge ǃgûtsoatsoa.
11 Tsî tare-eb go Pauluba dī ǃkhaisan ge mû, on ge ǁnāpa ge hâ i ǂnubis di khoena Likaoniagowab ǃnâ ge ǂgaiǂui: “Nēgu kom elogu, khoe-īsib ǃnâ go sada ǃoa ǁgôaxaga!” 12 Tsîn ge ǁîna Barnababa Seub ti ǂgai tsî Pauluba Hermeb ti ge ǂgai ǃnāsaseb gere ǃhoa xui-ao. 13 Seub di tempeli ge ǃās di aisǀkhāb ai ge mâ i. O gu ge tempeli di pristerga ǃkhādi tsî gomagu tsîna dao-ams tawa Paulub tsî Barnabab tsîkha gu khoen ǀkha nî ǁguibase, tempeli tawa ge hā-ū.
14 ǁÎkha ge nēsa kha ge ǁnâu, o saran âkha ge ǀkhau tsî kha ge ǂnubis ǁaegu ǃkhoeǂgâ tsî ge ǃau, 15 “Aogo, tare-i ǃaroma go nēsa ra dī? Sikhom tsîn ge sadu ǁkhādu khami khoes ǀguisa i! Sikhom ge sado ǃGâiǂhôasa nî aoǁnâbase go ǀkhī, sadu nî nē xū tama xūna xu sadu di ûiga ûitsama Elob ǁga unuse. ǁNāb ǀhommi tsî ǃhūbaib tsî hurib tsî ǁîgu ǃnâ hâna ge kuruba. 16 Īgeǁaeb ǃnâb ge hoaraga ǁaede ǁîn ra ǂgao ǀkhāga-u gere ǃgû kai, 17 xawe tātsē ǃkhō-am-i ose ge hâ tama hâ i. Tsîb ge ǃgâidī tsî ǀhomma xu ǀnanuba ǀapi kai tsî sadu di ǃhanaga ge ǀomkhâi kai, sadu nî ǂû tsî ǃgâiaǂgaose.” 18 Nēna kha ge mî xawe kha ge Barnabab tsî Paulub tsîkha ǁîna ge ǁkhae ǁoa i, ǁîkha ǁguibasa hā-ūbasa.
19 On ge Jodeǁîna Antioxias tsî Ikoniums tsîna xu hā tsî khoena ǃgamsa ǃoa ge khâikhâiǃnâ. Tsîn ge ǁîna Pauluba ǀuiǁhom tsî ǁōb go ti ǂâi tsî ǃāsa xu ge ǃkharaǂui. 20 Tsî ǂgomsaben ge ǁîb ǂnamibe ǀhao, ob ge Pauluba khâimâ tsî ǃās ǁga ge oa. Sao ra tsēs aib ge ǁîba Barnabab ǀkha Derbes ǁga ge ǃgû.
Paulub tsî Barnabab hâkha ge Antioxias ǁga ra oahā
21 Derbes ǃnâ kha ge ǃGâiǂhôasa aoǁnâ tsî ǂgui khoena ǁkhāǁkhāsabedīs* khaoǃgâ kha ge ǁkhawa Listras, Ikoniums tsî Antioxias hîa Pisidiab ǃnâ ǂnôas ǁga oa 22 tsî ǂgomsabena ǁnāpa gere ǀgaiǀgaiǃnâ. ǁKhāti kha ge ǁîna ǂgoms ǃnâ hâhâsa gere ǂgaoǂgaoǃnâ, ǁîna ǁkhāti ǂgui ǃgomgu ǃnâts ǃkharu hâs khaoǃgâ ǀguits Elob Gaosib ǃnâ nî ǂgâ ǃkhaisa ra hōhōǃnâse. 23 Tsî kha ge Paulub tsî Barnabab tsîkha ǂnomdomna* mâ kerkheb hoab ǃnâ ǁgaumâi tsî ǀgores tsî ǂûtama* hâs ǀkha ǃKhūb, ǁîb ǃnân ge ǂgommi di sâub ǃnaka ge ǂgomǃgâ. 24 Tsî kha ge Pisidiab ǃnâ-u ǃkharu tsî Pamfiliab ǃnâ ge sī. 25 Pergas ǃnâ aoǁnâ tsî kha ge aiǃâb ǁga Atalias ǁga ge ǃkharu.
26 ǀAms ai kha ge doe-oms ǀkha Antioxias, ǁîs ǃnâ kha ge ǁîkha di ǃgûsa tsoatsoas, Elob ǀkhomma xu kha ge ǁkhā kaihe tsî nē sîsenna dīs tawa ge oasī, sîsenna dītoa hâse. 27 Tsî Antioxias ǃnâ kha ge sī, o kha ge hoaraga kerkheba ǂgaiǀhao tsî ǁîn ǀkha ǁîkha di hōǃâdi, mâtib ge Eloba ǁîkha nē ǃgûs âkha ǃnâ ge ǂkhâǃnâ ǃkhais tsî mâtin ge Jodeǁî tamana ǁîn di ǂgaoga Eloba ǃkhōǃoas ǃaroma ǁkhowa-am ǃkhais tsîna ǁîna ge ǁgamba. 28 Tsî kha ge ǁnāpa ǂomxa ǁae-e ǂgomsaben ǀkha ge hâ.
© Khoekhoegowab Elobmîs © Bible Society in Namibia, 2020.
