Davidi dandi torogu ǃnâ
(1 Kroniks 18:1-17)1 ǁNās khaoǃgâb ge Davida ǁkhawa Filisteǁîn ǃoagu torodī, ǁîna dan tsî gaoǂamsis âna ge ǀamǀam.
2 ǁÎb ge ǁkhāti Moabǁîn ona ge dan. ǁÎb ge ǁîna ǃnona ǃnandi ǃnâ ǃhūb ai ge ǁgoe kai; ǀgam ǃnanra dina ǃgamhen nîse tsî ǀguis dina ûin nîse. Nētin ge Moabǁîna ge Davidi ǃgā kai tsî ǁîba ǁgui-aimarisa gere matare.
3 Davidi ge ǀgaib âbab ge Eufratǃāb tawa ǁapoǁapoǃgûsī, o Sobas gao-aob Hadad-Eseri, Rehob ôab ǃoagu torodī tsî ǁîba ge dan. 4 ǁÎba xub ge Davida ǀguiǀoadisi tsî hûkaidisi hāǃgapi-aogu tsî ǀgamdisiǀoadisi ǀnūtoroǃkhamaogu tsîna ge ū. ǁÎb ge ǀguikaidisi torokunidi ǃaroma ǂâu hâ hāgu ǀguiga ū tsî naugu hoaga ge ǃkhaiǃnôa.
5 Siriaǁîgu Damaskus digu ge gao-aob Hadad-Esera gu nî huise a hā, xaweb ge Davida ǁîgu ǃoagu ǃkham tsî ǀgamdisiǀgamǀaǀoadisi khoega ge ǃgam. 6 Tsîb ge toroǂnubide Damaskus, Siriab dis ǀkharigu ǃnâ ge ūhâ i, tsîn ge Siriaǁîna ǁîb ǃgā kai tsî ǁgui-aimarisa gere matare bi. ǃKhūb ge Davida torodīǃgûb gere ǃkhaidi hoadi tawa dansa gere mā. 7 Davidi ge ǃhuniǀuri ǁkhaukhōdi Hadad-Eseri toroǃkhamaogu dide ū tsî Jerusalems ǁga ge ǃgû-ū. 8 Hadad-Eseri ǃāra, Betaxs tsî Berotais tsîra xub ge gao-aob Davida kaise ǂgui brons-e ge ū.
9 Tsî Hamats gao-aob Toib ge Davidi ge hoaraga toroǂnubis Hadad-Eseri disa dan ǃkhaisab ge ǁnâuo, 10 ǁîb ôab Joramma gao-aob Davidi ǁga ge sî, ǁîba ǂkhaisidî tsîb ǃgâiǃgâba nî ǁkhoreba biga Hadad-Eserab ge dan ǃkhais ǀkha, Hadad-Eseri ge hoaǁae Toib ǃoagu gere torodī amaga. Jorammi ge Davida ǃhuniǀuri, ǀhaiǀuri tsî brons ǀkhaexūna ge hā-ūba. 11 Gao-aob Davidi ge nēn hoana ǃKhūba ge khaiba, ǃhaodi hîab ge dande xub ge ū ǀhaiǀurib tsî ǃhuniǀurib tsîn ǀkha. 12 Edomǁîn, Moabǁîn, Amonǁîn, Filisteǁîn tsî Amalekǁîn tsî Hadad-Eseri, Sobas gao-aoba xub ge ūn tsînab ge ǃKhūba ge khaiba.
13 Davidi ge disiǁkhaisaǀaǀoadisi Edomǁîgab ge ǂŌxaǃgoaǃnāb ǃnâ ǃgams ǀkha kai ǀonsa ge dībasen. 14 ǁÎb ge toroǂnubide hoaraga Edommi ǃnâ ge ūhâ i, tsîn ge Edomǁîn hoana ge ǁîb di ǃgā kai. ǃKhūb ge Davida torodīb gere ǃkhai-i hoa-i ai dansa gere mā.
15 Davidi ge hoaraga Israeli ǂama ge gao-ao i, tsî ǁaes âba ǂhanub tsî ǂhanu-aisib ǀkha gere ǂgaeǂgui. 16 Serujas ôab Joab ge ge toroǂnubis ǂgaeǂgui-ao i; Ahiludi ôab Josafati ge ge gao-aob ra ǂanǂan xūn di ǂhôaǂui-ao i; 17 Ahitub ôab Sadoki tsî Abiatari ôab Ahimelexi tsîkha ge ge prister i, tsî Serajab ge ge xoa-ao i. 18 Jojadab ôab Benajab ge ge gao-aob ǃûi-aogu di mûǂamao i tsî Davidi ôagu ge ge prister i.
© Khoekhoegowab Elobmîs © Bible Society in Namibia, 2020.
