Davidi ge ǁaes nî ǃgôakhâihesa ra mîmā
(1 Kroniks 21:1-27)1 ǁKhawab ge ǃKhūba Israeli ǀkha ǁaixa tsî Davida ǁîn ǃoagu khâikhâiǃnâ tsî ge mî: “ǃGû, îts Israeli tsî Judab tsîkha khoena sī ǃgôakhâi.” 2 Ob ge gao-aoba, toroǂnubis âb di ǃkhōdana-aob, Joaba ge mîmā: “Sa ǂamkhoegu ǀkha Israeli ǃhaodi hoadi ǃnâ ǃgû, ǀgui ǀams ǃhūb disa xu nau ǀams kōse, î ǁaesa ǃgôakhâi, mātikōn a ǃkhaisa ta ra ǂan ǂgao xuige.”
3 Ob ge Joaba gao-aoba ge ǃeream: “Ab ǃKhūb sa Eloba Israelǁaesa nēsin kōs xa kaidisi ǃnāde ǂguiǂgui, îts ǃgôahesa gao-aotsa nēsa mû, xawe tare xū-i ǃaromats kha gao-aotse, nē ǃkhaisa ra dī ǂgao?” 4 Xaweb ge gao-aoba mîb ge mîs ai ge mâ, ǁnā-amaga gu ge Joab tsî ǂamkhoegu âb tsîga Israelǁaesa gu sī nî ǃgôase gao-aoba xu ge ǃgû.
5 ǁÎgu ge Jordanna ǃgâu tsî Aroers di ǃkhawagas ǃnâ ǃgoaǃnāb ǁaegu ǂnôa ǃās ǃnâ hâǃkhaib âga sī ge ǂnaumâi. ǁNāpa xu gu ge Gads tsî Jasers tsîra kōse ge ǃgû, 6 tsî Gileads kōse tsî Kades Hetǁîn ǀkharib ǃnâ ǂnôas kōse. ǃAruǀî gu ge Dans kōse ge sī tsî ǁnāpa xu Sidons ǃoa ge dabasen. 7 Tsî gu ge omǂnamisa ǃās Tirus tsî hoa ǃādi Hivǁîn tsî Kanaanǁîn didi tawa ge sī; ǁnāpa xu gu ge Judab di ǃkhawagas ǃnâ Bersebas tawa ge sī. 8 ǁÎgu ge hoaraga ǃhūba ǃgûǃnâǃganu tsî khoese ǁkhâgu tsî ǀgamdisi tsēdi khaoǃgâ Jerusalems ǃnâ ge oasī. 9 Tsîb ge Joaba ǃgôakhâihe ge khoen di ǃgôaba gao-aoba ge mā. Israeli ǃnâ gu ge ǁkhaisakaidisiǀoadisi toroǃkham-ao kai ǁkhā khoega ge hâ i tsî Judab ǃnâ korokaidisiǀoadisiga.
10 ǁAesab ge ǃgôakhâis khaoǃgâb ge Davida ǂgaoǂans âb xa ǂhanihe tsî ǃKhūb ǃoa ge mî: “Nē ta go dī ǃkhais ǀkha ta ge kaise go ǁore. Toxopa ǀûba te re, tsūse ta go dī xuige.”
11 Davidi ge ǁgoaga khâimâ, ob ge kēbo-aob Gadi, Davidi di mû-aoba ǁîb ǃoa ge hā. ǃKhūb ge Gada ǃoa ge mî: 12 “ǃGû, î Davida sī mîba ǃnona xūna ta ra ǁgui-aiǃâ bi ǃkhaisa. ǁÎna xub ga ǁhûi xū-i hoa-e ta ge nî dī.” 13 Ob ge Gada nē ǂhôasa Davida sī-ūba tsî ge mî: “Mâ-ets ra ǁhûi? ǃNona kurigu ǃâtsūǀkhāb diga sa ǃhūb ǃnâ nî hā? ǃNona ǁkhâgats sa khākhoen aiǃâ nî ǁhâma, ǁîn xats ra ǃgôaǃgonhese? ǃNona tsēdi kōseb ǂhīǁōba sa ǃhūb ǃnâ nî hâ? ǃGâise ǂâiǃgâ, îts mîba te, mâti ta ǃKhūba sī nî mîba ǃkhaisa.”
14 Ob ge Davida Gada ge ǃeream: “Kai ǂōǂōsib ǃnâ ta ge hâ. A ta ǁnâi ǃKhūb ǃomǁae ǁnā, ǁîb di ǀkhommi a kai xuige, xawe a ta tā khoen di ǃomǁae ǁnā re.” 15 Ob ge ǃKhūba ǂhīǁō-i, ǁgoagasa xu mîmâisa ǁaeb kōse nî hâ-e Israeli ǃnâ ge sîǂgā. ǀGui ǀams ǃhūb disa xu nau ǀams kōsen ge hûdisiǀoadisi khoena ge ǁō. 16 Tsî ǀhomǃgāb Jerusalemsab nî hîkākāse ra ǂhomisen hîab ge ǃKhūba nē ǁkharab ǀkha aiǃgûsa ge ǀû; tsîb ge ǀhomǃgāb ǁîna ra hîkākāb ǃoa “ǂÂu go, xuige nēsi ǀû!” ti ge mî. ǀHomǃgāb ǃKhūb dib ge Jebusǁîb, Araunab di dāǃnâǃkhais tawa ge hâ i.
17 Davidi ge khoena ra ǃgam ǀhomǃgābab ge mû, o ǃKhūb ǃoa ge mî: “Tita ge ǀhapixa a ta. Tita ge ǃûǂam ge ta. Nē ǀkhomǀkhomsa khoena tare-en ge dī? Tita tsî ti surib tsîna ǁnâi ǁkhara re.”
18 Gadi ge ǁnā tsēs ǁkhās ai Davidi tawa hā tsî ǁîb ǃoa ge mî: “ǃGûǂoa, î ǃKhūba Araunab Jebusǁîb di dāǃnâǃkhais tawa sī altarsa ǂnubiba.” 19 Ob ge Davida ǃKhūb di mîsa ǁnâuǀnam tsî Gadi ge mîba bi khami ge ǃgûǂoa. 20 Tsî Araunab ge kōǁgôa tsî gao-aob tsî ǂamkhoegu âb ǁîb ǃoa ra hā ǃkhaisa a mû, ob ge ǂoa tsî gao-aob aiǃâ ǃhūb kōse ǃhonǁgoa 21 tsî “Tare-e xū-i ǃaromats ǃgôahesa gao-aotsa sa ǃgāta ǃoa go hā?” ti ge dî.
Ob ge gao-aoba ge ǃeream: “Sa dāǃnâǃkhaisa ǁama tsî ta ǁîs ai ǃKhūba altarsa nî ǂnubibaga, îb nē ǂhīǁōba ǁaesa xu ūbēhe.”
22 Ob ge Araunaba Davida ǃoa ge mî: “ǃGôahesa gao-aotse, ǁîsa ū, îts ǂgaots ra xū-i hoa-e ǃKhūba ǁguiba. Nēgu ge gomaga khauǁguibas ǃaroma tsî nēdi ge dāǃnâ-ūkunidi tsî jōkhoedi tsîna ǀaes ǃaroma.” 23 Araunab ge nēn hoana gao-aoba mā tsî ge mî: “Ab ǃKhūb sa Eloba sa ǁguibasa ūǃoa re.”
24 Xaweb ge gao-aoba Araunaba ge mîba: “Hî-î, tita ge ǁîs ǃaroma nî matare tsi. Tita ge ǃKhūb ti Eloba xū-e ta matare tama ǁguiba-e ǁguiba tide.” Tsîb ge Davida dāǃnâǃkhais tsî gomagu tsîna korodisi ǀhaiǀuri maridi ama ge ǁama. 25 Tsîb ge ǁnāpa ǃKhūba altarsa ǂnubiba tsî khauǁguibadi tsî ǂûǁguibadi tsîna ge ǁguiba. Ob ge ǃKhūba ǀgores âba ge ǁnâu-am, tsîb ge ǂhīǁōba Israeli ǃnâ ge toa.
© Khoekhoegowab Elobmîs © Bible Society in Namibia, 2020.
