Davidi tsî Batsebas tsîra
1 Sao ra ǁhaoǁaeb ǃnâ, gao-aogu ǁnaetisase torob ǃoa gere ǃgûǂoa ǁaeb aib ge Davida Joaba ǁîb toroǂamkhoegu tsî Israeli toroǂnubis hoas ǀkha ge sîǂui. ǁÎgu ge Amonǁîna dan tsî Rabasa ge ǃnamiǂgā, xawe Davidi ge Jerusalems ǃnâ ge hâ-oa.
2 ǀGuitsēb ge Davida karaǁaeb ai sâǁgoeb ge hâ ipa xu khâi tsî gao-ommi ǂamǃnâ gere ǃgûma. ǁNāpa xub ge khōsen ra khoesa ge mû; ǁîs ge kaise ge îxa i. 3 Davidi ge khoe-e sî tsî nē khoes xa a ǂanǂui kai, ob ge “Batsebas Eliammi ôas, Uriab Hetǁîb taras ge” ti ge mîbahe. 4 Ob ge Davida sîsabega sî tsî ǁîsa ge ǀkhī-ū kai. Nēs ge ǁîs ǁkhâǀaesenna xus khōsen tsî ǃanuǃanusen hâs khaoǃgâ ge isa. Tsîb ge ǁîb tawas ge ǀkhī-ūhe, o ǁîsa ge ǁgoe-ū. ǁNās khaoǃgâs ge oms âs ǁga ge oa. 5 Nē taras ge ge ǀgamǀkhā tsîs ge Davida ǀgamǀkhās go ǃkhaisa ge ǂanǂan.
6 Ob ge Davida, Joaba ge haisiba: “Uriab, Hetǁîba tita ǁga sî re.” Ob ge Joaba ǁîba Davidi ǁga ge sî. 7 Tsî Uriab ge ǁîb tawa hā, ob ge Davida, Joab tsî toroǂnubis ǃgâise hâs tsî torob mâti ra aiǃgûsa ge dî bi. 8 ǁNās khaoǃgâb ge Davida Uriab ǃoa ge mî: “Sa oms ǁga oa, î sī sâro re.” Tsî Uriab ge gao-aob omma xu a ǂoa, ob ge gao-aoba ǀkhaexū-e ge sîba bi. 9 Xaweb ge Uriaba oms âb ǁga oa tama i tsî gao-ommi dao-ams tawa gao-aob ǃgāgu ǀkha ǀguipa ge ǁgoe. 10 O gu ge ǁîga “Uriab ge oms âb ǁga go oa tama hâ i” ti Davida ge mîba, ob ge Davida Uriaba ge dî: “ǀHawesets kom go ǀkhai io, tare xū-i ǃaromats oms âts ǁga oa tama?”
11 Ob ge Uriaba ge ǃeream: “ǃGaeǀhaos ǂGaes tsî Israeli tsî Judab aogu ge tentomdi ǃnâ hâ tsî ti ǂgaeǂgui-aob Joab tsî ti ǀhonkhoets toroǃkhamaogu ge ǂgāb ai hâǃkhaiba ǂnaumâi hâ. Mâti ta kha ǁnâi tita oms ǁga oa, ǂû tsî ā tsî ti taras ǀkha nî ǁgoe? ǁNāsa ta ge amase dī tide.”
12 Ob ge Davida Uriab ǃoa ge mî: “Nētsē noxopa nēpa hâ re, î ta ǁari ǃgû kai tsi.” Uriab ge ǁnā tsēs tsî sao ra tsēs tsîra Jerusalems ǃnâ ge hâ. 13 Ob ge Davida ge ǁkhau bi tsî ǁîb ǀkha ǂû tsî ā tsî ǁîba ge āsiǃgâuǃgâu. Xaweb ge Uriaba ǁnā ǃuia, ǁîb di ǁgoeǃkhais aib gao-aob ǃgāgu tawa sī nî ǁgoega ge ǂoa, tsî oms âb ǁga oa tama ge i.
14 Sao ra ǁgoagab ge Davida ǂkhanisa Joaba xoaba tsî ǁîsa Uriab ǀkha ge sî. 15 ǁNā ǂkhanis ǃnâb ge ge xoa hâ i: “Uriaba aisǀkhāb ai ǃkhammi a ǀgaisapa mâi, î go ǁnāxūǃgâ bi, îb ǃkhammi ǃnâ ǁō.” 16 Joab ge ǃāsab ge ǃnamiǂgāo, Uriaba ǁnā ǃkhais ǁkhoaǂgaoxa ǃkhamaogu khākhoen digu hâsab a ǂans tawa ge mâi. 17 Khākhoegu ge ǃāsa xu ǂoaxa tsî Joab ǃoagu ge ǃkham. ǀNîgu Davidi ǂamkhoegu digu ge ge ǃgamhe tsî Uriab Hetǁîb on ge ǁnāpa ge ǁō.
18 Ob ge Joaba nē ǃkhammi ge ǃgû ǀgaub hoaba Davida ge haisiba. 19 ǁÎb ge sîsabeba ge mîmā: “Nē ǃkhammi ǃgûǀgaub hoabats ga gao-aoba mîbatoa, 20 ob ga ǁaixa tsî dî tsi: ‘Tare xū-i ǃaroma go ǁnātikōse ǃās ǀgūse sī go ǃkham? ǂNubiǂgoaba xu gu nî ǁkhâu ǃkhaisa go go ǀū i? 21 Tari-e, Jerubeseti ôab Abimelexa ge ǃgam-e? Tarekhoe tamasa ǁkhamiǀuisa ge ǂnubiǂgoaba xu ǁîb ai aoǁnâ tsî Tebes tawa ǃgam bisa? Tare xū-i ǃaroma go ǁnātikō ǀgūse ǂnubiǂgoab tawa go sī?’ Ots ge ‘Sa toroǂamkhoeb Uriab, Hetǁîb on ge go ǁō’ ti nî mî.”
22 Ob ge sîsabeba ǃgû tsî Davida Joab ge mîmā bin hoana sī ge ǂanǂan. 23 ǁÎb ge Davida ge mîba: “Sige khākhoegu ge ǀgaidā ge tsî ǂgās kōse sige ǃoa go ǂoaxa, xawe ge ge ǁîga ǃās di dao-ams kōse go ǁkhae-oa. 24 O gu ge ǁkhâu-aoga ǂnubiǂgoaba xu sige ai go ǁkhâu tsî gu ge ǀnîgu gao-aots toroǂamkhoegu diga go ǃgamhe tsîb ge Uriab, Hetiǁîb ona go ǁō.”
25 Ob ge Davida sîsabeba ge mîmā: “Nēti Joaba mîba: ‘As nē ǃkhaisa tā kai xū-i ase ība tsi, khoets tari-i torob ǃnâ nî ǁō ǃkhaisa a mî ǁoa xuige. ǀGaisase ǃās ǃoagu ǃkham, îts ǁîsa hîkākā.’ Î ǀgaiǀgaiǃnâ bi.”
26 Uriab taras ge aob âs go ǁō ǃkhaisas ge ǁnâu, o ǁîb ǂama ge ǃoa. 27 Tsî ǃoab ǁaeb ge ǃkharu, ob ge Davida ǁîsa gao-ommi âb ǁga ge hā-ū kai, tsîs ge ǁîb tara kai tsî ǀgôaba ge ǁoraba bi. Xawes ge Davidi ge dī ǃkhaisa ǃKhūb mûǁae ge ǂhanu tama hâ i.
© Khoekhoegowab Elobmîs © Bible Society in Namibia, 2020.
