ǂHumi ǁgauǃnâ-aogu
1 ǂHumi kēbo-aogu ge khoen ǁaegu hâ is ǁkhās khami gu ge ǁkhāti ǂhumi ǁgauǃnâ-aoga sadu ǁaegu nî hâ. ǁÎgu ge ǂganǃgâsase hîkākā ra ǂhumi ǁkhāǁkhā-aide ūǂgâxa, tsî ǁkhāti ǃKhūb hîa ge ǁîga ǁamaǃnoraǃnoraba nî ǀūxū tsî ǃhae hîkākāsa ǁîgu ai nî ūhābasen. 2 ǂGuin ge ǁîn di xorexūsasiba nî sao, tsî i ge ǁîn ǃaroma amab di daoba ra ǃkhāǃkhāse nî ǃhoahe. 3 Tsî ǁîgu di xūǃgunuxasib tsî ama tama ǁau ǃhoaxūn ge ǁîgu di hōǂgās ase nî ī, xaweb ge Eloba ǀnai ǁîgu ǀgoraǃgâsa ge mîǀgui tsîs ge hîkākāsa ǁîga ǃâu hâ.
4 Elob ge ǀhomǃgāgu hîa ge ǁoregu tsîna sâu tama i tsî ǁîga ǃgae-ūdadi ǀkha ǃgae tsî ǃkhaenab ǃnâ ge ūhâǀgara, ǀGoraǃgâtsēs kōse. 5 Tsî Elob ge ǀoro ǃhūbaiba sâu tama ge i tsî Noaxi, ǁkhaisaǁî khoeb hîa arki ǃnâ ge hâ ib, ǂhanu-aisib di aoǁnâ-aoba ge sâu, kai ǁgammab ge eloxoresan di ǃhūbaib ǂama ūhāo. 6 Tsî Sodoms tsî Gomoras tsîrab ge ǀaes ǀkha hâ hîkākās ǃoa ge ǀgoraǃgâ tsî khauǃkhūs ǀkhab ge ǁnān, eloxoresase ra ûi ǂgaona aiǁgausa ge dība. 7 Xaweb ge ǁnā ǁaeb ǂûb ǃnâ ǂhanu-ai Loti, ǃnāǂamsa ǁgauoǃnâ tanisens, xorexūsa khoen dis xa ǀhūǀhūhe hâba ge ore. 8 Mû tsîb gere ǁnâun xas ge nē ǂhanu-ai khoeb hîa, ǁîn ǁaegu ge ǁan hâ ib di ǂhanu-ai ǀomsa tsēsa xu tsēs ǁga gere tsûtsûhe, ǁîn di ǂhanuo sîsengu xa. 9 ǃKhūb ge a ǂan, mâtib nî eloǃaoǃgâxana ǃâitsâba xu ore tsî ǂhanuoǃnâna ǀGoraǃgâtsēs ǃaroma ǁkharab ǃnaka ūhâsa, 10 ǃgōsase ǁnān, ǁîn di ǀurixa sorosi turaga sao tsî Elob di gaoǂamǁkhāsiba ra ǃharaxūna.
ǁÎn ge ǁîǂâixa, ǁē tsî sauaǃnâ tama hâ, ǀhomsi kurusabena ǃkhāǃkhāsa. 11 ǀHomǃgāgu hîa ǁîn xa ǀgaib tsî ǁkhāsib ǃnâ kaigu, xawe gu ge ǃkhāǃkhā ra ǀgoraǃgâ-e ǁîgu ǃoagu ǃKhūba xu ūhā tama hâ. 12 Xawe nē khoen ge ǁnâuǃāoǃnâ xamarin, ǃkhōhe tsî ǃgamhes ǃaroma ǃnae hân khami ī, ǀūn a xūnan ra ǃkhāǃkhā amagan ge ǁîna ǁkhā hîkākās ǃnâ nî hîkākāhe. 13 Tsîn ge ǂhanuoǃnâsib ân di amǃnâs ai ǂhanuoǃnâsiba nî ǃkhōǃoa. ǁÎn di ǁkhoaxasib ge tsēab di ǃgâiǃgâisensa; ǁîn ge mûmûsase ǂnaoǂnaosen tsî gāxaǃnâsigu ǃnâ ra māǁnâsen, sadu ǂûǁaredi ǃnân ra ǁhao hîa. 14 ǁÎn ge ǃgamekhôaxa mûde ūhâ tsî tātsē ǁoreǀû tama tsî ǀgaioǃnâ ǀomde ra nanaǁnâ. ǁÎn ge ǂgaogu hîa xūǃgunuxasib ǃnâ ǁkhāǁkhāhe hâga ūhâ, ǁnān ǀâxarehe hâna! 15 ǁÎn ge ǂhanu daoba ǁnāxū, kā tsî Beori di ôab Bileammi, ǂhanuoǃnâsiba xub ra hō mādawa-amsa ge ǀnam ib di daoba ge sao. 16 Xawe ǁîb ge ǃûǂams âb di ǁkharaba ge hō. ǃGome dâuki-i ge khoesi dommi ǀkha ǃhoa tsî kēbo-aob di ǃkhausasiba ge ǁkhae.
17 Nēn ge ǂnâsa ǀaudi tamas ka io ǂoab xa ra ǃgommahe ǃâudi, ǁîdi ǃaromab ǃkhaenab di ǃkhaesiba ǀamosib kōse sâuhe hâdi khami ī. 18 Ama tama khūkhūsens ǃhoaxūn tsî ǃnāsa xorexūsasib, sorosi turab diba sîsenūs ǀkhan ra ǁnān hîa ǀase ǀgui, tsūse ûi hâ khoena ra ǁhâxūna ra nanabē. 19 ǁÎn ge ǁîna ǃnorasasiba ge mîmâiba, xawen ǁî-aitsama a ǀhôagaosib di khoboǃâ. Khoe-i ge ǁî-i ǃnaka i ra māsen xū-i hoa-i di khobo. 20 Tsî ǃhūbaib di ǂnaoǂnaosenden ga sada ǃKhūb tsî ǃGâiǃōdī-aob, Jesub Xristub* ǃnân ūhâ ǂansa xu ǁhâxū hâ tsî ǁkhawa ǁîdi xa ǃgaemâihe, on ge danhe hâ. Tsîn ge ǁîna îbe ǂguros ǃgâ-ai nî tsūbahe. 21 ǁÎna i ge ga ǃgâiba hâ ǂhanu-aisib di daoban ga ǂan tama hâsa, ǁîba ǂan hâǃân nî ǃanu mîmās hîan ge māhesa xu oas xa. 22 Xawen ge ge hāǂamhe, ama-ai ǂkhoamîs hîa ra mîs xa: “Ari-i ge ǁî-i di ǀkhûib ǁga ra oa” tsî “Hāgū-i, ǁāhe go i ge ǁkhawa ǂgoab ǃnâ sī ra ǃhobosen.”
© Khoekhoegowab Elobmîs © Bible Society in Namibia, 2020.
