Elisab ge ǃōsa ǁgam-i ai ra ǀnarema kai
1 ǀGuitsē gu ge kēbo-aoga Elisab ǃoa ge mî: “Nē ǃkhais sats ǃnaka ge ǁîs ai hâs ge a ǂō. 2 A ge Jordanni ǁga ǃgû, î ge haide sī ǁhāǁnâ tsî ǁanǃkhai-e ombasen.”
Ob ge Elisaba “ǂHanu a” ti ge ǃeream.
3 ǀGuib ǁîgu dib ge saob nîsa a ǂgaoǀkhā bi, ob ge māsen 4 tsî ǁîgu ǀkha ge ǃgû. Jordanni tawa gu ge sī, o gu ge haide ge ǁhāǁnâtsoatsoa. 5 Haisab ra ǁhāǁnâ hîas ge ǀguib di ǃōsa ǁgam-i ǃnâ ge ǁnā. Ob ge ǁîba Elisab ǃoa “ǃGôahesatse, ǀkhupi ta go hâ i ǃōs ge, o mâti ta nî dī?” ti ge mî.
6 “Mâpas go ǁnā?” tib ge Elisaba ge dî bi.
Khoeb ge ǃkhaisa a ǁgau bi, ob ge Elisaba haiba ǁhāǁnâ tsî ǁnāpa ǁgam-i ǃnâ ge aoǂgā, os ge ǃōsa ǁgam-i ai ge ǀnarema. 7 “Ūǂui” tib ge Elisaba a mî, ob ge ǃgamǃgâ tsî ǁîsa ge ūǂui.
Siriaǁîn toroǂnubis ge ra danhe
8 Siriab di gao-aob ge Israeli ǃoagu gere torodī. ǁÎb ge ǂamkhoegu âb ǀkhab ǁnâugu hâ ǃkhaib tawa hâǃkhaib âba ge ǂnaumâi. 9 Ob ge kēbo-aob Elisaba Israeli gao-aoba ge haisiba, îb tā ǁnā ǃkhaib tawa sī, Siriaǁîgu ǁnāpa ǃâuǁgoe bi hâ xui-ao. 10 Ob ge Israeli gao-aoba ǁnā ǃkhais, Elisab go mîba bis di khoena ge ǃkhâikhom, în ǂanbasen. Nē ǃkhais ge ǃnākorobe gere ī.
11 Siriab gao-aob ge nē ǃkhais xa kaise ǂkhîoǃnâ tsî ǂamkhoegu âba ǂgai tsî ǁîga ge dî: “Tarib sago diba Israeli gao-aob ai ra ǀanaǃgâ ge?”
12 Ob ge ǀguib ǁîgu diba ge ǃeream: “ǃGôahesatse, sige di ǀgui tamab ge, xawe kēbo-aob Elisab ge Israeli gao-aoba mîts ra xūna, sa ǁomǃnâ-oms ǃnâ ǀguits ga mî, xawes tsîna ra ǂanǂan.”
13 “Mâpab hâsa ǂanǂui, î ta sī ǃkhō kai bi” tib ge gao-aoba ge mîmā.
Dotans ǃnâb Elisaba hâ ǃkhaisab ge mîbahe, 14 ob ge kai toroǂnubisa, hān tsî torokunidi ǀkha ge sî. ǁÎn ge tsuxuba ǃās tawa sī tsî ǁîsa ge ǃnamiǂgā. 15 Sao ra tsēs ǃnauǁgoagab ge Elisab ǃgāba khâimâ tsîb ge omsa xu a ǂoaxa, o Siriab toroǂnubis, hān tsî torokunidi ǀkha ǃāsa ǃnamiǂgā hâ ǃkhaisa ge mû. Ob ge Elisab tawa sī tsî “Ae, ǃgôahesatse, tare-e da nî dī?” ti ge mî.
16 Ob ge Elisaba “Tā ǃao, sada ǀkha hân, ǁîgu ǀkha hân xa a ǃnāsa xuige” ti ge ǃeream. 17 ǁNās khaoǃgâb ge ge ǀgore: “ǃKhūtse, mûra âba khowa re, îb mû ǁkhā.” Ob ge ǃKhūba Elisab ǀgoresa ge ǁnâu-am tsîb ge ǃgāb âba ge mû ǁkhā tsîb ge hān tsî ǀaexa torokunidi tsîna Elisab ǂnamipe hâ ǃhomgu ai ge mû.
18 Siriaǁîgu ge ǁgôaxaǃgâ bi, ob ge Elisaba “ǃKhūtse, nē khoega toxopa ǂgī kai re” ti ge ǀgore. Ob ge ǃKhūba ǁîb ǀgoresa ǁnâu-am tsî ǁîga ge ǂgī kai. 19 Ob ge Elisaba ǁîgu ǁga ge mî: “Nēb ge ǂhanu dao tamaba. Nēs ge ǁîsa go ra ôa ǃā tamasa. Tita sao, o ta ge ǁîba go ra ôa khoeb ǁga nî ǂgaeǂgui go.” Tsîb ge ǁîga Samarias ǁga ge ǂgaeǂgui.
20 Samarias ǃnâ gu ge sī, ob ge Elisaba ge ǀgore: “ǃKhūtse nē khoegu mûde khowa re, î gu mû ǁkhā.” ǃKhūb ge ǀgoresa ge ǁnâu-am tsî gu ge ǁkhawa ge mû ǁkhā, o gu ge Samarias ǃnâ gu hâ ǃkhaisa ge mû.
21 Israeli gao-aob ge ǁîgab ge mûo “ǃGam ta nî ǁîga, ǃgôahesatse, ǃgam ta nî ǁîga?” ti Elisaba ge dî.
22 Ob ge ǁîba “Tā ǁîga ǃgam. ǃKhammi ǃnâts ge ǃkhōsabese ū toroǃkhamaogu tsînats kom ǃgam tamao. ǁÎga ǂû tsî gu nî ā xū-e mā, î ǂûtoa gu kao ǁîgu di gao-aob ǁga sî-oa.” 23 Tsîb ge Israeli gao-aoba ǁîga kai ǂûǁare-e dība, tsî ǂû tsî gu ge ātoas khaoǃgâ Siriab gao-aob ǁga ge sî-oa. ǁNā ǁaeba xu gu ge Siriaǁîga ǁkhawa Israel ǃnâ hā tama ge i.
Siriab toroǂnubis ge Samariasa ra ǃnamiǂgā
24 ǀNî ǃnā-eb ge Siriab gao-aob Benhadada, ǁîb toroǂnubis hoasa ǂgaikhâi tsî Samarias ǁga ǃgû tsî ǁîsa sī ge ǃnamiǂgā. 25 Nē ǃnamiǂgās ge kai ǃâtsūǀkhāb ge Samarias ǃnâ hâ ǃkhaisa ge ǃaroma. ǂÛǀorosib ge kaise ge kai tsîs ge dâukidanasa ǀgui kiloxrammi ǀhaiǀuriba tsî ǂkhari xaparos ǂnabuxauba korodisihûǀa kiloxramgu ǀhaiǀuriba gere ǂgan.
26 Israeli gao-aob ǂnubiǂgoab ai ǃgûgaru, hîa i ge tara-e “Gao-aotse, toxopa hui te re” ti ge ǂgai.
27 Ob ge ǁîba ge dî: “ǃKhūb ga hui si tama io, mâpa xu ta tita nî hui si ǁkhā? ǃHoro-i kas, draibe-i kas hoasa ū ta hâ? 28 Tare ǃgomsi-es ūhâ?”
Os ge ǁîsa ge ǃeream: “Nē taras ge nautsē tita ǃoa ge mî, îm ti ôaba ǂû tsî ǁnās khaoǃgâ sao ra tsē ǁîs diba ǂû. 29 Om ge ti ôaba sâi tsî ge ǂû, xawe sao ra tsēs ai ta ge sa ôaba hā-ū, îm ǁîb tsîna ǂû ti a mî, os ge ǁîs ôaba ge sâu.”
30 Nē ǃkhaisab ge ǁnâu, ob ge gao-aoba saran âba ge ǀkhau tsîn ge ǀgūse ge hâ i khoena, saran âb ǃnakab ǃoab sarana ana hâ ǃkhaisa ge mû. 31 Ob ge ǁîba ge ǂgaiǂui: “Ab Eloba ǃgam te, Safati ôab, Elisab danas ga nētsē ǁhāǁnâhe tama io.” 32 Tsîb ge sîsabeba ge sî, îb Elisaba sī ūhe.
Elisab ge ǂgaeǂgui-aogu ǀkha ǁîb oms ǃnâ ge ǂnôa i. Tsîb ge ǁîba gao-aob sîsabeb noxopa hā tama hîa ǁîga ǃoa ge mî: “Nē ǃgamaob ge ti danasab hā nî ǁhāǁnâga khoeba go sî. ǁÎb ga nēpa a hā, o dao-amsa ǂganam, îb tā ǂgâxa; gao-aob ǂûb ǁîba saoǃgoaxa xuige.”
33 Noxopab ǁîgu ǀkha ra ǃhoa hîab ge gao-aoba hā tsî ǁîb ǃoa ge mî: “ǃKhūb ge nē ǂōǂōsiba sida ǂama go hā-ū. Tare-i ǃaroma ta noxopa hui dab nîga ǃKhūba nî ǃâu?”
© Khoekhoegowab Elobmîs © Bible Society in Namibia, 2020.
