Torob Israeli tsî Moab tsîkha ǁaegu
1 Disiǁkhaisaǀaǁî kurib Judab gao-aob Josafati ǂgaeǂguis dib ǃnâb ge Axab ôab Joramma ge Israeli gao-ao kai, tsîb ge disiǀgamǀa kuriga Samarias ǃnâ ge ǂgaeǂgui. 2 ǁÎb ge ǃKhūb mûǁae ǂkhabana gere dī, xawe ǁîb îb tsî ǁîb îs tsîra khamis ose, Baali di īb, ǁgûb ge ǀgoreǀîheb nîse dībab ge ūbē amaga, 3 xawe Nebati ôab, Jerobeammi ǁkhāb khami ǁore tsî Israelǁîna ǁoreb ǃnâ ge ǂgaeǂguiǂgā.
4 Moab gao-aob Mesab ge gūǂgari-ao ge i tsîb ge kurikorobe ǀguikaidisiǀoadisi ǁkhaon tsî ǀguikaidisiǀoadisi gūǀûn tsîna Israeli gao-aoba gere sī-ūba. 5 Xawe Israeli gao-aob Axab ge ǁō, ob ge Moab gao-aob Mesaba Israeli ǃoagu ge khâikhâisen. 6 Ob ge gao-aob Joramma ǁnātimîsi Samariasa xu ǃgû tsî Israeli toroǃkhamaogu hoaga ge ǀhaoǀhao. 7 Tsîb ge Judab gao-aob Josafata nēti ge haisiba: “Moab di gao-aob ge ti ǃoagu ra khâikhâisen. ǁÎb ǃoagu ta ga torodīo, mâxōǀkhā tets nî?”
Ob ge Josafata ge mî: “Î, mâxōǀkhā tsi ta nî. Sakhom ge a ǀgui, ti toroǃkhamaogu ge a sa tsî ti hāgu ge a sa. 8 Mâ daoba-u khom nî ǃgûǂoa?”
Ob ge Joramma “Edomǃgaroǃhūb di daoba khom ge nî ū” ti ge ǃeream.
9 ǁNāti gu ge Israeli gao-aob tsî Judab gao-aob tsî Edommi gao-aob tsîga ge ǃgûǂoa. Hû tsēde gu ge ǃgûs khaoǃgâ gu ge ǁgam-i xa ge toaxūhe tsî i ge toroǃkhamaogu tsî xūn ge ǃnao-aihe hâ i hān tsîn ǃaroma ǁgam-e ge ǀkhai i. 10 Ob ge Israeli gao-aoba ge mî: “Ae, ǃKhūb ge sa ǃnonage Moab gao-aob ǃomǁae go māǁnâ.”
11 Xaweb ge Josafata ge dî: “Nēpa i kha ǁî-i ǃnâ-u ge ǃKhūba nî dî kēbo-ao-e a ǀkhai?”
Ob ge gao-aob Jorammi, toroǂnubis ǃkhōdana-aogu di ǀguiba ge ǃeream: “Safati ôab Elisab, Eliab sîsenhui-ao ge ib ge nēpa hâ.”
12 Ob ge gao-aob Josafata “ǁNāb ge ama kēbo-aoba” ti ge mî, tsî gu ge nē ǃnona gao-aoga Elisab ǁga ge ǃgû.
13 Xaweb ge Elisaba Israeli gao-aob ǃoa ge mî: “Mâ dīxū-e ta sats ǀkha ūhâ? Sa îb tsî sa îs tsîra di kēbo-aoga ǃoa ǃgû.”
Ob ge Israeli gao-aoba ge mî: “Hî-î, ǃKhūb ge si ǃnona gao-aoge Moab gao-aob di ǃomǁae go māǁnâ.”
14 Elisab ge nēti ge ǃeream: “ǃKhūb Hoaǀgaixab ǁîb di ǃoabas ǃnâ ta mâb a ûitsama ǃkhais ao ta ra nūba tsi, gao-aob Josafati Judab diba ta ūba hâ ǃgôasib ǃaroma tamas ga hâ, o ta ga kō tsis xawes tsîna hî tama hâ. 15 ǀKhō-ao-e hā-ūba te.”
ǀKhō-aob harps ai ra ǀkhō hîab ge ǃKhūb di ǀgaiba Elisab ai ge hā 16 tsîb ge ge mî: “Nētib ge ǃKhūba ra mî: ‘Nē ǂnâsa ǃāb ge ǁgamǀaudi xa nî ǀoa. 17 ǂOa-i tamas ka io ǀnanu-e du mû tide, xaweb ge nē ǃāba ǁgam-i xa nî ǀoa tsî du ge sago, sago ǀgoan tsî sago ûitsama xūn ǃnao-ai go hân tsîdu hoado nî ā.’ ” 18 ǃAruǀîb ge Elisaba ge mî: “ǃKhūba kaise supuba xū-i ge nēb go dība du-e, ǁîb ge ǁkhāti Moabǁîna sago ǃomǁae nî māǁnâ. 19 Sago ge ǁîn di omǂnamisa ǃādi tsî ǀō-aisa ǃādi tsîna dan tsî ǁîn di îxa haidi hoade ǁhāǁnâ, ǀaude ǁhanǂgan tsî ǃgâi ǃhanagu hoaga ǀuin ǀkha nî ǀoaǀoa.”
20 Sao ra ǁgoaga, ǁnaetihesa ǁguibas ǁaeb ai i ge ǁgam-e Edommi ǀkhāba xu dâuǀkhī tsî hoaraga ǃkhaiba ge ǀoaǀoa.
21 Moabǁîn ge ǃnona gao-aogu ge ǁîn ǃoagu nî torodīse hā ǃkhaisan ge ǁnâu, o ǁâtanisen ǁkhā khoegu hoaga, ǂkhamga xu kaigu kōse ge ǂgaikhâi, î gu ǃhūǀgoras tawa sī mâ. 22 Nau ǁgoaga gu ge Moabǁîga khâimâ, os ge ǁgoasoresa ǁgam-i ai gere ǂkhai tsî ǁgam-e ǀaoǀapase gere mûsen kai. 23 O gu ge ǁîga ge ǃau: “Nēb ge ǀaoba! Gao-aogu toroǂnubidi ge ǁîǃnābe ǃkham tsî go ǃgamgu. Moabǁîgo, ǁîgu hâǃkhaib ǁga ǃhae, î go xūna ǁkhâuǁnâbasen.”
24 Xawe Israelǁîgu di hâǃkhaib tawa gu ge sī, o gu Israelǁîga Moabǁîgu ǃoagu ǃkham tsî ǁîga ge dan. Moabǁîgu ge ǁhâ, o gu ge Israelǁîga ǁîga ǃgôaǃgon tsî ǃgam tsî Moab ǃnâ ge ǂgâ. 25 ǁÎn di ǃāde hîkākā tsî gu ge ǁîga, mâb hoaba ǀui-e ū tsî ǃhanagu ân ǃnâ ge aoǂgā ǀuin xa gu ge ǀoas kōse. ǁKhāti gu ge ǀaudi hoade ǁhanǂgan tsî îxa haidi hoade ge ǁhāǁnâ. Kir-Heres ǀguis ge ge ǃgau, o gu ge slengerde ūhâ toroǃkhamaoga ǁîsa ǃnamiǂgā tsî ge ū.
26 Moabǁîn di gao-aob ge ǃkhamsab ra ǂoaǃnâ ǃkhaisab ge mû, o hûkaidisi aogu, gôagu ǀkha ǁâtanisen hâga ū tsî Edommi gao-aob ǀkhāb ai ǃkharusa gere ǁgūtsâ, xaweb ge hō-am tama ge i. 27 Ob ge ǁîb di ǂguro ǀgôab, ǁîb soas ǃnâ nî gao-ao kaise iba ū tsî ǂnubiǂgoab ai ge ǁguiba. O gu ge Israelǁîga kaise ǃao tsî ǁnāpa xu dabasen tsî ǁîn di ǃhūb ǁga ge oa.
© Khoekhoegowab Elobmîs © Bible Society in Namibia, 2020.
