Israeli di gao-aob Joahasi
1 ǀGamdisiǃnonaǀaǁî kurib Ahasiab ôab Joasi ge Judab gao-aose ǂgaeǂgui hâ ib ǃnâb ge Jehub ôab Joahasa ge Israeli gao-ao kai. ǁÎb ge disihûǀa kuriga Samarias ǃnâ ge gao. 2 ǁÎb ge gao-aob Jerobeammi ǁkhāb khami ǃKhūb mûǁae ǂkhabana dī tsî Israelǁîna ǁoreb ǃnâ ge ǂgaeǂguiǂgā. ǁÎb ge ǁnā ǂkhabadīga ge ǀû tama hâ i. 3 ǁNā-amagab ge ǃKhūba Israeli ǀkha ǁaixa tsî Siriab gao-aob Hasaeli tsî ǁîb ôab Benhadadi tsîkha xan nî danhesa ge mā-am. 4 Ob ge Joahasa ǃKhūb ǃoa ge ǀgore tsîb ge ǃKhūba ǁîb di ǀgoresa ge ǁnâu-am, mâtikō ǁkhōseb Siriab gao-aoba Israelǁîna ra sîsenū ǃkhaisab ge mû xui-ao. 5 ǁÎb ge Israelǁîna ǂgaeǂgui-aob, ǁîna ge Siriaǁîna xu a ǃnoraǃnoraba ge sîba, tsîn ge Israelǁîna aiǃân ge hâ i khami ǂkhîb ǃnâ ge ûi. 6 Xawen ge Israelǁîna ǁnā ǁoreb gao-aob Jerobeammi ge ǁîna, ǁîb ǃnâ ǂgaeǂguiǂgāb ǁkhāba ǀûs ose gere dī tsîb ge ǁgôa-elos Aseras ība Samarias ǃnâ ge mâhâhâ.
7 Joahasi ge toroǂnubi-i xare-i xa ǃgaubahe tama ge i; korodisi hāǃgapi-aogu, disi torokunidi tsî disiǀoadisi ǀnūǃgû-aogu ǀguigu ge ge ǃgau hâ i, Siriab gao-aob ge naugu hoaga hîkākā tsî tsarab kōse dāǂkhū xui-ao.
8 Joahasi ge dī xūn hoan tsî ǁîb di ǁkhoaǂgaoxa sîsengu tsîn ge ǃNaeǃkhaidi ǂKhanis Israeli Gao-aogu dis ǃnâ a xoamâisa. 9 ǁÎb ge ǁō tsî Samarias ǃnâ ge ǁkhōhe tsîb ge ǁîb ôab Joasa ǁîb soas ǃnâ ge gao-ao kai.
Israeli di gao-aob Joasi
10 ǃNonadisihûǀaǁî kurib Judab gao-aob Joasi di ǂgaeǂguis dib ǃnâb ge Joahasi ôab Joasa ge Israeli gao-ao kai; ǁîb ge disiǃnonaǀa kuriga Samarias ǃnâ gao-aose gere ǂgaeǂgui. 11 ǁÎb on ge ǃKhūb ǃoagu gere ǁore tsî gao-aob Jerobeammi Israela ge ǁoreb ǃnâ ǂgaeǂguiǂgāb di ǂkhaba aiǁgausa gere sao. 12 Joasi ge dī xūn hoan tsî ǁkhoaǂgaoxasib, Judab gao-aob Amasiab ǃoagub ge torodī-ūb ge ǃNaeǃkhaidi ǂKhanis Israeli Gao-aogu dis ǃnâ a xoamâisa. 13 Joasi ge ǁō tsî Samarias ǃnâ gao-aogu ǀhobadi tawa ge ǁkhōhe, tsîb ge ǁîb ôab Jerobeamma ǁîb soas ǃnâ ge gao-ao kai.
Elisab di ǁōb
14 Kēbo-aob Elisab ǃgomse ǀaesen tsî ǁō ǁga rase ǁgoe, hîab ge Israeli gao-aob Joasa ǁîba ge sari; tsîb ge ā rase ge mî: “Ti îtse, ti îtse, sats ge ǀgaisa ǁkhauba-aose Israela ge ība i.”
15 Ob ge Elisaba “Khās tsî ǂāgu tsîna hā-ū” ti ge mîmā bi. Joasi ge ǁîna a hā-ū, 16 ob ge Elisaba ge mîba bi, îb ǁkhâub nîse ǂhomisen. Tsî gao-aob ge ti a dī, ob ge Elisaba ǁîb ǃomkha gao-aob dikha ai ge ǁgui. 17 ǁNās khaoǃgâb ge gao-aoba kēbo-aob mîmās ai, Siriab ǃoa-ai hâ mûǂuidaosa ge ǁkhowa-am. “ǁKhâu” tib ge Elisaba ge mîmā tsî gao-aob ge ǁkhâu, ob ge kēbo-aoba ge mî: “Nē ǂāb ge Siriab ǂamab ǃKhūba nî mā tsi dans di ǁgauǁgause ī. Sats ge Siriaǁîna Aspeks ǃnâ dan tsî nî hîkākā.”
18 Tsîb ge Elisaba gao-aoba ge mîba, îb nau ǂāga ū tsî ǃhūba ǁîgu ǀkha ǂnau, ob ge gao-aoba ǃhūba ǃnona ǃnāde ǂnau tsî ge ǀû. 19 Elisab ge nē ǃkhais xa kaise ǁaixa tsî gao-aob ǃoa ge mî: “Koro tamas ka io ǃnani ǃnādets ga ǂnau hâ, ots ge Siriaǁîna hoaragase ga danǃari hâ; xawe nēsits ge ǁîna ǃnona ǃnādi ǀguide nî dan.”
20 Tsîb ge Elisaba ǁō tsî ge ǁkhōhe.
Mâ kurib hoaba gu ge Moabǁî ǁnāǂamaoga Israela gere ǁnāǂam. 21 ǀGui ǃnā-en ge khoena khoe-en ra ǁkhō hîan ge Moabǁî ǁnāǂamaoga a mû, o ǁō hâb sorosa Elisab ǀhobas ǃnâ aoǂgā tsî ge ǃkhoeni. Tsî soros ge Elisab ǂkhōna a tsâǀkhā, ob ge nē khoeba ûi tsî ge khâimâ.
Torob Israeli tsî Siriab tsîkha ǁaegu
22 Joahasi ge Israeli ǂama gao-ao i ǁaeb hoaragab ǃnâb ge Siriab gao-aob Hasaela Israelǁîna gere ǁgâiǀā, 23 xaweb ge ǃKhūba ǃgâi tsî ǁîna ge ǀkhomxaǃnâ. ǁÎb ge ǁîn nî hîkākāhe ǃkhaisa mā-am tama i, tsî ǁîna Abrahammi, Isaki tsî Jakob tsîgu ǀkhab ge dī hâ i ǃgaeǀhaos ǃaroma ge hui. ǁÎb ge ǁîb di ǁaesa tātse ge ǀuru tama hâ i.
24 Siriab gao-aob Hasaeli ge ǁō, ob ge ǁîb ôab Benhadada ge gao-ao kai. 25 Ob ge Israeli gao-aob Joahasa Benhadada ǃnona ǃnādi kōse dan tsî ǁîb ge Joasi îba xu torob ǃnâ ūhâ i ǃāde ǁkhawa ge ū-oa.
© Khoekhoegowab Elobmîs © Bible Society in Namibia, 2020.
