Judab di gao-aob Joasi
(2 Kroniks 24:1-16)1 Hûǁî kurib Israeli gao-aob Jehub di ǂgaeǂguis dib ǃnâb ge Joasa ge Judab di gao-ao kai tsîb ge hakadisi kuriga Jerusalems ǃnâ ge gao. ǁÎb îs ge Sibias, Bersebas di ge isa. 2 ǁÎb ûitsēdi hoadeb ge ǃKhūba a ǃgâibana gere dī, prister Jojadab gere ǁkhāǁkhā bi xui-ao. 3 Xaweb ge ǁîba ǁgôa-eloǃoabaǃkhaide ge hîkākā tama hâ i tsîs ge ǁaesa noxopa khauǁguibadi tsî ǀanǀanǁguibadi tsîna ǁnāpa sī gere ǁguiba.
4 Joasi ge pristerga ǂgai tsî ge mîmā, î gu ǁguibas ase Tempela ǃoa ra hā-ūhe marina ū; ǁgui-aimarin tsî māsenxasen ra khoena mā marin tsîn hoana. 5 Ab mâ pristeri hoaba ǁîb ra ǃoaba khoen ra hā-ū marina ūǃoa, î go ǁnā marin ǀkha Tempeli tawa hâ khôaǃkhaina kuru.
6 Xawe gu ge pristerga ǀgamdisiǃnonaǀaǁî kurib Joasi gaosis dib kōse Tempela noxopa ge dī-unu tama hâ i. 7 Ob ge Jojadab tsî nau pristergu tsîna ǂgai tsî ge dî: “Tare-i ǃaroma go Tempela dī-unu tama? ǃAruǀî go ge māhe go ra mari-e ūǀgara tide tsî ǁî-e nî māǁnâ, îb Tempela dī-unuhe.” 8 O gu ge pristerga ge mîǀgui ǃaruǀî gu mari-e ūǀgara tide tsî gu ǁkhāti Tempeli tsîna dī-unu tidesa.
9 ǁNās khaoǃgâb ge Jojadaba ǂgaesa ū, āsa ǂganais âs ǃnâ ǃnam tsî ǁîsa altars tawa, khoen Tempeli ǃnâ ra ǂgâxapa, amǀkhāb ai ge mâi. Tsî gu ge Tempeli di dao-ams tawa gere ǃoaba pristerga hā-ūhe ra marin hoana ū tsî ǁîs ǃnâ gere ǂgā. 10 Kai ǃgôab mari-i ge ǂgaes ǃnâ gere hâ ǁaeb hoaba kha ge gao-aob di xoa-aob tsî ǀgapipristeri tsîkha mari-e ǃgôa tsî ǁhōdi ǃnâ gere ǃgaeǀkhā. 11 ǃGôatoa kha kas khaoǃgâ kha ge Tempela dī-unus ǂama ǁguiǂamsa ūhâ khoega ǁî-e gere mā tsî gu ge ǁîga ǃnaokuru-aogu, omaogu, 12 ǂnubiǂgoakuru-aogu tsî ǀuiǁhā-aogu tsîga matare, hain tsî ǀuidi Tempeli gere dī-unu-ūhen tsîna ǁama tsî hoaraga ǂhâbasa xūna gere matare. 13 Xawe i ge ǁnā mari-e ǀhaiǀuri xapan, xâiǁnâdi, ǁaraǂao-ūxūn tamas ka io nau ǀhaiǀuri tsî ǃhuniǀuri xūna dīs ǃaroma ge sîsenūhe tama hâ i. 14 ǁÎ-i ge sîsenaoga matares tsî dī-unu-ūhe ra xūna ǁamas tsîn ǃaroma ǀgui gere sîsenūhe. 15 Nē sîsenna ra mûǂam khoegu ge ǂhauǃnâ i xui-ao gu ge mari-i ǂama ǃnuriba māsa ge ǂgaoǀkhāhe tama hâ i. 16 ǀHapiǁguibas tsî ǁoreǁguibas tsîra di marin ge ǂgaes ǃnâ ge ǂgāhe tama hâ i; ǁîn ge ge pristergu di i.
17 ǁNā ǁaeb ǃnâb ge Siriab gao-aob Hasaela Gats ǃoagu torodī tsî ǁîsa ge dan; ǁnās khaoǃgâb ge Jerusalems tsîn ǃoagub ga torodīsa ge ǂâibasen. 18 Ob ge Judab gao-aob Joasa hoaraga xūn ǁîb aiǃgû-aogu Josafati, Jorammi tsî Ahasiab tsîgu ge ǃKhūba khaiban tsî ǁîb di xūn tsî hoaraga ǃhuniǀurib tsî ǁuib Tempeli dib tsî gao-ommi dib tsîna ǀkhaeb ase gao-aob Hasaela ge sîba, ob ge ǁîba toroǂnubis âba Jerusalemsa xu ge ǂgae-oa.
19 Gao-aob Joasi ge dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa.
20-21 Gao-aob Joasi ǂamkhoegu ge ǁîb ǃoagu ge ǀapeǀhao tsî kha ge ǁîgu di ǀgamkha, Simeab ôab Josakari tsî Someri ôab Josabadi tsîkha ǁîba Jerusalems aiǂoasǀkhāb ai, Silas ǁga garu daob xōǀkhā mâ oms ǃnâ ge ǃgam. Joasi ge ǁîb aboxagu di ǀhobadi tawa Davidi ǃĀs ǃnâ ge ǁkhōhe tsîb ge ǁîb ôab Amasiaba ǁîb khaoǃgâ ge gao-ao kai.
© Khoekhoegowab Elobmîs © Bible Society in Namibia, 2020.
