Axab ôananôagub di ǃgamhes
1 Gao-aob Axab ge hûdisi ǀgôagu tsî ǁnurisagu tsîna Samarias ǃnâ ge ūhâ i. Jehub ge sîǂkhanide xoa tsî Jesreels di ǂgaeǂgui-aogu tsî Axab ôananôagub di kaikai-aon tsîna ge sîba. Nētib ge ge xoa hâ i: 2 “Gao-aob di ôananôagub ge sago ǃûiǃgâs ǃnâ hâ tsî go ge ǁkhāti torokunidi, hān, ǁâtanin tsî omǂnamisa ǃādi tsîna ūhâ, 3 o nēsi ǁnâi gao-aob di ôananôaguba xu ǀguib ǁnâuǃāxab khoeba ǁhûi, î ǁîba gao-aodī, î go ǁîba ǃkhamba.”
4 O gu ge Samarias ǂgaeǂgui-aoga kaise ǃao tsî ge mî: “Mâti ge Jehuba nî mâǃoa ǁkhā, gao-aob Jorammi tsî gao-aob Ahasiab tsîkha xawekha ga ǁîb ǃoagu mâ ǁoao?” 5 On ge gao-ommi ǂamkhoeb, ǃās ǂamkhoeb, ǃās ǂgaeǂgui-aon tsî ǀgôakaikai-aon tsîna Jehuba ge haisiba: “Sida ge sa ǃgāda tsî da ge sats ga mî xū-i hoa-e nî dī, xawe da ge Khoe-i xare-e gao-aodī tide, xuige satsa a ǃgâiba khami dī re.”
6 Ob ge Jehuba ǀgamǁî sîǂkhanisa ǁîna ge xoaba: “Tita ǀkha ǀgui tsî du ga tita ra mîmā du khami dī ǂgao-o, o gao-aob Axab ôagu di danade ǁari nē ǁaeb ai Jesreels tawa hā-ūba te.”
Gao-aob Axab di hûdisi ǀgôagu tsî ǁnurisagu tsîn ge Samarias ǂgaeǂgui-aogu, ǁîga gere kaikaigu ǀkha ge hâ i. 7 Jehub sîǂkhanisa gu ge hō, o gu ge Samarias ǂgaeǂgui-aoga hoa hûdisi ǀgôagu Axab diga ǃgam, danadi âga ǀharudi ǃnâ ǂgā tsî Jehuba Jesreels ǁga ge sîba.
8 Axab ôagu di danadi go hā-ūhe ǃkhaisab ge mîbahe, ob ge Jehuba ge mîmā, î di ǀgam ǁkhopora ǃnâ ǃās di dao-ams tawa ǃnaroǂnûihe tsî ǁnāpa ǁgoas kōse ǁnāxūhe. 9 Tsîb ge ǁgoaga ǃās di dao-ams tawa sī tsî ǁnāpa ge hâ i khoen ǃoa ge mî: “Tita ge gao-aob Jorammi ǃoagu ǀapeǀhao tsî ge ǃgam bi ta, sa tama du ge; xawe tari-e nēgu hoaga go ǃgam-e? 10 Nēs ge ra ǁgau ǃKhūb ge Axab ôananôagub xa mîn hoan nî ama īsa. ǃKhūb ge ǁîb kēbo-aob Eliab ǃnâ-ub ge mî xūn hoana go dī.” 11 ǁNās khaoǃgâb ge Jehuba nau hoaraga surib Axab dib, Jesreels ǃnâ hâba ge ǃgam; hoaraga ǂamkhoegu âb, horesagu tsî pristergu tsînab ge ge ǃgam, ǀgui-i tsîna ǁnāxūǂui tamase.
Gao-aob Ahasiab surib di ǃgamhes
12 Jehub ge Jesreelsa xu Samarias ǁga ge ǃgû. ǁNāǀîb garu hîab ge Gūǃûi-aogu ǃHarab tawa 13 ǀnî ǀaokhoegu Judab gao-aob Ahasiab digu ǀkha ge ǀhao, ob ge ǁîga ge dî: “Tarigo sago?”
O gu ge ǁîga ge ǃeream: “Ahasiab ǀaokhoege ge. Sige ge Jesreels ǁga garu, gaoǀgôagu tsî gao-aos Isabels di ôan tsîna ge nî sarise.” 14 Ob ge Jehuba ǁîb khoega ǃoa “ǁÎga ǃkhō” ti ge mî. O gu ge ǁîb khoega ǁîga ǃkhō tsî ǁnāpa tsaub ams ai ge ǃgam. ǁNāpa gu ge hakadisiǀgamǀa khoega ge hâ i tsî gu ge ǀguib tsîn ûiǃgau tamase hoaga ge ǃgamhe.
ǃGau hâ ǀaokhoen Axab din hoan di ǃgamhes
15 ǁNāpa xub ge aiǃâb ǁga ǃgû, ob ge Jehuba Rexab ôab Jonadab ǀkha ge ǀhao. Ob ge Jehuba ǁîba tawede tsî ge mî: “Sats tita ǂgomǃgâ hâ khami ǂgomǃgâ tsi ǁkhā ta a?”
Ob ge Jonadaba “Î, ǂgomǃgâ te ǁkhāts a” ti ge ǃeream.
“Sa ǃomma ǁnâi mā te” tib ge Jehuba ge mî. O kha ge ge tawedegu tsîb ge Jehuba ǁîba kunis ai ǂoa kai 16 tsî ge mî: “Tita ǀkha ǃgû, îts mâti ta ǃKhūb ǃoagu a ǂgomǂgomsa ǃkhaisa mû.” Tsî kha ge hoakha Samarias ǁga ge ǃnari. 17 ǁNāpa kha ge sī, ob ge Jehuba ǀgui-i tsîna ǁnāxūǂui tamase Axab ǀaokhoen hoana ge ǃgam. Nēs ge ǃKhūb ge Eliaba mîba hâ i khami ge ī.
Baali ǀgoreǀî-aon hoan di ǃgamhes
18 Jehub ge Samarias di khoen hoana ǂgaiǀhao tsî ge mî: “Gao-aob Axab ge Baala ǂkharirose ǀgui gere ǃoaba, xawe tita ge ǁîba kaise ǃnāsase nî ǃoaba. 19 Baali di kēbo-aogu hoagu, ǁîba ra ǀgoreǀîn hoan tsî ǁîb di pristergu hoagu tsîna ǂgaiǀhao; tāb ǀguib tsîna ǀkhai, kai ǁguibasa ta Baala nî ǁguiba xuige. ǀKhai karab hoab ge nî ǃgamhe.” (Jehub ge nēsa gāxaǃnâ ǀapes ǀkha ge dī, Baali ǃoabasaben hoanab nî ǃgamga.) 20 Tsîb ge ge mîmā: “Baala ǁîb di ǃgôasiba ǃoa ǀō-aisa tsē-e khaiba.” Os ge ǁnā tsēsa ge khaihe 21 tsîb ge Jehuba sîsabega Israeli hoaragab ǃnâ ge sîǂui tsîn ge Baali ǃoabasaben hoana ge ǀhao, ǀgui-i tsîn hâ-oa tamase. ǁÎn hoan ge Baali di tempeli ǃnâ ge ǂgâ, tempeli ge amose ǀoas kōse. 22 Tsîb ge saran ǂama ǃûisa ūhâ khoeba ge mîmā, îb sarana ǂoaxa-ū tsî Baali di ǀgoreǀî-aona mā. 23 ǁNās khaoǃgâb ge Jehuba Rexab ôab Jonadab ǀkha tempeli ǃnâ ǂgâ tsî ǁnā khoena ǃoa ge mî: “Kōǃgâ Baali ǃoabasaben ǀguin nēpa hâ tsî i ǃKhūb di ǃoabasabe-i xare-e nēpa ǂgâxa tamasa.” 24 ǁÎb tsî Jonadab tsîkha ge ǁguibadi tsî khauǁguidi tsîna kha nî ǁguibase a ǂgâ, ob ge ǁîba ǁkhaisadisi khoega tempeli ǃauga mâ kai tsî ǁîga ge mîmā: “Nē khoen hoana go ge nî ǃgam. ǁÎn di ǀgui-e ga ûiǂoa kaib ge ǁîb di ûib ǂûb ǀkha nî matare.”
25 Khauǁguibadi ǀguide ǁguibatoa tsîb ge Jehuba ǃûi-aogu tsî ǂamkhoegu tsîn ǃoa ge mî: “ǂGâ, î hoana sī ǃgam, tā ǀgui-i tsîna ûiǂoa kai.” O gu ge ǂgâ tsî ǁîna gôagu ǀkha ǃgam tsî ǁîn sorode ge aoǂui. Tsî gu ge tempeli di ǂganaga hâ ǃnā-oms kōse ǂgâ 26 tsî Baali ība ǁnāpa xu ūǂui tsî ge ǂhubiǂui. 27 ǁNāti gu ge īb tsî tempeli tsîkha khôaǂkhū tsî tempela ge ǂkhari-omdī, nēsis kōseb ī khami.
28 ǁNātib ge Jehuba Baali ǃoabasa Israeli ǃnâ ge hîkākā. 29 Xaweb ge ǁîba gao-aob Jerobeammi, Israela ge ǁoreb ǃnâ ǂgaeǂguiǂgā tsî ǃhuniǀuritsâukha, Betels tsî Dans tsîra ǃnâ gere ǀgoreǀî kaib di ǁoreb ǁkhāba gere dī. 30 ǃKhūb ge Jehub ǃoa ge mî: “Sats ge Axab di ôananôagub ǀkha tita dīts nîsa ǂhâba hâ xūn hoana go dī. ǁNā-amaga ta ge ra mîmâiba tsi, sa surib hakaǁî ǃhaos kōse Israeli ǂama nî gaosa.” 31 Xaweb ge Jehuba ǁîb ǂgaob hoab ǀkha ǃKhūb, Israeli di Elob di ǂhanuba ge ǁnâuǀnam tama hâ i. ǁÎb ge Jerobeammi, Israela ge ǁoreb ǃnâ ǂgaeǂguiǂgāb di aiǁgausa ge sao.
Jehub di ǁōb
32 ǁNā ǁaeb ǃnâb ge ǃKhūba Israeli di ǃhūǀkhariba ge ǂkhariǂkharitsoatsoa. Siriab gao-aob Hasaeli ge ǁîna Israeli ǀkharigu hoagu ǃnâ ge dan, 33 Jordanni aiǂoasa xu Arnonǃāb tawa ǀapas ǃnâ ǂnôa ǃās Aroers kōse; nēs ge Gileadi tsî Basanni tsîkha ǀkharib, Gadi, Rubenni tsî Manaseb ǃhaodi ge ǁanǃnâ hâ iba ǃkhōǂgā hâ.
34 Jehub ge dī xūn hoan, ǁîb ǁkhoaǂgaoxa dīgu hoagu ge ǃNaeǃkhaidi ǂKhanis Israeli Gao-aogu dis ǃnâ a xoamâisa. 35 ǁÎb ge ǁō tsî Samarias ǃnâ ge ǁkhōhe tsîb ge ǁîb ôab Joahasa ǁîb soas ǃnâ ge gao-ao kai. 36 Jehub ge ǀgamdisiǁkhaisaǀa kuriga Israeli gao-aose Samarias ǃnâ gere ǂgaeǂgui.
© Khoekhoegowab Elobmîs © Bible Society in Namibia, 2020.
