1 ǀNamsabedo, ǁnāti ī mîmâide da ūhâ amaga da ge soros tsî gagas tsîra ǀuriǀuri ǁkhā xū-i hoa-e xu nî ǃanuǃanusen, î da Elob di ǃgôasib ase ǀoasase ǃanuǃanusen.
Paulub di ǃgâiaǂgaob
2 A ge sige sadu ǂgaogu ǃnâ ǂgâǃkhai-e hō! Khoe-i xare-e ge tsūse ûi-ū tama, khoe-i xare-e ge ǂkhôa tama tsî ge khoe-i xare-e dīhāpu tama. 3 ǀGoraǃgâ du ta nîse ta ǁîsa mî tama, ǀnai ta kom go mîo, sige ǂgaogu ǃnâ du hâ tsî da ǁō da kas, ûi da kas hoasa hoaǁae ǀguipa hâ ǃkhaisa. 4 Kai ǂgomǃgâsa ta ge sadu ǃnâ ūhâ; kai koasensa ta ge sadu xa ūhâ. Sige ǃgomsigu hoagu ǃnâ ta ge ǁkhoaǂgaosib xa ǀoa hâ tsî ta ge ǃnāǂamsase ra ǃgâiaǂgao.
5 Masedoniab ǃnâ ge ge sī, o ge ge sorosise sâ-e ge ūhâ tama hâ i, xawe ge ge hoan ǃnâ ge ǁgâiǀāhe hâ i, ǃaugaba xu ǃkhamdi xa tsî ǂganagaba xu ǃaob xa ge xāǂgāhe hâ i. 6 Xaweb ge Elob, ǃâubasenoǃnâna ra ǁkhaeǂgaoba, Titub di hās ǀkha sige ge ǁkhaeǂgao. 7 ǁÎb di hās ǀguis ǀkha tama i, xawe ǁkhāti ǁnā ǁkhaeǂgaos ǁîs ǀkhab ge sadu ǃnâ ǁkhaeǂgaohe hâ is ǀkha, sadu di ǁkhoreb xab ge sige ǂhôao. Tsî sadu di āb tsî tita ǂama du ūhâ ôasasib xa ta ge ǁnās ǃgâ-ai ge ǃgâiaǂgao.
8 Ti sîǂkhanis ǀkha ta ge ǃoa kai du ǃkhais xa ta ge ge ǃhausen, xawe ta ge ǃnubu ǁaero-i ǀgui-e du ge ǃoa ǃkhaisa ta ge ǁnâu, o ǁnās ǂama ǃhausen tama ge i. 9 O ta nēsi ra ǃgâiaǂgao, ǃoaǃoahe du ge ǃkhais ǃaroma tama, xawe ǃhobasens ǃoa du ge ǃoaǃoahe ǃkhais ǂama. Elob ra ǂgao khami du ge ǃoaǃoahe tsî sige xa mâ ǀgau-i hoa-i ai tsûtsûhe tama hâ i xui-ao. 10 Eloba xu hâ ǃoab ǃgâiǃōsib ǃoa garu ǃhobasens tātsē ǃhausenhe tidesa ra sîsenǂui, xaweb ǃhūbaiba xu hâ ǃoaba ǁōba ra hā-ū xui-ao. 11 Mû, tare-eb Eloba xu hâ ǃoaba sadu ǃnâ ra sîsen ǃkhaisa: ǀAexasib, ǀhapiosis ǃaroma ǂnoabasens, ui-uisasiba mâǃoas ǁkhāsib, ǃaob, ǁkhoreb, ôasasib tsî ǁkharab tsîna. Nēn hoan ǃnâ du ge ǀhapiose ge ǁgausen.
12 ǁNā-amaga, sado ta ge xoaba, xawe ta ge ǁîsa ǁkhawa tsūse ge dīb tamas ka io tsūdīhe geb ǃaroma dī tama hâ, sige du ūba hâ ôasasib nî sadu ǃnâ Elob di ais aiǃâ ǂhaiga. 13 Sige ge nēn hoan xa ge ǂgaoǂgaoǃnâhe.
Tsî ge ge ǁnās ǃgâ-ai ge ǃgâiaǂgao kaihe Titub di ǃgâiaǂgaob ǀkha, ǁîb di gagas ge sadu hoadu xa khoakhoahe hâ i xui-ao. 14 Sadu xa ta ge ǁîb aiǃâ koa xū-i hoa-i ǃnâ ta ge tao kaihe tama hâ, tsî hoana ge ge amab ǃnâ sadu ǃoa ǃhoas ǁkhās khamis ge ǁkhāti Titub ai ge ge koasa ama kai xui-ao. 15 ǁÎb ǀnammi sadu ǃoa hâb ge sadu a ǁnâuǀnamxa ǃkhaisab ra ǂâihō, o ra ǀgai tsî mâti du ge ǁîba ǃgôasib tsî ǃaoǃgâb ǀkha ǃkhōǃoa ǃkhaisa. 16 O ta ra ǃgâiaǂgao, sadu ai ta ǀoasase mûmâinǃgâ ǁkhā ǃkhais xa.
© Khoekhoegowab Elobmîs © Bible Society in Namibia, 2020.
