Salomob ge sīǃnâ xūn
(1 Gao-aogu 9:10-28)1 Salomob ge ǀgamdisi kurigu ǁaeb ǃnâ Tempeli tsî ǁîb di gao-ommi tsîkha ge kuru. 2 ǁÎb ge ǁkhāti gao-aob Hirammi ge mā bi ǃāde ǁkhawa ǂnubikhâi tsî Israelǁîna ǁîdi ǃnâ ge ǁan kai. 3 ǁÎb ge Hamats tsî Sobas tsîra ge ū, 4 tsîb ge Tadmors, ǃgaroǃhūb ǃnâ ǂnôasa ge omǂnami. ǁKhātib ge xūn di sâuǃnâ ǃādi, Hamats ǂnamipe hâdi hoade ǁkhawa ge ǂnubikhâi. 5 Salomob ge ǁkhāti sao ra ǃāde ǁkhawa ge ǂnubikhâi: ǀGapikab-Bet-Horons tsî ǃNakab-Bet-Horons tsîra (omǂnamisa ǃāra ǃnâu-amhe ǁkhā dao-amde ūhâra), 6 Balats, xūnab ge sâuǃnâ hâ i ǃādi hoadi tsî ǁîb di hān tsî torokunidi tsîn ge hâǃnâ i ǃādi hoadi tsîna. Jerusalems, Libanonni tsî ǁîb ǂgaeǂguis ǃnaka ge hâ i ǃhūb hoab ǃnâb nî ǂnubiseb ge ǀapeǁgui hâ i xūn hoanab ge ge dīǀoaǀoa. 7-8 Salomob ge Israelǁîn ge Kanaanǃhūban ge ū ǃnubai, ǃgam tama i khoena ǁgarisîsenna gere dī kai. ǁNān ge Hetǁîn, Amorǁîn, Perisǁîn, Hivǁîn tsî Jebusǁîn, nētsēs kōse khobosîsenaon ase hâna. 9 Israelǁîn ge ǁgarisîsenni ǃnâ ge sîsenūhe tama hâ i, xawe toroǃkhamaose tsî ǂamkhoese tsî torokunidi ǂgaeǂgui-aose tsî hāǃgapi-aose gere ǃoaba. 10 ǀGamkaidisi tsî korodisi ǂamkhoegu ge gao-aob Salomob di sîsenga ra dī sîsenaoga gere mûǂam.
11 Salomob ge ǁîb di taras, Egipteb gao-aob ôasa, Davidi ǃĀsa xu ǁîsab ge omba omma ǃoa ge doe-ū. ǁÎb ge ge mî: “ǁÎs ge Israeli gao-aob Davidi di gao-ommi ǃnâ a ǁan tide, ǃGaeǀhaos ǂGaes ge ǁîdi ǃnâ hâ i ǃkhaidi hoadi a ǃanu xui-ao.”
12 Salomob ge Tempeli ais aib ge ǂnubi altars ai ǃKhūba ǁguibade gere ǁguiba. 13 ǁÎb ge Moseb ǂhanub di ǂgaoǀkhāde ǃoa khauǁguibade, mâ ǃanu tsēs hoas ai gere ǁguiba: Sabattsēdi, ǀAsa ǁKhâb Kaitsēdi, tsî ǃnona kaitsēdi kurikorobe gere tsēdīhedi: Khūkhū-e ūhâ tama Pere-i Kaitsēs, ǃGaos di Kaitsēs tsî ǁHaodi ǁÂudīb tsîdi ai. 14 Davidi ge mā hâ i xoaǁuiga ǃoab ge ǁîba, pristerga ǁîgu di tsēkorobe ǃoabade ge ǀgoraǂgāba tsî ǁkhāti Leviǁîgu, hîa ǁîga ǁnaeb tsî ǁîgu ǃoabadi ǃnâ ra mâxōǀkhāgu tsîga. ǁÎb ge ǁkhāti Tempelǃûi-aogu tsîna ǃnandi ǃnâ, ǁîgu di tsēkorobe ǃoabade gu dao-amdi tawa nî dīse ge ǀgoraǂgā, Elob di aob Davidi ge mîmā hâ i khami. 15 Gao-aob Davidi ge pristergu tsî Leviǁîgu tsîga sâuǃnâ-omgu tsî nau xūn tsîn ǂama mā ǁguiǂamdi ge ǀoasase gere dīhe.
16 Nētib ge Salomob di sîsenni hoaragaba ge dītoahe. ǃKhūb di Tempeli ǃgaoǃgaob ge ǁguihesa xu ǂnubitoaheb ges kōseb ge hoaraga sîsenna ge ǃgâiǃgâxa i.
17 ǁNās khaoǃgâb ge Salomoba Edomǃhūb ǃnâ ǁgoe huri-am ǃāra, Esiongebers tsî Elats tsîra ǃoa ge ǃgû. 18 Gao-aob Hirammi ge doe-omde, ǁîb ǂamkhoegu tsî hurib ǂansa ūhâ khoegu tsîn ǀkha ǁîba ge sîba. ǁÎgu ge Salomob ǂamkhoegu ǀkha Ofiri ǁga ǃnari tsî Salomoba disikoroǀaǀoadisi kiloxramgu xa ǃnāsa ǃhuniǀuriba ge hā-ūba.
© Khoekhoegowab Elobmîs © Bible Society in Namibia, 2020.
