Tempeli di khaihes
(1 Gao-aogu 8:62-66)1 Gao-aob Salomob ge ǀgoretoa, os ge ǀaesa ǀhomma xu ǁgôaxa tsî hoaraga ǁguibade ge ǂhubi, tsîb ge ǃKhūb di ǂkhaisa ǃnâba Tempela ge ǀoaǀoa. 2 Tempeli ge ǀgaisa ǃnâb xa ǀoa hâ i, xui-ao gu ge pristerga ǁîb ǃnâ ge ǂgâ ǁoa i. 3 Israelǁîn ge ǀaes ǀhomma xu ra ǁgôaxas tsî ǃnâb Tempela ra ǀoaǀoab tsînan ge mûo, aidi ân ai ǃgû-aiǂgapab ai ǁnāǁgoe tsî Eloba ǀgoreǀî tsî ǃgâisib tsî ǀamo ǀnammi âb ǃaroma ge koa. 4 ǁNās khaoǃgân ge gao-aob Salomob tsî hoaraga ǁaes tsîna ǃKhūba ǁguibade ge hā-ūba. 5 Gao-aob Salomob ge ǀgamdisiǀgamǀaǀoadisi goman tsî ǀguikaidisi tsî ǀgamdisiǀoadisi gūn tsîna ǂkhîbagus ǁguibas ase ge ǁguiba. ǁNātin ge ǁîb tsî hoaraga ǁaes tsîna Tempela ge khai. 6 Pristergu ge ǁîgu aiǂhomibahe hâ ǃkhaidi ai ge mâ i, tsî Leviǁîgu ge ǁîgu ǃoa-ai ge mâ i, ǃKhūba, gao-aob Davidi ge dī hâ i ǀkhōxūn ǀkha ra koase tsî “ǁÎb di ǀnammi ge ǀamos kōse ra hâ” ti gere ǁnae, Davidi xa gu ge ǁguiǂamhe hâ i khami. Pristergu ge hoaraga khoen mâ hîa xâiǁnâde gere xâi.
7 Salomob ge ǁaegu hâ ǃkhaib omǂnamib dib, Tempeli aisǀkhāb ai hâba khai tsî ǁnās khaoǃgâ hoase ra ǂhubiǂuihe ǁguibara, ǃhoroǁguibas tsî ǂkhîbagusǁguibas di kaub tsîna ge ǁguiba. ǁÎb ge nēsa ge dī, brons altars hîab ge kurus ge nē ǁguibadi hoade, ǁîs ai dīs ǃaroma ǂkhari i xui-ao.
8 Salomob tsî hoaraga Israelǁaes tsîn ge hû tsēde ǁnā ǁâudība ge ūhâ. Kaise kai ǂnubis khoen ge ǁnāpa ge ǀhao hâ i, Hamats di dao-ams ǀapas ǃnâ ǁgoesa xu Egipteb di ǃhūǀgoras ǃkhawagas ǃnâ ǁgoesa xus kōse. 9 ǁÎn ge hû tsēde altars di khaihesa ge tsēdī tsî hû tsēde Kaitsēsa. ǀUniga tsēs ain ge ǂganams ǁâudība ge ūhâ i 10 tsî sao ra tsēs, ǀgamdisiǃnonaǀaǁî tsēs hûǁî ǁkhâb dis aib ge Salomoba ǁaesa ge oa kai. ǁÎn hoan ge ǃKhūb ge ǁîb di ǁaes tsî Davidi tsî Salomob tsîna a mā ǀkhaegu ǂama gere ǃgâiaǂgao.
ǃKhūb ge ǁkhawa Salomoba ra ǂhai
(1 Gao-aogu 9:1-9)11 Gao-aob Salomob ge Tempeli tsî gao-ommi tsî nau xūn dī ǂgaob geren hoana ǃgâiǃgâxase dītoas, 12 khaoǃgâb ge ǃKhūba ǁîba tsuxuba ǂhai tsî ǁîb ǃoa ge mî: “Tita ge sa ǀgoresa go ǁnâu tsî ta ge nē Tempela, ǁîb ǃnâ ta ǁguibade nî ǀkhī-ūbahe ǃkhaib ase ra ūǃoa. 13 ǀNanuba ta ga ǂganams, ǂhomna ta ga ǃhoroban nî hapuse ǃhūb ǃnâ sîǂgās, ǂhīǁōba ta ga ti ǁaes ǃnâ sîs, 14 hoasa ta ge ǃgamǃgamsen tsîn ga tita ǂgaiǀî tsî tsūdīgu âna xu ǃhobaseno, ǁîna ǀhommi ǃnâ nî ǁnâu; tsî ta ge ǁîna ǁoren âna ǀûba tsî ǃhūb âna ǁkhawa nî ǃgâiǃgâxa kai. 15 Tita ge nē Tempela nî ǃûi tsî nēpa ra dīhe ǀgoredi hoade nî ǁnâu-am, 16 ǁîba ta ge ǀamos kōse ta nî ǀgoreǀîǃnâhe ǃkhaib ase ǁhûiǂui tsî khai amaga. Tita ge ǁîba hoaǁae ǃûi tsî nî sâu. 17 Tita go ga hoaǁae, sa îb Davidi gere dī khami ǂgomǂgomsase ǃoaba, ti ǂhanuga ǁnâuǀnam tsî mîmā go ta ga xūn hoana dī, 18 o ta ge ti mîmâis, Israeli hoaǁae ǁîb di ôananôagub xa nî ǂgaeǂguihe ti ta ge sa îb Davida mîbasa nî ǃkhōǀgaipe. 19 Xawe sats tsî sa ǁaes tsîn ga tita ge mā du ǂhanugu tsî mîmādi tsîna ǁnâuǀnamoǃnâ tsî ǀkhara eloga ǀgoreǀîo, 20 o ta ge mā du ta ge ǃhūba xu nî ūbē du. Tsî ta ge nē Tempeli, hîa ta ge ǁîb ǃnâ ta nî ǀgoreǀîhese khaiba nî ǁnāxū. ǁAedi hoadi mûǁaeb ge ǁîba ǃhōxūse tsî ǃharaxūhesa xūse nî i.
21 “Nē Tempeli, nēsi kai ǃgôasiba ūbahe hâb, xa i ge ǃkharu ra-i hoa-e burugâ tsî ‘Tare-i ǃaromab kha ǃKhūba, nē ǃhūb tsî nē Tempeli ǀkha ǁnāti ge dī?’ ti nî dî. 22 On ge khoena nî ǃeream: ‘ǃKhūb, ǁîn di Elob, ǁîn di aboxana ge Egipteba xu hā-ūba ǁnāxū tsîn ge ǀkhara eloga saoǃgon tsî ǁîga gere ǀgoreǀî. ǁNā-amagab ge ǃKhūba nē tsūǀkhāba ǁîn ǂama ge hā-ū.’ ”
© Khoekhoegowab Elobmîs © Bible Society in Namibia, 2020.
