2 Kroniks 6 - Khoekhoegowab New Translation 2020 (KKG20)

Salomob ge ǁaesa ra gowaǀî

1 Ob ge gao-aob Salomoba ge ǀgore:

“ǃKhūtse, sats ge ge mî,

ǃkhae ǃâus ǃnâts ra ǁan ǂgaosa.

2 Nēsi ta ge kai Tempela go ǂnubiba tsi,

ǀamos kōsets nî ǁanǃnâba.”

3 ǁNās khaoǃgâb ge hoaraga khoen Israeli din, ǁnāpa ge mâ in ǃoa dabasen tsî ǁîna Elob di ǀkhaeba ge ǂganba. 4 ǁÎb ge ge mî: “Koa re ǃKhūb, Israeli di Eloba. ǁÎb ge ti îb Davidab ge mîmâiba mîmâisa ge ǃkhōǀgaipe, nētib ge ǁîb ǃoa mîsa: 5 ‘Ti ǁaesa ta ge Egipteba xu a ǂgaeǂguiǂui ǁaeba xu ta ge Tempel-i ǁî-i ǃnâ ta nî ǀgoreǀîhe-i nî ǂnubihese ǃā-i xare-e, Israeli ǃnâ ge ǁhûiǂui tama hâ i, tsî ta ge ǁkhāti khoe-i xare-e ti ǁaes Israelsa i nî ǂgaeǂguise ge ǁhûiǂui tama hâ i. 6 Xawe nēsi ta ge Jerusalemsa ǁîs tawa ta nî ǀgoreǀîhe ǃāse go ǁhûiǂui tsî sats, Davidtsa ti ǁaesats nî ǂgaeǂguise.’ ”

7 ǃAruǀîb ge Salomoba ge mî: “Ti îb Davidi ge ǃKhūb, Israeli di Eloba ǀgoreǀîǃnâheb nî Tempela gere ǂnubiba ǂgao, 8 xaweb ge ǃKhūba ǁîb ǃoa ge mî: ‘ǃGâi i ge a, titats Tempela ra ǂnubiba ǂgaosa, 9 xawets ge satsa ǁîba ǂnubi tide. Sa ǂhunuma ǀgôab ge tita Tempela nî ǂnubiba.’

10 “ǃKhūb ge mîmâis âba go dīǀoaǀoa. Tita ge ti îb Davida Israeli di gao-aose ge saoǃgon, tsî ta ge ǃKhūb, Israeli di Eloba, ǀgoreǀîǃnâheb nî Tempela go ǂnubiba.” 11 ǃGaeǀhaos ǂGaes, ǃKhūb ge Israelǁîn ǀkha dī ǃgaeǀhaos di ǀgam ǀuiǂgapakha hâǃnâsa ta ge Tempeli ǃnâ go mâi.

Salomob di ǀgores

(1 Gao-aogu 8:22-53)

12 ǁNās khaoǃgâb ge Salomoba ǀhao hâ Israelǁîn hoan ais ai, ǃKhūb di altars aiǃâ sī mâ tsî ǃomkha âba ge ūkhâi. 13 (Salomob ge brons mâ-aiǂgawaba kuru tsî omǂnamib ǁaegub ǃnâ ge mâi hâ i. ǁÎb ge hoa haka ǀkhāgu ai ǀgam tsî ǃkhare meterga gaxu tsî ǀgui tsî ǃkhare meterkha ge ǀgapi i. ǁÎb ge ǁnā mâ-aiǂgawab ai sī ǂoa, hoa khoen ra mû bise ǃhonǁgoa tsî ǃomkha âba ǀhommiǀî ge ūkhâi.) 14 Tsîb ge ge ǀgore: “ǃKhū, Israeli di Elotse, ǀhommi ǃnâs kas, ǃhūbaib ais kas hoasa i ge sats khama i Elo-e a ǀkhai. Sa khoen ǀkhats ge dī ǃgaeǀhaosats ge ge ǃkhōǀgaipe tsîts ge sa khoeda, satsa ra ǁnâuǀnamda a ǂgomǂgomsaba. 15 Sats ge ti îb Davidats ge mîmâiba mîmâisa ge ǃkhōǀgaipe; nētsēs ge mâ mîs, sats ge mîs hoasa go dīǀoaǀoahe. 16 ǃKhū, Israeli di Elotse, nēsi ǁnâi nau mîmâis, sa ǃgāb Davidi, ti îbats ge mîmâibasa dīǀoaǀoa re, mîts ge ǃnubai: ‘Tita ge nî dī, hoaǁaeb sa ôananôagu di ǀguiba, sats ge ī i khami gu ga ǁnâuǀnamxao, Israeli ǂama nî gao ǃkhaisa.’ 17 ǃKhū, Israeli di Elotse, as ǁnā mîmâis sa ǃgāb, ti îb Davidats ge nūbasa ǃaruǀî mâǀgai re.

18 “Xawe sats Elotsa amase ǃhūbaib ai, khoen ǁaegu ǁan ǁkhāts a? ǀHommi, ā hoan xa ǀgapi ǀhommi xaweb ge satsa a ǃkhōǂgā ǁoa, o mâtib nē Tempeli tita go ǂnubiba ǂâu hâ kōse nî kai ǁkhā? 19 ǃKhū, ti Elotse, sa ǃgāta ge tita. Ti ǀgoresa ǁnâu re, î sats ǃoa ta ǀgores ǃnâ ra ǀkhomana ǁnâu-am te re. 20 Nē Tempela tsēs tsî tsuxuba ǃûi re, nē ǃkhais, ǁîs ǃnâts nî ǀgoreǀîhesets ge ǁhûiǂuibasensa. Nē Tempela ǃoa kō tsî ta ga ǀgore, o ǁnâu-am te re. 21 Sa ǃgāta tsî sa ǁaes Israels ga nē ǃkhais ǃoa kō hâse ǀgoreo, sa ǀhomsi ǁanǃkhaisa xu ǁnâu, î ǀûba da re.

22 “Khoe-i ga nau khoe-e i go tsūdī, ti ǀhapimāhe tsî sa altars ǃoa, nē Tempeli ǃnâ hā-ūhe, ǀhapio i a ǃkhaisa i nî nūseo, 23 ǃKhūtse ǀhommi ǃnâ ǁnâu, î sa ǃgāda ǀgoraǃgâ re. ǀHapixa-e dīb â-e ǃoa ǁkhara, î ǀhapio-e ǃnora kai re.

24 “Sa ǁaes Israels ga sa ǃoagun ge ǁore amaga khākhoen xa danhe, tsîn ga sa ǃoa ǃhobasen tsî nē Tempela ǃoa hā tsî ǃgamǃgamsens ǀkha ǀgore tsî ǀûbaǂgano, 25 ǁîna ǀhommi ǃnâ ǁnâu re. Sa ǁaesa ǁoren âna ǀûba, î ǁîna nē ǃhūb, ǁîn aboxagats ge māb ǃoa oahā-ū re.

26 “ǀApibats ga sa ǁaes ge sa ǃoagu ǁore amaga ǂganam, tsîn ga ǃhobasen tsî Tempela ǃoa kō hâse ǃgamǃgamsens ǀkha satsa ǂgaiǀîo, 27 ǃKhūtse ǁîna ǀhommi ǃnâ ǁnâu re. Sa ǃgāgu tsî sa ǁaes Israelsa ǁorena ǀûba, î ǁîna ǂhanu ǀgaub ai ûisa ǁkhāǁkhā, î sa ǃhūb, sa ǁaesats ge ǀamosen nî ǁanǃnâse māb ǃnâ ǀapiba sî re.

28 “ǃÂtsūǀkhāb kas, ǂhīǁōb kas, ǃhorob hîkākāhes kas, ǂgui ǂhomn ga ǃhūb ǃnâ hās kas, sa ǁaes ga khākhoen xa ǁnāǂamhes kas, mâ tsûtsû-ai-i tamas ka io ǀae-i ga ǁîn ǃnâ hās hoasa, 29 ǀgoredi âna ǁnâu re. Mâ ǀgores tsî ǀkhomas hoasa, sa ǁaes din ga ǃgom ǃoab ǃnâ, ǁîn ǃomga ǀgores ǃnâ nē Tempela ǃoa ūkhâio, 30 ǀgoredi âna ǁnâu re. Sa ǀhomsi ǁanǃkhaisa xu ǁîna ǁnâu, î ǀûba tsî hui re. Sats ǀguits ge khoesi ǂgaogu ǂâide a ǂan xuige mâ-i hoa-e ǃoaǂuis â-e ǃoa dīdawa-am re, 31 în ǁîna sats ge ǁîn aboxaga mâ ǃhūb ǃnân ûi hâs kōse, hoaǁae ǁnâuǀnam tsi.

32 “ǃHaokhoen, sa ǁaes Israels di tama tsî ǃnū ǃhūb ǃnâ ǁan hân ga sa gommi tsî kai xūn sa khoenats ge dīban xa ǁnâu tsî nē Tempeli tawa hā ǀgoreo, 33 ǁîn ǀgorede ǁnâu re. ǀHommi, sa ǁanǃkhaiba xu ǁnâu, î ǃhaokhoen ǀgores ǃnâ ra ǂgan tsina dī re, î di ǃhūbaib di ǁaedi hoade satsa ǂan tsî sa ǁaes Israels ra dī khami ǁnâuǀnam tsi, on ge hoana nē Tempeli hîa ta ge ǂnubib, sats nî ǀgoreǀîǃnâhe ǃkhaise īsa nî ǂan.

34 “Sa ǁaes ga sa mîmās ai khākhoen ân ǃoagun nî torodīse ǃgûǂoa, tsîn ga mâpa ǀguin ga hâ xawe sats ǃoa nē ǃās, sats ge ǁhûiǂuibasens tsî nē Tempeli tita ge ǂnubiba tsib ǃoa kō hâse ǀgoreo, 35 ǀgoredi âna ǁnâu-am re. ǁÎna ǀhomma xu ǁnâu, î dansa mā re.

36 “Sa ǃoagun ga ǁore; khoe-i, ǁore tama-i xare-i ge a ǀkhai, tsîts ga ǁîn ǀkha ǁaixa tsî ǁîna khākhoena a māǁnâ, ǃkhōsabesen khākhoen di ǃhūb ǃoa nî ǃgû-ūhese, 37 tsîn ga ǃkhōsabesen hâǃnâ ǃhūb ǃnâ sats ǃoa ǃhobasen tsî satsa ǂgaiǀî tsî ǁoren âna ǁguiǁnâo, ǀgores âna ǁnâu-am re. 38 ǁNā ǃhūb ǃkhōsabesen hâǃnâb ǃnân ga amase ǃhobasen tsî sats ǃoa, ǁnā ǃhūb sida aboxagats ge māb, tsî nē ǃās sats ge ǁhûiǂuibasens tsî Tempeli satsa ta ge ǂnubibab ǃoa kō hâse ǀgoreo, 39 ǀgoredi âna ǁnâu-am re. ǁÎna sa ǀhomsi ǁanǃkhaisa xu ǁnâu-am, î ǁîna ǀkhomxa tsî sa ǃoagun ge dī ǁoren hoana ǀûba re.

40 “Ti Elotse, ǀkhomxase kōǀî da, î nē ǃkhais ǃnâ da ra dī ǀgorede ǁnâu-am da re. 41 ǃKhū, Elotse nēsi khâi, î sa ǀgaib di ǃGaeǀhaos ǂGaes ǀkha Tempeli ǃnâ ǂgâxa tsî ǀamos kōse nēpa hâ. Sa pristerga dī gu ra xūn hoan ǃnâ ǀkhae, în sa khoen hoana ǁînats ūba hâ ǀkhomxaǂgaosib ǃaroma ǃgâiaǂgao re. 42 ǃKhū, Elotse tā sats ge ǁhûiǂui gao-aoba ǂhara re. Sa ǃgāb Davidats ge ūba hâ i ǀnammi xa ǂâi re.”