Sanherib ge Jerusalemsa ra ǁnāǂam
(2 Gao-aogu 18:13-372 19:14-19, 2 35-37Jesaja 36:1-22Jesaja 37:8-38)1 Nē ǃnaeǃkhaidi, ǁîdi ǃnâb ge gao-aob Hiskiaba ǂgomǂgomsase ǃKhūba gere ǃoabadi, khaoǃgâb ge Asiriab gao-aob Sanheriba Judaba ge ǁnāǂam. ǁÎb ge omǂnamisa ǃādi Judab dide dan tsî ǁîb di toroǃkhamaoga ge mîmā, î gu ǁîdi ǂnubiǂgoaga-u khôaǃganu. 2 Hiskiab ge Sanherib, Jerusalems tsîna hā ra ǁnāǂam ǂgao ǃkhaisa ge mûo, 3-4 ǁîb di ǂamkhoegu ǀkha ge mîǀgui, ǃās ǃauga hâ ǀaude xu ra ǀkhī ǁgam-e gu nî ǁkhaesa, î gu Asiriaǁîga Jerusalems ǀgūse gu ga ǀkhīo, tā ǁgam-e hō. O gu ge ǂamkhoega ǂgui khoen ǀkha ǃgûǂoa tsî ǀaudi hoade ge ǂganam, î-i tā ǁgam-i xare-e ǁîde xu dâuǂoa. 5 Gao-aob ge Davidi ǃĀs di ǂnubiǂgoab hîa ge khôa hâ iba ǁkhawa omkhâi, ǂgō-omga ǁîgu ai ǂnubi, ǃaugabǀkhāb ai noxopa ǀnî ǂnubiǂgoaba ǃās ǂnamipe ǂnubi tsî ǁhankhâisa ǃkhaib, ǀoro Jerusalems dib, aiǂoasǀkhāb diba ge ǀgaiǀgai. ǁÎb ge ǁkhāti ǂgui ǃgôab di ǁhâigôagu tsî ǁkhaukhōdi tsîna ge kuru kai. 6 ǁÎb ge ǃās di aogu hoaga ǂamkhoegu mûǂams ǃnaka mâi tsî ǁîga ge mîmā, î gu ǃās di dao-ams tawa hâ ǂgās ai ǀhao. Tsîb ge ǁîga ǃoa ge mî: 7 “ǀGai, î go ǁkhoaǂgaoxa. Tā Asiriaǁîn di gao-aob kas, ǁîb di kai toroǂnubis kas hoasa ǃao. Sage ge ǁîb ūhâs xa ǃnāsa ǀgaiba ūhâ. 8 ǁÎb ge khoesi ǀgaiba ūhâ, xawe sage ge ǃKhūb sada Eloba ūhâ, huida tsîb nî ǃkhambadase.” O gu ge aoga nē mîdi gao-aob Hiskiab didi xa ge ǁkhoa khaihe.
9 ǁAe-i ǃkharu hâseb ge Sanheriba, ǁîb di toroǂnubis ǀkhab noxopa Lakis ǃnâ hâ hîa, Hiskiab tsî Judab di khoen Jerusalems ǃnâ hân tsîna nēti ge haisiba: 10 “Tita, Asiriab gao-aota Sanherita ge ra dî, tare-i ai du ra mûmâinǃgâ, o du ǁnāǂamhes ra hîa noxopa Jerusalems ǃnâ hâ? 11 Hiskiab ge ǃKhūb, sadu Elob sida ǀgaiba xu nî huiǂui du ti ra mîba du, xaweb ge ǁîba sado ra ǂgaeǂhapu, î du ǃâs tsî ǁgâs xa ǁō. 12 ǁÎb ge ǃKhūb di ǀgoreǀîǃkhaidi tsî altardi tsîna hîkākā tsî ge Judab tsî Jerusalems tsîra khoen ǃoa mîba, ǀgui altars tawa ǀguin nî ǀgoreǀî tsî ǀanǀanǁguibade ǁguibasa. 13 ǂAn tama du hâ, tare-e da ge tita tsî ti aboxan tsîda, nau ǃhūgu di ǁaedi ǀkha dīsa? ǀGuib nē ǁaedi elogu diba ǁîb khoena Asiriab gao-aoba xu huiǂuib ge? 14 ǀGuib nē ǁaedi elogu diba, ǁîb khoena Asiriab gao-aoba xu huiǂui ǁkhāb ge i? Tsî du kha sado, sadu Elob a huiǂui ǁkhā ti ra ǂâi? 15 Tāb Hiskiaba sado nēti gā tsî ǂgaeǂhapu. Tā ǁîba ǂgom. ǀGui ǁae-i tamas ka io gaosi-i di elob tsîn ge ǁîb ǁaesa, ti ǀgaib tamas ka io ti aboxagu di ǀgaiba xu ge huiǂui ǁoa i. Sadu Elob tsîn ge sado huiǂui ǁkhā tide.”
16 Asiriab ǂamkhoegu ge noxopa ǃnāsa xūna ǃKhūb Elob tsî ǁîb ǃgāb Hiskiab tsîkha ǃoagu ge mî. 17 ǁÎb ge ǁkhāti sîǂkhanis hîab ge xoas ǃnâ ǃKhūb, Israeli di Eloba ge ǃkhāǃkhā. ǁÎb ge ge xoa: “Nau ǃhūgu ǁaedi di elogu ge ǁîgu khoena, ti ǀgaiba xu huiǂui ǁoa is ǁkhās khamib ge Hiskiab di Elob tsîna, ǁîb ǁaesa ti ǀgaiba xu huiǂui tide.” 18 ǁÎgu ge nē xūna Hebregowab ǃnâ ge ǃhao, Jerusalems ǂnubiǂgoab ai hâ khoena gu ǃaoǃao tsî nî ǂkhabuǂâi kaise, î gu ǃāsa supuse ū ǁkhā. 19 ǁÎgu ge Jerusalems di Elob xa nau ǁaedi elogu, khoen ǃomgu ǀkha kuruhe hâgu xa gu gere ǃhoa, khami gere ǃhoa.
20 O kha ge gao-aob Hiskiab tsî Amosi ôab kēbo-aob Jesajab tsîkha ǁnās ǂama Elob ǃoa ǀgore tsî ǁîba huib ǃaroma ge ǂgaiǀî. 21 Ob ge ǃKhūba, Asiriab toroǃkhamaogu tsî ǂamkhoegu tsîga ge ǃgam ǀhomǃgāba ge sî. ǁNātib ge gao-aoba tao hâse Asiriab ǁga ge oa. ǀGuitsē gu ge ǁîb ôaga, ǁîb elob di tempeli ǃnâb hâ hîa, gôagu ǀkha ge ǃkhāǃan bi.
22 ǁNātib ge ǃKhūba gao-aob Hiskiab tsî Jerusalems di ǁanǂgāsaben tsîna, Asiriab gao-aob Sanherib tsî nau khākhoen tsîn di ǃomǁaeba xu ge huiǂui. Tsîb ge ǁîn ǃhūb xōǀkhā ǁgoe ǃhūgu hoagu di ǁaedi, ǁîn ǀkha ǂkhîb ǃnâ nî ûisa ge dī. 23 ǂGui khoen ge Jerusalems tawa ǃKhūba ǁguibade gere hā-ūba tsî gao-aob Hiskiaba ǀkhaexūna, tsîdi ge hoa ǁaede ǁnā ǁaeba xu Hiskiaba kai ǃgôasiba ge mā.
Hiskiab ǀaesenni tsî ǀgapiǂâixasib
(2 Gao-aogu 20:1-3, 2 12-19Jesaja 38:1-3Jesaja 39:1-8)24 ǁNā ǁaeb ǃnâb ge gao-aob Hiskiaba ǁō ǁgab ges kōse ge ǀaesen. Ob ge ge ǀgore tsîb ge ǃKhūba buruxa sao-e ge mā bi. 25 Xaweb ge Hiskiaba kaise ǀgapiǂâixa tsî ǃKhūb ge dība bi ǃgâidīb ǂama gangan tama ge i, ob ge ǃKhūba Judab tsî Jerusalems tsîra ǂama kaise ge ǁaixa. 26 Egan ge Hiskiab tsî Jerusalems di khoen tsîna sī ge ǃgamǃgamsen, ǁnā-amagab ge ǃKhūba Hiskiab ûiǁaeb ǃnâ ǁîna ǁkhara tama ge i.
Hiskiab di ǃkhūsib tsî ǃgôasib
27 Hiskiab ge kaise ge ǃkhū tsî khoen xa kai ǃgôasiba ge ūbahe hâ i. ǁÎb ge ǁîb di ǃhuniǀurib, ǀhaiǀurib, ǃgomǀgausa ǀuidi, ǂûǁkhoaǁkhoa-ūxūn, ǁkhaukhōdi tsî nau ama-ai xūn tsîn ǃaroma, sâuǃnâ-omde ge om kai. 28 ǁKhātib ge ǃhoro-i, ǂauxûi-i tsî ǀkhera-oli-i ǃaromas tsîna sâuǃnâ-omga ge om kai tsî ǃharade goman tsî gūn tsîn ǃaroma. 29 Nēn xōǀkhāb ge Eloba, ǂgui goman tsî gūn tsî kai ǃkhūsib tsîna ge mā bi tsîb ge ǂgui ǃāde ge ǂnubi. 30 Hiskiab ǁkhāb ge Gihonǀausa xu ra dâuǂoa ǁgamma ge ǁkhae tsî huriǂoasǀkhāb Jerusalems dib ǁgab nî dâuse unuba. Hiskiab ge dīb gere xū-i hoa-i ǃnâ gere ǃgâiǃgâ. 31 Babiloniab ǂgaeǂgui-aogu ge ǁîb di ǃhūb ǃnâ ge ī buruxa ǃkhais xa gu nî dî bise ǀkhī, ob ge Eloba ge ǁnāxū bi, ǁîb di ǁkhāsibab nî ǃâitsâse.
Hiskiab ǂgaeǂguis di ǀams
(2 Gao-aogu 20:20-21)32 Gao-aob Hiskiab ge dī xūn hoan tsî mâtib ge ǃKhūb ǃoa ǂgomǂgomsa is tsîn ge Amosi ôab, kēbo-aob Jesajab di Ai-i tsî ǃNaeǃkhaidi ǂKhanis Judab tsî Israeli tsîkha Gao-aogu dis tsîra ǃnâ a xoamâisa. 33 Hiskiab ge ǁō tsî ǀgapikabǀkhāb di ǃâb, gao-aogu ǀhobadi dib ǃnâ ge ǁkhōhe. Hoaraga khoen Judab tsî Jerusalems tsîra din ge ǁōb âb ǃnâ ǃgôasiba ge mā bi. ǁÎb ôab Manaseb ge ǁîb khaoǃgâ ge gao-ao kai.
© Khoekhoegowab Elobmîs © Bible Society in Namibia, 2020.
