ǃAruǀî hâ dī-unudi Hiskiab ge dīdi
1 ǁÂudīb khaoǃgân ge Israelǁîna, Judab ǃādi hoadi ǃnâ sī tsî ǀuiǂkhâǃnâga khôaǁnâ, ǁgôa-elos Aseras īga ǁhāǁnâ, tsî ǀūben ǀgoreǀîǃkhaidi tsî altardi tsîna ge khôaǂkhū. Tsîn ge ǁnās ǁkhāsa nau ǃâb Judab dib tsî hoaraga Benjaminni, Efraimmi tsî Manaseb tsîgu ǃnâ ge dī. ǁNās khaoǃgâ i ge mâ-i hoa-e ǁî-i ǃās ǁga ge oa.
2 Gao-aob Hiskiab ge pristergu tsî Leviǁîgu tsîga ǃnandi ǃnâ ǀgoraǂgāsa ǁkhawa ge ǂnûiǂgā, mâs hoas ǁîs di ǁgui-aisa nî ūhâse. ǁÎgu ǃnandi sîsenni ge khauǁguibadi, ǂkhîbagusǁguibadi, Tempelǃoabadi tsî gangans tsî koasa, ǃkharaga ǃâdi Tempeli didi ǃnâ dīs di ǁgui-aisa ge ǃkhōǂgā hâ i. 3 Gao-aob ge ǁkhāti ǁîb di ǂgarib ǂûba xu ûitsama xūna khauǁguibadi ǃaroma gere mā, ǁgoaǃoabadi tsî ǃuiǃoabadi, Sabbattsēdi, ǀAsa ǁKhâb Kaitsēdi tsî nau Kaitsēdi, ǃKhūb di ǂhanub ǃnâ xoaǁguisadi tsîdi ǃaroma.
4 Gao-aob ge ǁkhāti Jerusalems di ǁanǂgāsabena ge mîba, în pristergu tsî Leviǁîgu tsîga ǁîgu nî māhese ī ǃâsa mā, î gu ǀoasa ǂâisa ǃKhūb ǂhanub di ǂgaoǀkhādi ai ǂnûi ǁkhā. 5 ǁNā mîs ge ǂanǂanhe, on ge Israelǁîna ǁîn di ama-ai ǃhoro-i, ǂauxûi-i, ǀkhera-oli-i, dani-i tsî nau ǃhanaǂûn tsîna ge hā-ū. ǁÎn ge ǁkhāti disiǁîǃâs, ūn hâ xūn hoan disa ge mā. 6 Judab ǃādi ǃnâ ǁan hâ khoen hoan ge disiǁîǃâs, ǁîn goman tsî gūn disa ge hā-ū. ǁÎn ge ǁkhāti ǂgui ǀkhaexūn, ǃKhūb, ǁîn di Eloban ge khaibana ge hā-ū. 7 ǁÎn ge ǃnonaǁî ǁkhâb ǃnâ, ǁnā xūna ge hā-ūtsoatsoa tsî hûǁî ǁkhâb kōse ǁnās ǀkha ge aiǃgû. 8 Hiskiab tsî ǁîb di ǂamkhoegu ge mâtikō ǂgui xūn ge hā-ūhesa gu ge mû, o ǃKhūb tsî ǁîb di ǁaes Israelsa ge koa. 9 Hiskiab ge pristergu tsî Leviǁîgu tsîn ǀkha ǁnā xūn xa a ǃhoa, 10 ob ge ǀgapipristeri Asariab, Sadoki surib diba ge ǃeream: “Khoen ge nē māde Tempela ǃoa a hā-ūtsoatsoasa xu ge ge ǂâu hâ kō ǂûxūna ūhâ tsîn ge noxopa ǂguina ǃgau hâ. Nē xūn hoana ge ge ūhâ, ǃKhūb ge ǁaes âba a ǀkhae xui-ao.”
11 Gao-aob Hiskiab di mîmās ai gu ge sâuǃnâǃnā-omde Tempeli tawa ǂhomi 12 tsî hoaraga ǀkhaexūn tsî disiǁîǃâs tsîna ǁîdi ǃnâ ge ǂgā. Tsîn ge Kenanja ti ǀon hâ Leviǁîba mûǂamaose ge mâi tsî ǁîb di ǃgâsab Simeiba ǁîbab nî huise. 13 Disi Leviǁîgu ge ǁîkha ǃnaka gu nî sîsense ge ǁgaumâihe. ǁÎgu ge Jehieli, Asasjab, Nahati, Asaheli, Jerimoti, Josabadi, Elieli, Ismakiab, Mahati tsî Benajab tsîga. Nē xūn hoan ge gao-aob Hiskiab tsî ǀgapipristeri Asariab tsîkha di mûǂams ǃnaka ge ī. 14 Imnab ôab Koreb, Leviǁîb, Aiǂoas- Dao-ams Tempeli dis ǃûi-ao ge ib ge ǃKhūb ge māsenxase gere hā-ūbahe ǁguibade ǃkhōǃoa tsî ǁîde ǀgoraǂuis di ǁgui-aisa ge ūhâ i. 15 Nau ǃādi pristergu ge ǁanǃnâ hâ idi tawab ge ǂgomǂgomsase Leviǁîgu, Edenni, Minjaminni, Jesuab, Semajab, Amariab tsî Sekanjab tsîgu xa gere mâxōǀkhāhe. ǁÎgu ge ǂûna ǃamkuse ǁîgu di ǃgâsa Leviǁîga, ǃoabaǃnande ǃoa gere ǀgoraba, 16 xawe ǃhaode ǃoa tama. ǁÎgu ge ǃnonadisi kurixa tsî ǁnās xa ǃnāsa kuriga ūhâ khoegu, tsēkorobe ǁîgu ǃoabaǃnande ǃoa, Tempeli ǃnâ ra ǃoabagu hoaga ǁîgu ǃâde ge ǀgoraba. 17 Pristergu ge ǃhaoǃnāde ǃoa ǁîgu sîsenni ǃaroma ge xoakhâisa i, tsî Leviǁîgu ǀgamdisikurixa tsî ǁnās xa ǃnāsa gu ge ǁîgu sîsenna ǃoa, ǁîgu di sîsenǃnande ǃoa ge ǀgoraǂgāsa i. 18 ǁÎgu hoagu ge ǁîgu taradi, ǀgôan tsî nau khoen ǁîgu din ǀkha ge xoakhâihe hâ i, ǁîgu mâǁae-i hoa-e gu ǁîgu ǃanu ǃoabade nî dīse, ǂhomisase nî hâse i xui-ao. 19 Aronni ôananôagub ǃaroma ge ǂnûiǂuisa i ǃādi tsî aiǃādi ǃnâ ge ǁan hâ i pristergu ge hoaraga aorekhoegu, pristerǀaokhoena xu hâgu tsî Leviǁîgu tsîna ǂûna ǀgoraǂuibas ǃereamsa ge ūhâ i. 20 Gao-aob Hiskiab ge Judab hoaragab ǃnâ ǂhanu tsî ǃKhūb ǁîb di Eloba ǃgâibana gere dī. 21 ǁÎb ge Tempelab ra dība ǃoabas kas, ǂhanub tsî mîmāde ǁnâuǀnams kas hoasa, ǁîb di Eloba ǂgomǂgomsase gere dība, xui-ao ge ǃgâiǃgâxa i.
© Khoekhoegowab Elobmîs © Bible Society in Namibia, 2020.
