Judab di gao-aob Hiskiab
(2 Gao-aogu 18:1-3)1 Hiskiab ge ǀgamdisikoroǀa kurixab a hîa ge gao-ao kai, tsîb ge ǀgamdisikhoeseǀa kuriga Jerusalems ǃnâ gere ǂgaeǂgui. ǁÎb îs ge Saxariab ôas Abijasa ge i. 2 Hiskiab ge ǁîb aboxab gao-aob Davidi aiǁgausa sao tsî ǃKhūba a ǃgâibana gere dī.
Tempeli di ǃanuǃanuhes
3 Hiskiab ge ǂguro kurib ǁîb ǂgaeǂguis dib di ǂguro ǁkhâb ǃnâ, Tempeli di dao-amde ǁkhowa-am tsî ǁîde ge dī-unu. 4 ǁÎb ge pristergu tsî Leviǁîgu tsîga aiǂoasǀkhāb di omǂnamib Tempeli dib tawa ǂgaiǀhao 5 tsî ǁîga ge mîba: “Sago Leviǁîgo ǃanuǃanusen, î go ǃKhūb sadu aboxan Elob di Tempela ǃanuǃanu. ǃAnuoǃnâ xū-i hoa-e Tempela xu ūǂui. 6 Sada aboxagu ge ǃKhūb sada Eloba ǁnâuǀnamoǃnâ tsî ǁîba ǃgâiba tamana ge dī. ǁÎgu ge ǁîba ǁnāxū tsî ǁîb di ǁanǃkhaisa ǁâba ge mā. 7 ǁÎgu ge Tempeli âb di dao-amde ǂganam, ǃamǀaede ǀari tsî ǀanǀanǁguibadi kas, khauǁguibadi kas hoasa Israeli di Elob di Tempeli ǃnâ ǁguiba tama ge i. 8 ǁNā-amagab ge ǃKhūba Judab tsî Jerusalems tsîra ǀkha ge ǁaixa, tsî ǁîb ge ǁîn ǀkha dīn ge hoaraga khoena ǃao tsî ge ǃhuri kai. Sadu hoadu ge ǁnāsa ǃgâise a ǂan. 9 Sada aboxagu ge torogu ǃnâ ge ǁō tsî sada tarekhoedi tsî ǀgôan tsîn ge ǃkhōsabese ge ǃgû-ūhe.
10 “Nēsi ta ge go mîǀgui ǃKhūb, Israeli di Elob ǀkha ta ǃgaeǀhao-e nî dīsa, îb tā ǃaruǀî sada ǀkha ǁaixa. 11 Ti ôago tā noxopa ǀhabe re. ǃKhūb ge sago ge ǁhûiǂuibasen, ǁîba go ǀanǀanǁguibade nî dība tsî go ǁaes âba ǁîb di ǃoabas ǃnâ nî ǂgaeǂguise.”
12-14 Sao ra Leviǁîgu ge ǁnāpa ge hâ i:
Kohatǁîna xu Amasaib ôab Mahati tsî Asariab ôab Joeli tsîkha;
Merariǁîna xu Abdib ôab Kisi tsî Jehaleleli ôab Asariab tsîkha;
Gersonǁîna xu Simmab ôab Joaxi tsî Joaxi ôab Edenni tsîkha;
Elisafanǁîna xu Simrib tsî Jeieli tsîkha;
Asafǁîna xu Saxariab tsî Matanjab tsîkha;
Hemanǁîna xu Jehieli tsî Simeib tsîkha;
Jedutunǁîna xu Semajab tsî Usieli tsîkha.
15 Nē khoegu ge ǁîgu di ǃgâsa Leviǁîga ge ǀhaoǀhao tsîgu ge ǁîgu hoaga ge ǃanuǃanusen. Tsîgu ge gao-aob xa gu ge mîmāhe hâ i khami Tempela ge ǃanuǃanu, ǃKhūb di ǂhanuba ǃoa. 16 Pristergu ge Tempeli ǃnâ ǁîba gu nî ǃanuǃanuse ǂgâ tsî ǃanuoǃnâ xūn hoana Tempeli di omǂnamib ǁga ge taniǂui. ǁNāpa xu gu ge Leviǁîga, ǁîna ǃās ǃaugab ǁga Kidronǃgoaǃnāb ǃoa ge ǃgû-ū.
17 Nē sîsenni ge ǂguro ǁkhâb di ǂguro tsēs ai tsoatsoa tsî ǁkhaisaǁî tsēs ai ge dītoahe, Tempeli di ai-ommi kōse. ǁNās khaoǃgâ gu ge noxopa ǁkhaisa tsēde Tempela ǃanuǃanus ǀkha ge aiǃgû, disiǃnaniǀaǁî tsēs ǁkhâb dis ai gu ge sîsenna dītoas kōse.
Tempeli ge ǁkhawa ra khaihe
18 Leviǁîgu ge sao ra ǃnuriba gao-aob Hiskiaba sī ge mā: “Sige ge hoaraga Tempela go ǃanuǃanutoa. ǀAnǀanǁguibas altars, ǁguibaperegu tāb tsî hoaraga sîsenūxūn tsîna ge ge ǁkhāti go ǃanuǃanu. 19 Hoaraga sîsenūxūn, gao-aob Axasi ge ǁîb ǂgaeǂguis ǁaeb, Elob ǃoagub ge ǂgomǂgomsa tama hâ ib ǃnâ ūbē hâ ina ge ge ǁkhawa oaǀkhī-ū tsî go khai. ǁÎn hoan ge ǃKhūb di altars aiǃâ mâ.”
20 Ob ge gao-aob Hiskiaba ǃnauǁgoaga ǃās di ǂamkhoegu hoaga ge ǂgaiǀhao tsîgu ge ǀguipa Tempela ǃoa ge ǃgû. 21 ǁÎgu ge hû ǁgōgu, hû baigu, hû ǁkhaogu tsî hû pirigu tsîga, gao-aob surib tsî Judab khoen tsîn di ǁoreǁguibas ase tsî Tempeli di khaihes tsîn ǃaroma ge ūsao. Tsîb ge gao-aoba pristergu, Aronni surib diga ge mîmā, î gu ǁnā ǁguibasa ǃKhūb di altars ai ǁguiba. 22 O gu ge pristerga ǂgurose ǁgōga ge ǂā tsî ǁnāpa xu baiga tsî ǁnāpa xu ǁkhaoga tsî mâ ǁguibas hoas di ǀaoba altars ai ge ǀgapi. 23 ǀUnis ai ge ǁoreǁguibas piriga ū tsî gao-aob tsî nau ǀgoreǀî-aon tawa ge sī-ū, tsîn ge ǁîna ǃomgu âna ǁîgu ai ge ǁgui. 24 ǁNās khaoǃgâ gu ge pristerga piriga ǂā tsî ǁîgu ǀaoba ǁoreǁguibas ase altars ai ge ǂnâǂui, ǂkhîbagusa hoaraga Israelǁîna dības ǃaroma, gao-aob ge khauǁguibas tsî ǁoreǁguibas tsîran hoaraga Israelǁîna nî dībahesa mîmā xui-ao.
25 Gao-aob ge ǃKhūb ge gao-aob Davida, gao-aob di kēbo-aob Gadi tsî kēbo-aob Natanni tsîkha ǃnâ-u mā mîmā hâ i khami ge dī. ǁÎb ge Leviǁîga ge mîmā, îgu harpdi tsî simbaldi ǀkha Tempeli ǃnâ mâ, 26 o gu Leviǁîga gao-aob Davidi di ǀkhōxūn ǁkhān khami i ǀkhōxūn ǀkha ge mâ tsî pristergu ge xâiǁnâdi ǀkha ge mâ. 27 Hiskiab ge ge mîmā, khauǁguibas altars ai nî ǁguibahesa. Tsî khauǁguibas ra tsoatsoahe hîan ge khoena ǃKhūba ge koaǁnaeba, xâiǁnâdi tsî nau ǀkhōxūn Israeli gao-aob Davidi din ra ǀkhōhese. 28 ǁNāpa ge hâ i khoen hoan ge ge ǀgoreǀîtsoatsoa tsîn ge ǁnaeb tsî xâiǁnâdi ǀōb tsîna, khauǁguibas ge dītoahes kōse ge aiǃgû. 29 ǁNās khaoǃgân ge gao-aob Hiskiab tsî ǁîb ǀkha ge hâ i khoen hoana ǃhonǁgoa tsî Eloba ge ǀgoreǀî. 30 Gao-aob Hiskiab tsî ǁaes di ǂgaeǂgui-aogu ge Leviǁîga ge mîmā, î gu Davidi tsî kēbo-aob Asafi tsîkha ǁnaetsanadi ǀkha ǃKhūba koaǁnaeba. O gu ge hoaga kai ǃgâiaǂgaob ǀkha ra ǁnaese ǃhonǁgoa tsî ǃKhūba ge ǀgoreǀî.
31 ǁNās khaoǃgâb ge Hiskiaba khoen ǃoa ge mî: “Nēsi du ge go ǃanu, xuige ǂāǁguibadi tsî ganganǁguibadi tsîna ǃKhūba hā-ūba re.” On ge khoena ǂāǁguibadi tsî ganganǁguibadi tsîna ge hā-ū tsîn ge ǀnîna māsenxase khauǁguibadi tsîna ge hā-ū. 32 ǁÎn ge hûdisi ǁgōgu, ǀguikaidisi baigu tsî ǀgamkaidisi ǁkhaogu tsîna khauǁguibas ase ǃKhūba ge hā-ūba. 33 ǁÎn ge ǁkhāti ǃnanikaidisi ǁgōgu tsî ǃnonaǀoadisi ǀgoan tsîna ǁguibas ǃaroma ge hā-ū. 34 Pristergu ge nē xūn hoana ǂāsa ǃoa ǀoro i, xui-ao gu ge Leviǁîga, sîsenni nî dītoahes kōse ǁîga ge hui. ǁNā ǁaeb ǃnâ gu ge ǃnāsa pristerga ge ǃanuǃanusen. Leviǁîgu ge pristergu xa ǃnāsase ge ǂgomǂgomsa i. 35 Khauǁguibadi ge kaise ge ǂgui i tsî kaub ǂûǁguibadi dib tsî āǁguibadi, khauǁguibadi tawa gere ǀarohedi tsîna. ǁNātis ge Tempelǃoabasa ǁkhawa ge ǂnûiǂgāhe.
36 Gao-aob Hiskiab tsî ǁaes tsîn ge kaise gere ǃgâiaǂgao, Elob ge ǁîna, nē ǃkhaisan ǃhaese nî dītoase hui xui-ao.
© Khoekhoegowab Elobmîs © Bible Society in Namibia, 2020.
