Israeli ǀkhab ge ūhâ i ǃgomsigu
(1 Gao-aogu 15:17-22)1 ǃNonadisiǃnaniǀaǁî kurib gao-aob Asab Judab dib di ǂgaeǂguis dib, ǃnâb ge Israeli di gao-aob Baasaba Judaba ǁnāǂam tsî Ramasa ge omǂnami, Judab gao-aob Asab di ǃhūb ǃnân khoena ǂgâ tamas ka io ǂoa tidese. 2 Gao-aob Asab ge ǁkhāti ǀhaiǀurib tsî ǃhuniǀurib, Tempeli tsî gao-ommi tsîn ǃnâ ge ǃgau hâ ib hoaba ū tsî sîsabegu ǀkha Damaskus ǃoa, Siriab gao-aob Benhadadi, Tabrimonni ôab, Hesionni ǁnuriba, sao ra ǂhôas ǀkha ge sîba. 3 “As sakhom îkha ǁaegus ge hâ is ǁkhās khami ǃgaeǀhaosa sakhom ǁaegu hâ. ǀHaiǀurib tsî ǃhuniǀurib tsîna ta ge ǀkhaeb ase ra sîba tsi. Nēsi ǁnâi Israeli gao-aob Baasab ǀkhats ūhâ ǃgaeǀhaosa khôa, îb ǁîb toroǃkhamaoga ti ǃhūba xu doeǂoa kai.”
4 Ob ge gao-aob Benhadada gao-aob Asab ge ǂgan bi khami dī tsî ǁîb torob ǂamkhoegu tsî toroǃkhamaogu tsîga, Israeli ǃāde gu sī nî ǁnāǂamga ge sî. Tsî gu ge ǁîga Ijons, Dans, Abel-Bet-Maakas, Galileahurirob ǀgūse ǁgoe ǀkharib hoab tsî Naftalib ǀkharib hoab tsîna ge dan. 5 Gao-aob Baasab ge tare-i go ī ǃkhaisab ge ǁnâu, o Ramas tawab gere dī sîsenna ge ǀû. 6 Ob ge gao-aob Asaba, Judab aogu hoaga, ǀuidi tsî hain Baasab gere Ramasa omkhâi-ūna gu sī nî tanise ge sî. Tsîb ge Asaba ǁîn ǀkha Gebas tsî Mispas tsîra ge omǀgaiǀgai.
Kēbo-aob Hananib
7 ǁNā ǁaeb ǃnâb ge kēbo-aob Hananiba Judab gao-aob Asab tawa sī tsî ge mî: “Siriab gao-aob aits go ǂgomaiǂnûi, ǃKhūb sa Elob aits nî ǂgomaiǂnûis xa, xui-aos ge Israeli gao-aob di toroǂnubisa satsa xu go ûiǂoa. 8 Etiopiaǁîn tsî Libiaǁîn tsîna kha kai toroǂnubis, ǂgui torokunidi tsî hāǃgapi-aogu ǀkha hâsa ūhâ taman ge hâ i? Xawe ǃKhūb aits ge ǂgomaiǂnûi, xui-aob ge ǁîba ǁîn ǂama dansa ge mā tsi. 9 ǃKhūb ge hoaraga ǃhūbaiba ra kōǂam, ǂgaob hoab ǀkha ǁîb ai ra ǂgomaiǂnûinab ǀgaiba nî māse. Gâsets ge go dī, ǁnā-amagats ge nēsisa xu hoaǁae toroba nî ūhâ.” 10 Nē ǃkhais xab ge Asaba kēbo-aob ǀkha kaise ǁaixa tsî ǁîba ǃkhō-oms ǃnâ ge ǂgā. ǁNā ǁaeb ǁkhāb ǃnâb ge Asaba ǀnî khoena ǁkhōse ge sîsenūtsoatsoa.
Asab ǂgaeǂguis di ǀams
(1 Gao-aogu 15:23-24)11 Gao-aob Asab ge dī xūn hoan, ǁîb ǀgaisa dīgu tsî omǀgaiǀgaib ge ǃādi din tsîn ge ǃNaeǃkhaidi ǂKhanis Judab tsî Israeli tsîkha Gao-aogu dis ǃnâ a xoamâisa. 12 ǃNonadisikhoeseǀaǁî kurib gao-aob Asab ǂgaeǂguis dib ǃnâb ge ǁîba ǃgomse ǂaira ǃnâ ge ǀaesen, xaweb ge nē ǀaesenni tsîn ǃnâ ǃKhūb tawa hui-ôa tama i tsî soǀôadī-aogu tawa ge hui-ôa. 13 ǁÎb ge ǀgam kurikha khaoǃgâ ge ǁō 14 tsîb ge Davidi ǃĀs ǃnâb ge khaoǂuibasen hâ i ǀhobas ǃnâ ge ǁkhōhe. ǁÎb di sorosan ge ǃgâihamxūn tsî ǃgâihamoli-i tsîn ǀkha ǁkhōs ǃaroma ge aiǂhomi. Tsîn ge kai ǀaesa khau tsî ǁîb di ǁōb ǂama ge ǃoa.
© Khoekhoegowab Elobmîs © Bible Society in Namibia, 2020.
