Asab ge dī dī-unudi
1 Elob di gagab ge Odedi ôab Asariaba ge hāǂam 2 tsîb ge gao-aob Asab ǀkhab nî ǀhaose, ǁîb tawa sī tsî ge mî: “ǃGâ re, gao-ao Asats tsî hoaraga khoedu Judab tsî Benjaminni tsîkha dido. ǃKhūb ge sadu ǀkha hâ, sadu ǁîb ǀkha hâs kōse. ǁÎba du ga ôa, ob ge sado nî hō kaisen, xawe ǁîba du ga ǁnāxū, ob ge sado nî ǁnāxū. 3 Israeli ge ǂomxa ǁaeba, ama Elob ose go hâ, ǁîna nî ǁkhāǁkhā prister-i ose tsî ǂhanub ose. 4 Xawe ǂōǂōsib ǃnân ga ǂgâ, on ge ǃKhūb, Israeli di Elob ǃoa ra dabasen. ǁÎban ge ôa tsî gere hō. 5 ǁNā tsēdi ǃnâ i ge khoe-i xare-e ǃnorasase hā tsî ge ǃgû ǁoa i, ǂkhabasib ge mâ ǃhūb hoab ǃnâ hâ i xui-ao. 6 ǀGui ǁaes ge nausa gere ǁgâiǀā tsî nē ǃās ge nausa gere ǁgâiǀā, Elob ge ǁîn hoan ǂama ǂōǂōsib tsî ǀhūsasib tsîna hā-ū xui-ao. 7 ǁNā-amaga sado ǀgai, î tā ǂkhabuǂâi, sadu sîsenni nî mādawa-amhe xuige.”
8 Asab ge Odedi ôab kēbo-aob Asariab di kēbomîdeb ge ǁnâuo, ǁkhoaǂgaosiba ge hō. ǁÎb ge hoaraga ǁgôa-elo īga, Judab tsî Benjaminni tsîkha di ǃhūba xu ge dībē, tsî hoaraga ǃādi Efraimmi ǃnâuxa ǃhūba xub ge ūdi tsîna xu. ǁKhātib ge ǁîba ǃKhūb di altars, Tempeli di omǂnamib ǃnâ ge mâ is tsîna ge ǀasaǀasa.
9 ǂGui khoen ge Efraimmi, Manaseb tsî Simeonni tsîga xu Asabǀkhāb ǁga hā tsî ǁîb di gaosib ǃnâ ge ǁan hâ i, ǃKhūb ǁîb ǀkha hâ ǃkhaisan ge mû xui-ao. Asab ge ǁîn hoana ge ǀhaoǀhao tsî Judab tsî Benjaminni tsîkha khoen tsîna. 10 Tsîn ge disikoroǀaǁî kurib Asab gaosis dib di ǃnonaǁî ǁkhâb ǃnâ, Jerusalems ǃnâ ge ǀhao. 11 ǁNā tsēs ain ge ǁkhâuǁnân ge hâ i xūna xu hûkaidisi goman tsî hûǀoadisi gūn tsîna ǃKhūba ge ǁguiba. 12 Tsîn ge ǃgaeǀhao-e ge dī, ǃKhūb, ǁîn aboxan di Eloban, ǁîn di hoaraga ǂgaob tsî ǀoms ǀkha nî ǃoaba ǃkhaisa. 13 ǁÎba ga ǃoaba ǂgao tama i khoe-i hoa-i, ǂkham i kas, kaira i kas, aoreb kas, tares kas hoasa i ge nî ǃgamhe. 14 Tsîn ge ǃgari dommi ǀkha ǃKhūb ǀons ǃnâ ge nū, nē ǃgaeǀhaosan nî ǃkhōǀgaipesa, tsîn ge ǁnās khaoǃgâ ǃau tsî xâiǁnâde ge xâi. 15 Hoaraga khoen Judab din ge nē ǃgaeǀhaosan ge ǁîn di ǂgaob hoab ǀkha dī, ǃkhais xa gere ǃgâiaǂgao. ǁÎn ge ǃKhūba ǃoabas xa ge ǃgâibahe i, tsîb ge ǁîba ǁîna ūǃoa tsî hoa ǀkhāgu ai ǂkhîba ge mā.
16 Gao-aob Asab ge ǁîb ǁnaos Maakasa, ǁgaiǁgaisa ǁgôa-elo-īb Aseras dibas ge dī ǃkhais ǃaroma gao-aosisa xu ge ūǁnâ. Asab ge ǁnā ība ǁhāǁnâ, ǁîba ǁhāǃā tsî Kidronǃgoaǃnāb ǃnâ ge ǂhubiǂui. 17 ǀGapigu ai hâ ǀgoreǀîǃkhaidi hoadeb ge ūbē tama hâ i, xaweb ge Asaba, ǁîb di ûitsēdi hoade ǃKhūb ǀguiba gere ǃoaba. 18 Tsîb ge ǁîb îb Abiab tsî ǁîb tsîkha ge ǃKhūba khaiba xūn, ǀhaiǀurib, ǃhuniǀurib tsî xapan tsîn hoana Tempeli ǃnâ ge ǂgâ-ū. 19 ǃNonadisikoroǀaǁî kurib Asab ǂgaeǂguis dib kōse i ge toro-i xare-e ǃaruǀî ge hâ tama i.
© Khoekhoegowab Elobmîs © Bible Society in Namibia, 2020.
