Abiab tsî Jerobeammi tsîkha ǁaegu hâ torob
(1 Gao-aogu 15:1-8)1 Disiǁkhaisaǀaǁî ǂgaeǂguis kurib, Nebati ôab Jerobeammi dib ǃnâb ge Abiaba ge Judab di gao-ao kai, 2 tsîb ge ǃnona kuriga Jerusalems ǃnâ gere ǂgaeǂgui. ǁÎb îs ge Mikaja ge i, Urieli Gibeas dib ôasa.
Torob ge Abiab tsî Jerobeammi tsîkha ǁaegu ge tsoatsoa. 3 Abiab ge hakakaidisiǀoadisi toroǃkhamaogu ǀkha ge khâi tsî Jerobeammi ge ǁîba ǁkhaisakaidisiǀoadisi toroǃkhamaogu ǀkha ge mâǃoa.
4 Toroǂnubira ge Efraimmi di ǃnâuxa ǀkharib ǃnâ ge ǀhao. Ob ge gao-aob Abiaba Semaraimǃhommi ai ǂoa tsî Jerobeammi tsî Israelǁîgu tsîga ǃoa ge ǃhao: “ǃGâ te re. 5 ǂAn tama go kha hâ ǃKhūb, Israeli di Elob ge khôaheǁoasa ǃgaeǀhao-e Davidi ǀkha dīsa, ǁîb tsî ǁîb di ôananôagub ǀamose Israeli ǂama nî gao ǃkhaisa? 6 Nebati ôab Jerobeammi ge ǁîb di gao-aob Salomob ǃoagu ge khâikhâisen. 7 ǁÎb ge xūtama, ǁgai khoega ǀhaoǀhao tsî Salomob ôab Rehabeammi, noxopab ǂkham tsî a ǀgaio, xui-ao ge ǁîga mâǃoaǁoa ib ǃoagu ge khâimâ. 8 Tsî nēsi go ge ǃKhūb ge Davidi tsî ǁîb di ôananôaguba a mā gaosis ǃoagu ra torodī ǂgao. Sago ge kai toroǂnubisa ūhâ tsî ǁkhāti ǃhuniǀuritsâukha, Jerobeammi ge sadu elose dība dukha tsîna. 9 Sadu ge ǃKhūb di pristergu, Aronni surib digu tsî Leviǁîgu tsîna ge ǃhaeǂui. Tsî du ge ǁîgu soas ǃnâ, nau ǃhaodi ra dī khami aitsama pristerga ge ǁgaumâi. ǁGōb kas, hû gūn kas hoasa ga hā-ū khoeb hoaban ge ǁgôa-elogu ǃaroma pristerse ra ǁgaumâi.
10 “Xawe sida ge ǃKhūb sida Eloba ra ǃoaba tsî ǁîba ǁnāxū tama hâ. Aronni surib di pristergu ge ǁîgu di ǃoabade ra dī tsî Leviǁîgu ge ǁîga ra mâxōǀkhā. 11 ǁÎgu ge mâ ǁgoas tsî ǃuis hoasa ǃKhūba khauǁguibadi tsî ǃgâihamxūn ǀanǀanǁguibadi tsîna ra ǁguiba. Tsî gu ge ǁîba perega ǃanu tāgu ai ǁguiba, tsî mâ ǃuis hoasa ǃhuniǀuri kandelargu ai mâ ǃamǀaede ra ǃam. Sida ge ǃKhūb, sida Elob ge mîmāda khami ra dī, xawe sadu ge ǁîba ge ǁnāxū. 12 Elob ǂûb ge a sida ǂgaeǂgui-ao tsî ǁîb di pristergu ge nēpa xâiǁnâdi ǀkha mâ, ǁîde gu nî xâise, î ge sige sago ǃoagu ǃkham. Israelǁîdo tā ǃKhūb sadu aboxagu di Elob ǃoagu ǃkham, dan ǁkhā du tide xuige.”
13 Jerobeammi ge ǀnî toroǃkhamaogu âba ge sî, î gu Judab di toroǃkhamaoga ǃgâbǀkhāb ai sī ǁgoeǃgâ, naugu ǁîga aisǀkhāba xu ra ǃoa hîa. 14 Judaǁîgu ge kō gu ge, o ǃnamiǂgāhe gu hâ ǃkhaisa ge mû. ǁÎgu ge ǃKhūb ǃoa huib ǃaroma ge ǂgai tsî gu ge pristerga xâiǁnâde ge xâi. 15 O gu ge Judab toroǃkhamaoga ǃgarise ǃau tsî Abiab ǂgaeǂguis ǃnaka, Israelǁîga ge ǁnāǂam. Tsîb ge Eloba Jerobeammi tsî Israeli toroǂnubis tsîna ge dan. 16 Israelǁîgu ge Judab toroǃkhamaoga xu ge ǁhâ tsîb ge Eloba Judaba ǁîgu ǂama dansa ge mā. 17 Abiab tsî ǁîb di toroǂnubis tsîn ge kaise ǂgui Israelǁîga ge ǃgam; korokaidisiǀoadisi ǂoaǂamsa toroǃkhamaogu, Israeli digu ge ge ǃgamhe. 18 ǁNātin ge Judab khoena Israeli ǂama dansa ge hō, ǃKhūb, ǁîn aboxagu di Elob ain ge ǂgomaiǂnûi amaga.
19 Abiab ge Jerobeammi di toroǂnubisa ǃgôaǃgon tsî ǀnî ǃādi ǁîb didi, Betels, Jesanas tsî Efrons tsî ǁîdi ǂnamipe ǁgoe ǃārodi tsîna ge ū. 20 Jerobeammi ge Abiab di ǂgaeǂguis ǁaeb ǃnâ ǃaruǀî, ǀgai-i xare-e ge ūhâ tama hâ i. ǀAms aib ge ǃKhūba ǃnapetamaseb ge ǁō ǃkhaisa ge ǃaroma.
21 Xawe Abiab ge ǃaruǀîǀgui ge ǀgai. ǁÎb ge disihakaǀa tarade ge ūhâ i tsîb ge ǀgamdisiǀgamǀa ǀgôagu tsî disiǃnaniǀa ǀgôadi tsîna ge ǁorabahe. 22 Nau ǃnaeǃkhaidi Abiab didi, mîb gen tsî dīb gen tsîna ǃkhōǂgā hâdi ge ǃNaeǃkhaidi ǂKhanis kēbo-aob Idob dis ǃnâ a xoamâisa.
© Khoekhoegowab Elobmîs © Bible Society in Namibia, 2020.
