Egipteǁîn ge Judaba ra ǁnāǂam
(1 Gao-aogu 14:25-28)1 Rehabeammi gaosis ra mâǁapo, hîan ge ǁîb tsî hoaraga Israelǁaes tsîna ǃKhūb di ǂhanuba ge ǁnāxū. 2 Koroǁî kurib Rehabeammi ǂgaeǂguis dib ǃnâb ge ǃKhūba ǁîna ǂgomǂgomsa taman ge i, ǃkhais ǃaroma ge ǁkhara. Egipteb gao-aob Sisaki ge Jerusalemsa, 3 ǀguiǀoadisi tsî ǀgamkaidisi torokunidi, ǃnanidisiǀoadisi hāǃgapi-aogu tsî ǃgôahe ǁoase ǂgui toroǃkhamaogu, Libiaǁîgu, Sukǁîgu tsî Etiopiaǁîgu tsîga ge ǃkhōǂgā hâ igu ǀkha ge ǁnāǂam. 4 ǁÎb ge omǂnamisa ǃādi Judab dide ū tsî ǁkhāti Jerusalems kōse ge sī.
5 Ob ge kēbo-aob Semajaba gao-aob Rehabeammi tsî Judab di ǂgaeǂgui-aogu, Sisaka xu gu nî ûiǂoa ga ge Jerusalems ǃnâ ǀhû hâ igu tawa sī tsî ǁîga ǃoa ge mî: “Nētib ge ǃKhūba ra mî: ‘Sadu ge tita ge ǁnāxū, ǁnā-amaga ta ge tita nēsi Sisaki ǃomǁae go māǁnā du.’ ”
6 O gu ge gao-aob tsî ǂgaeǂgui-aogu tsîga ǁoren ge ǃkhaisa ǂanǃgâ tsî “ǃKhūb ge ǂhanuse ra dī” ti ge mî.
7 ǃKhūb ge ǁîn di ǃgamǃgamsensab ge mûo, ǁkhawa Semajab ǃoa ge mî: “ǁÎn di ǁoreban go ǂanǃgâ, amaga ta ge ǁîna hîkākā tide. Sisaki ga ǁîna ǁnāǂam, o ta ge ǁîna nî huiǂui. Jerusalems ǂamab ge ti ǁaiba ǀoasase hōǃâhe tide, 8 xawe Sisaki ge ǁîna nî dan, tsîn ge tita ǃoabas tsî ǃhūbaisi ǂgaeǂgui-aoga ǃoabas di ǃkharagagusiba nî ǂan.”
9 Gao-aob Sisaki ge Jerusalems ǃoa hā tsî Tempeli di ǁuigu tsî gao-ommi di ǁuigu tsîna ge ū. ǁÎb ge hoaraga xūna ge ū tsî ǁkhāti ǃhuniǀuri ǁkhaukhōdi Salomob ge dī hâ idi tsîna. 10 Ob ge gao-aob Rehabeamma ǁnā ǁkhaukhōde, brons ǁkhaukhōdi ǀkha ǃkhōǃkhuni tsî ǁîde gao-ommi dao-amde ra ǃûi ǂamkhoega, ǃûiǃgâ gu nîse ge mā. 11 Gao-aob gere Tempeli ǁga ǃgû, ǃnās hoasa gu ge ǃûi-aoga ǁîde gere tani tsî ǁîde ǁkhawa ǁnās khaoǃgâ sâuǃnâ-ommi ǁga gere oa-ū. 12 Gao-aob ge ǃgamǃgamsen, amagab ge ǃKhūb di ǁaiba ǁîba hoaragase hîkākā tama ge i, tsîb ge ǃgâi mâsiba Judab ǃnâ ge hâ.
Rehabeammi di ǁōb
13 Rehabeammi ge Jerusalems ǃnâ gere ǂgaeǂgui tsî ǁîb di gaosis ge ǃaruǀîǀgui ge ǀgai. ǁÎb ge hakadisiǀguiǀa kurixab a hîa ge gao-ao kai tsîb ge disihûǀa kuriga Jerusalems, ǁnā ǃās ǃKhūb ge Israeli ǀkharigu hoaga xu, ǁîs ǃnâb nî ǀgoreǀîhese ǁhûiǂuis ǃnâ gere ǂgaeǂgui. ǁÎb îs ge Naamas ti ge ǀon hâ i Amonǁîsa. 14 ǁÎb ge ǂkhawadīna gere dī, tsî ǃKhūba ǂgaob hoab ǀkha ge sao tama hâ i.
15 ǃNaeǃkhaidi Rehabeammi didi, ǂgurosa xu ǀunis kōse hâdi tsî ǁîb surib didi ge ǃNaeǃkhaidi ǂKhanis Kēbo-aob Semajab dis tsî ǃNaeǃkhaidi ǂKhanis kēbo-aob Idob dis tsîra ǃnâ a xoamâisa. Rehabeammi tsî Jerobeammi tsîkha ǁaegub ge hoaǁae toroba ge hâ i. 16 Rehabeammi ge ǁō tsî ǁîb aboxagu tawa, Davidi ǃĀs ǃnâ ge ǁkhōhe tsîb ge ǁîb ôab Abiaba ǁîb khaoǃgâ ge gao-ao kai.
© Khoekhoegowab Elobmîs © Bible Society in Namibia, 2020.
