1 Timoteub 4 - Khoekhoegowab New Translation 2020 (KKG20)

ǂHumi ǁgauǃnâ-aon

1 ǀUni tsēdi ǃnâ nî īn ge Elob di Gagab xa ǃgāsase ra mîhe, ǀnî khoen nî ǁîn di ama ǂgomsa ǁnāxū tsî ǂgaeǂhapuxa gagagu tsî ǁgâuagu* ǁkhāǁkhāde sao ǃkhaisa. 2 Nēn ge ǂhumib xa ǁan hâ ǂgaoǂande ūhâ ǀgamaixa ǂgaeǂhapu-aon hîa ra ǂgomsabedīsenna. 3 ǁÎn ge ǃgamets nî ǃkhais tsî ǀnî ǂûǃnôan nî ǂûhe ǃkhais ǂhanu tama hâ ti ra mî. Elob ge nē ǂûǃnôan hoana ge kuru, ǁîb di amaba a ǂan ǂgomsaben hoan xan ganganxa ǂgaogu ǀkha nî ǂûhese. 4 Elob ge kuru xūn hoan a ǃgâi xui-ao da ge ǁîna ǂhara tide, tsî ganganxa ǂgaogu ǀkha nî ǃkhōǃoa. 5 ǂAn da a xui-ao nē ǂûn Elob di mîs tsî ǀgores tsîn xa ǀgui ra ǃanuǃanuhe ǃkhaisa.

Xristub* Jesub di ǃgâi ǃgāb

6 Nē ǁgui-aidets ga nau ǃgâsana mîǃgāǃgāba, ots ge Xristub Jesub di ǃgâi ǃoaba-ao-i ase sa ǁguiǂamsa ra dī, ǁnā ǃgā-i hîa ǂgoms di mîdi tsî ǂgomǂgomsa ǁkhāǁkhādi hîats ge ǃkhōǀgaipedi ǀkha ǀoaǀoahe hâ-i ase. 7 Xawe tā ǂgobesen ǁau ǃhoa-ain tsî xū-e harebe tama ǀgaruben ǀkha, î gagasi omkhâisens xūn ǀkha ǁaeǁaesen. 8 Sorosi ǃâisens ge ǀnî khami ī ǃgâi sîsenǂuiba ūhâ, xawe ǁnās ǃgâ-ais ge gagasi ǃâisensa a ǂhâǂhâsa, nētsēkam tsî ǃgoaxa ûib tsîn di mādawa-amsas ra mîmâiba tsi xui-ao. 9 Ama ǂgomǂgomsa mîs, ǀoasase ūǃoahe tsî nî ǂgomhes ge nēsa. 10 ǀGaisase tsî kaise ra tsâse da ge nē sîsenna khoen nî ǂgom ga ra dī, ǀoasa ǃâubasensa ūhâse ûitsama Elob, hoaraga khoen di ǃGâiǃōdī-aob tsî ǃnāǂamsase ǁnān hîa ǁÎb ǃnâ ra ǂgomn hoan dib ǃnâ.

11 Nē xūn hoana ǁîna mîmā tsî mâǃgâ mâ khoe-i hoa-e, î-i ǁkhāǁkhāsen. 12 Tā i khoe-i xare-e sa ǂkhamsisa ǃgôaǁnâ. Hoaraga ǂgomsabena aiǁgause ība sa ǁkhāǁkhādi ǃnâ, sa ûiǀgaub ǀkha, ǀnammi hîats ra ûiǂuib ǃnâ, sa ǂgoms di sîsengu ǃnâ tsî sa ǃanusib ûib ǃnâ. 13 ǁKhawa ta nî saris kōsets ge Xoas di khomaihes, ǂgomsabena ǂgaoǂgaoǃnâs tsî ǁkhāǁkhāsa ǀgaisa ǂâisa nî ǂnûi-ai. 14 Tā kerkheb di ǂnomdomgu* ge ǃomga ǁgui-ai tsi tsî sats ǃoa ǃhoa kēbodi ǀkhats ge a ǃkhōǃoa māsa ǁnākhao. 15 Sa ǀoasa ǂâisa nē xūn hoana ǂnûi-ai, î-i khoe-i hoa-e mû, sa sîsenni di ǂûtaniba. 16 Sa ûiǀgauba ǃgâise ǃûiǃgâ î sa ǁkhāǁkhāsa hoaǁae ǂōrisase kōǃgâ. Amab ǃnâ hâhâ, îb Eloba sats tsî sa ǃgâ-aon tsîna ǃgâiǃōsiba mā.