1 Tesalonikaǁîn 4 - Khoekhoegowab New Translation 2020 (KKG20)

Eloba ǃgâiba ûib

1 ǃAruǀî ǃgâsado, ǃKhūb Jesub ǃnâ ge ge ra ǂgan du, sige xu du ge ǁkhāǁkhāsen khami, mâtikōse i ǂhâbasa ǃkhaisa Eloba ǃgâibase ûisa. Tsî du ge ǁnāti ûi tsî Eloba ǃgâiba ûib ǃnâ nî ǃnā. 2 Sadu ge ǂan mâ ǁguiǂamde du ge sige xa ǃKhūb Jesub di ǁkhāsib ǃnâ-u māhe ǃkhaisa. 3 Elob ge sado ra ǂgaoǀkhā, ǃanu ûiba ūhâ tsî du ǀaiba xu nî ūdabasensa. 4 Tsîb ge mâb hoaba nî ǂan ǁîb taras ǀkhab ǃanuse tsî ǃgôasib ǃnâ nî ûisa; 5 ǂkhaba turagu ǀkhas ose, Jodeǁî taman* hîa Eloba ǀūn ra dīs xase. 6 Khoe-i xare-e i tā ǁî-i di ǃgâsa-i ǃoagu nēs ǃnâ gāxaǃnâ, ǃKhūb ra ǁnāti īna aitsama ǁkhara xui-ao. Nēsa ge ge ǀnai ge mîba du tsî ǁkhāti ǁnās ǂama ǀoasase ra ǃkhō-am. 7 Elob sada ǃanuoǃnâsib ǃoa ǂgai tama, xawe ǃanuǃanusens ǃoa xui-ao. 8 ǁNā-amaga, nēsa ra ǂhara-i hoa-i ge khoe-e ǂhara tama hâ, xawe Elob, ǁnāb hîa ǁîb di ǃAnu Gagaba sado ra māba ra ǂhara.

9 ǃGâsaǀnamgub xasa i ge sado ǂhâbasaba tama hâ xoaba du ta nî ǃkhaisa, Elob ge aitsama sado ǀnamgu du nî ǃkhaisa ǁkhāǁkhā amaga. 10 Tsî du ge nēsa amase ǃgâsan hîa hoaraga Masedoniab ǃnâ hân ǃoagu ra dī, xawe ta ge ǃgâsado, ra ǀkhoma du ǃaruǀîǀgui du nî nēsa ǃnāǂamsasib ǃnâ dī ǃkhaisa. 11 Î du ǁkhāti ǁgū re ǃnōsasib ǃnâ ûi tsî sa dīxūn ǀkha ǀhabeǀhabesen tsî sa ǃomgu ǀkha sîsensa, sado ge ge ǀnai mîba hâ i khami. 12 Nē ǀgaus ai du ge ǃgôasiba naun hîa ǃauga hâna xu nî ǃkhōǃoa tsî du ge xū-i xare-e ǂhâ tide.

ǃKhūb di hās

13 Tsî ge ge ǁkhāti ǂgao tama hâ, ǃgâsado, ǀūǂamse du nî hâsa, ǁnān ǁom hân ǂama, ǁkhātin ǃoa rana ǁnān hîa ǃâubasen-e ūhâ taman khami ǃoa tidese. 14 ǂGom da ka, Jesub ge ǁō tsî ǁōba xu khâi ǃkhaisa, ob ge ǁkhāti Eloba Jesub ǀkha ǁnān hîa ge ǁîb ǃnâ ǂgom hâse ǁōna nî hā-ū.

15 Nēsa ge ge sado ǃKhūba xu hâ ǁkhāǁkhās ase ra mā: Sada hîa ûitsamada, ǃKhūb di hās kōse ǃgau hâda tātsēs tsîna ǀnai ge ǁōna aiǃgûba tidesa. 16 ǃKhūb ǂûb ge ǃgari ǂgais mîmās dis, ǂamǀhomǃgāb di dommi tsî Elob xâiǁnâs di ǀōb ǀkha ǀhomma xu nî ǁgôaxa tsîn ge Xristub* ǃnâ ge ǁōna ǂguro nî khâi; 17 tsî ǁnās khaoǃgâ da ge sada hîa ûitsamada, ǃgau hâda ǁîn ǀkha ǀhûpe ǃâudi ǃnâ nî ǂgaeǃapahe, ǃKhūba da nî ǂoab ǃnâ ǃoa tsî ǁnāti hūgaǀgui ǃKhūb ǀkha hâse. 18 ǁNā-amaga nē mîdi ǀkha ǀgaiǀgaiǃnâgu re.