Israelǁîn ge gao-ao-e ra ǂganbasen
1 Samueli ge kairab geo ǁîb ôakha ǂhanuǂhanu-aose Israeli ǃnâ ge mâi. 2 ǂGuro ǀgôab âb ge Joel ti ge ǀon hâ i tsî ǀgamǁîb ge ge Abia i. ǁÎkha ge Bersebas ǃnâ ge ǂhanuǂhanu-ao i. 3 Xawe kha ge ǁîkha ǁgûb di aiǁgausa ge sao tama hâ i. ǁÎkha ge hōǂgābasens âkha ai ǀgui gere kō tsî ǀhôagao ǀgaub ai ǀkhaexūna ǃkhōǃoa tsî ǁhōga ǂhanu tamase gere ǀgoraǃgâ.
4 O gu ge Israeli di ǂgaeǂgui-aogu hoaga ǀhao tsî Samueli tawa Ramas ǃnâ sī 5 tsî ǁîb ǃoa ge mî: “Kō re, sats ge go kaira, tsî sa ôakha ge sa aiǁgausa sao tama hâ. Gao-ao-e ǁnâi sida ǂama mâi, nau ǁaedi ǁkhādi khami, î-i sida ǂgaeǂgui.” 6 Xawe Samueli ge ǁîn ge “Gao-ao-e mā da, î-i sida ǂgaeǂgui” ti a ǃkhais xa ge ǃgâibahe tama hâ i tsîb ge ǁîba ǃKhūb ǃoa ge ǀgore. 7 Ob ge ǃKhūba ǁîb ǃoa ge mî: “Khoen ra mîba tsi xūn hoana ǃgâ re. ǁÎn ge satsa aoxū tama hâ, xawen ge tita go aoxū ǁîn ǂama ta gao-ao tidese xuige. 8 ǁÎn ge tita ǀkhan hoaǁae gere dī khami sats on ǀkha go dī. ǁÎna ta ge Egipteba xu ǂgaeǂguiǂui tsēsa xu nētsēs kōsen ge tita ǁnāxū tsî ǀkhara eloga gere ǃoaba. 9 Dī ǁnâi ǁîn ra ǂgao khami, xawe ǁîna ǁkhōse ǃkhâikhom tsî mîǃāba mâti gu gao-aogu âna ǁîna nî gaoǂam ǃkhaisa.”
10 Ob ge Samuela ǃKhūb ge mîba bin hoana khoen hîa gao-ao-e ra ǂgaoǀkhā bina ge mîba. 11 ǁÎb ge ǁîna ge mîǃāba: “Nētib ge sadu gao-aoba sadu ǀkha nî sîsen. ǁÎb ge sadu ôaga nî toroǃkhamaodī, ǀnîgu ge torokunidi âb ai nî ǃoaba, ǀnîgu ge nî ǁîb di hāǃgapi-ao kai tsî ǀnîgu ge torokunis âb aiǃâ garu nî ǃkhoe. 12 ǁÎb ge ǀnîga toroǂnubidi ǃnâ ǀoadisigu mûǂamaose tsî nauga korodisigu mûǂamaose nî mâi; ǀnîgu ge gao-aob di ǃhanaga nî ǃhūǃgao tsî ǃhanaǂûn âba nî ǀhaoǀhao, ǀnîgu ge ǁâtanin âb tsî torokunidi âb di xūn tsîna nî kuru. 13 Sadu ôadeb ge ǃgâihamxūna di nî dība bise tsî ǁîb di hîǂû-ao tsî pereǁganaose nî ū. 14 Sadu di hoagu xa ǃgâi ǃhanagu, draibeǃhanagu tsî ǀkherahaiǃhanagu tsînab ge ū tsî ǁîb di ǂamkhoega nî mā. 15 ǁÎb ge disiǁîǃâs sadu ǃhorob tsî sadu draiben disa ū tsî gao-ommi ǃoaba-aogu tsî nau ǂamkhoegu tsîna nî mā. 16 ǁÎb ge sadu di hoan xa ǃgâi ǃgāgu, ǃgādi tsî ǂkham khoegu tsî sadu dâukin tsîna ū tsî ǁîb sîsenna nî dī kai. 17 ǁKhātib ge sadu gūn tsî pirin xa disiǁîǃâsa nî ū, tsî sadu ǂûdu ge nî ǁîb di khobo kai. 18 ǁNā ǁaeb ai du ge ǃgomse nî ǃgae, sadu gao-aob aitsama du ge ǁhûiǂuibasenni xa, xaweb ge ǃKhūba sadu ǃgaesende ǃgâ tide.”
19 Xawes ge ǁaesa Samuela ǃgâ ǂgao tama i tsî ǁîb ǃoa ge mî: “Hî-î! Gao-ao-e da ǂhâba hâ. 20 Sida tsîn nau ǁaedi hoadi khami ra ī ǂgao. Ab gao-aoba sida ǂama gao, îb ǂgaeǂgui da tsî torob ǃnâ aimâba da.” 21 Tsî Samueli ge ǁaes ge mîn hoana ǃgâ tsî ǃKhūba sī ge mîba. 22 Ob ge ǃKhūba Samueli ǃoa ge mî: “ǁÎn ra ǂgao khami ǁnâi dī, î ǁîna gao-ao-e mâiba.” Ob ge Samuela Israeli aogu ǃoa ge mî: “Oa, mâb hoaba oms âb ǃoa.”
© Khoekhoegowab Elobmîs © Bible Society in Namibia, 2020.
