ǃGaeǀhaos ǂGaes ge khākhoen xa ra ǃgû-ūhe
1 Israelǁîn ge Filisteǁîn ǀkhan nî ǃkhamse ge ǂoa; ǁîn ge Ebenesers tawa hâǃkhaiba ge ǂnaumâi tsî Filisteǁîna Afeks tawa. 2 Filisteǁîn ge ǃkhams ǃoa ge khâi Israelǁîn ǃoagu; ǃkhamgub ge ǀgai on ge Filisteǁîna Israelǁîna dan tsî hakaǀoadisi aogu âna ǁnāpa ge ǃgam. 3 Tsî ǃkhamaogu ge hâ-ais tawa sīo, o gu ge Israelǁaes di kaiga ge mî: “Tare-i ǃaromab kha ǃKhūba nētsē go dī, Filisteǁîn xa da nî danhesa? A da ǃGaeǀhaos ǂGaes ǃKhūb disa Silosa xu sī ū, îs sada tawa hâ, îs sada khākhoen di ǃomǁaeba xu huiǂui da.” 4 Aogu ge sîsabega Silos ǃoa sî tsî ǁnāpa xu ǃGaeǀhaos ǂGaes ǃKhūb Hoaǀgaixab, trons âb xerugu ǂamai hâb disa ge ūǀkhī kai. Elib ôakha, Hofnib tsî Pinehasi tsîkha on ge ǃGaeǀhaos ǂGaes Elob dis ǀkha ge hā.
5 Tsî ǃGaeǀhaos ǂGaes ǃKhūb dis ge ǁaes di hâǃkhais tawa hā on ge Israelǁîna ǁnātikō ǃgarise dâb xa ge ǃau, ǃhūb ge ǀganas kōse. 6 Tsî Filisteǁîn ge nē ǃauba ǁnâuo, on ge ge mî: “ǃGâ re nē ǃaub Hebreǁîn di hâǃkhaib ǃnâ hâba. Tare-eb kha nē ǃauba ra ǂâibasen?” Tsî Filisteǁîn ge ǃGaeǀhaos ǂGaes ǃKhūb dis go hâǃkhais ǃnâ hā ǃkhaisa a ǁnâu, 7 on ge ǁîna ǃao tsî ge mî: “Elo-i ge ǁîn di hâǃkhais ǃnâ go hā. Toabahe da go! Nēti ī xū-i ge aiǃâ ge ī tama hâ i. 8 Toabahe da go. Tari-e nē ǀgaisa elob ǀgaiba xu nî huiǂui da? Nēb ge ǁnā Elob, Egipteǁîna ge ǂguiǃnâgu tsûtsû-ain ǀkha ǃgaroǃhūb ǃnâ ǂnauba. 9 Filisteǁîgo, nēsi ǁkhoaǂgaoxa î go aogo ase ǃkham, î da tā Hebreǁîn di khobo kai, ǁîn ge sada khobo is ǁkhās khami. Aose tanisen, î go ǃkham.”
10 ǃNubai gu ge Filisteǁîga ǀgaisase ǃkham tsî Israelǁîga ge dan, o gu ge Israelǁîga omdi âgu ǁga ge ǃkhoeni. Kaise kai ǃgamǂuis ge ge hâ; ǃnonadisiǀoadisi toroǃkhamaogu Israelǁîn digu ge ge ǃgamhe. 11 ǃGaeǀhaos ǂGaes Elob dis on ge ge ǃgû-ūhe tsî Elib ôakha, Hofnib tsî Pinehasi tsîkha hoakha ge ge ǁō.
Elib di ǁōb
12 Ob ge Benjaminǁîba ǃkhamǃkhaiba xu ǃkhoe tsî ǁnā tsēs ǁkhās ai Silos tawa ge sī, saran âb a ǀkhausa tsî danas âb aib ǃhūba hâse, ǃoab âba ǁgaus ǃaroma. 13 ǁÎb ge sī ǁaeb aib ge Eliba daob-amǃgâ ǂnû-aiǃnaos âb ai ǂnû tsî daoba ǂnôa gere ǃkhē, ǃGaeǀhaos ǂGaes Elob dis xab gere ǂâiǂhansen xui-ao. Tsî ǁnā khoeb ge ǂhôasa ǃās ǃnâ ǂanǂan, on ge ǃās din hoana ǃaob xa ge ǃau-ā. 14 Ob ge Eliba ǂkhupibab ge ǁnâu, o ge dî: “Tarebe ǂkhupiba nēba?” Ob ge ǁnā khoeba ǃhaese Eliba hā ge mîba. 15 Elib ge khoesedisiǁkhaisaǀa kurixa ge i tsî mûra âba ǀhai tsîb ge ǃgâise ge mû ǁoa i. 16 Tsîb ge ǁîba Elib ǃoa ge mî: “Toroǃkhamma xu ta ge ra hā; nētsē ta ge toroba xu go ǁhâ.”
Ob ge Eliba “Tare-e go ī ti ôa?” ti ge dî.
17 Ob ge ǂhôa-e go hā-ūba ge ǃeream: “Israelǁîn ge Filisteǁîn aiǃâba xu go ǁhâ, kaisen ge ǂguina go ǃgamhe; sa ôakha Hofnib tsî Pinehasi tsîkha ge go ǁō tsî ǃGaeǀhaos ǂGaes, Elob dis on ge go ǃgû-ūhe.”
18 Tsî ǃGaeǀhaos ǂGaes xab ge mî, ob ge Eliba ǂnû-aiǃnaos âba xu ǃgâs ǂama ǃās di dao-ams xōǀkhā ge ǁnā. ǁÎb ge ǃaos âba khôa tsî ge ǁō, kaiseb ge ǀnai kaira tsî ǃgom i xui-ao. ǁÎb ge Israela hakadisi kuriga ge ǂgaeǂgui hâ i.
Pinehasi ǃoataras di ǁōb
19 Elib di ǀuiǀgôas, Pinehasi taras ge ge ǀgamǀkhā i tsî ǁaeb âs ge ǀnai ge mâtoa hâ i. ǃGaeǀhaos ǂGaes Elob dis ge ǃgû-ūhe tsî ǀuiǁgûb âs tsî aob âs tsîkha go ǁō ǃkhaisas ge ǁnâu, os ge ǃnapetamase ǁoratsûb xa hāǂamhe tsî ge ǁora. 20 Tsî ǁō ǁgas ra hîa di ge ǁîsa gere ǁoraǃkhō tarade ge mî: “Tā ǃao, aore ǀgôarobas go hō xuige.” Xawes ge ǃeream tama i tsî ǁî-i ai ǂâi-e ǂnûi tama ge i. 21 Tsîs ge ǀgôaroba Ikabod ti ge ǀonǂgai mî rase: “ǃGôasib ge Israela xu go ūbēhe.” ǃGaeǀhaos ǂGaes di ǃgû-ūhes tsî ǀuiǁgûb tsî aob âs tsîkha di ǁōb tsîn ǃaroma. 22 Tsîs ge “ǃGôasib ge Israela xu go bē, ǃGaeǀhaos ǂGaes Elob dis go ǃgû-ūhe amaga” ti ge mî.
© Khoekhoegowab Elobmîs © Bible Society in Namibia, 2020.
