Davidi ge ǁkhawa Sauli ûiba ra sâu
1 Sifǁîgu ge ǁkhawa Gibeas ǃnâ Sauli tawa hā tsî ge mî: “Davidi ge Haxilaǃnoms, ǃgaroǃhūb amǃgâb ai hâs tawa gau hâ.” 2 Ob ge Saula ǁnātimîsi ǂhomisen tsî Sifǃgaroǃhūb ǃoa ge ǃgû, ǃnonaǀoadisi toroǃkhamaogu, Israela xu ǁhûiǂuihe hâgu ǀkha Davida gu sī nî ôase. 3 Tsîb ge Saula Haxilaǃnoms, ǃgaroǃhūb ǃoa-ai hâs ai ǁgoe daob xōǀkhā sī hâǃkhaiba ge ǂnaumâi. Davidi ge noxopa ǃgaroǃhūb ǃnâ ge hâ i, tsî Sauli ge ǃgaroǃhūb kōse ǁîba ôasī ǃkhaisab ge ǂanǃnâ, 4 ob ge Davida ǃkhē-aoga sî tsî ge ǂanǂui ama hāb ge Saula ǃkhaisa. 5 Ob ge Davida ǂhomisen tsî Sauli ge hâ i ǃkhais tawa ge sī; tsîb ge ǁnā ǃkhais Sauli tsî Abneri ôab Neri, Sauli toroǂnubis danab tsîkha ǁîs ai ǁomǁgoesa ge mû. Sauli ge hâǃkhaib ǁaegu ge ǁgoe i tsî aogu âb ge ǁîb ǂnamipe ge ǁgoe i.
6 Ob ge Davida Hetǁîb Ahimelexi tsî Abisaib Joab ǃgâsab, Serujas ôab tsîkha ge dî: “Tariba tita ǀkha Saula ǃoa hâǃkhaib ǃoa nî ǃgû?”
Ob ge Abisaiba “Tita ge sats ǀkha nî ǃgû” ti ge ǃeream.
7 Davidi tsî Abisaib tsîkha ge ǁnā tsuxuba hâǃkhaib tawa ge sī, tsî Sauli ge ǁaegub ǃnâ ge ǁomǁgoe i, ǁhâigôab âb ǃhūb ǃnâ ǁîb danaǂams tawa ǃkhāǂgāmâihe hâse. Abneri tsî toroǃkhamaogu tsîn ge ǁîb ǂnamipe ge ǁomǁgoe i. 8 Ob ge Abisaiba ǂause Davidi ǃoa ge mî: “Elob ge nētsē khākhoeb âtsa sa ǃomǁae go māǁnâ. A ta nēsi ǁhâigôab ǀkha ǀgui ǃnās ama ǃhūb ǃnâ ǃkhāǁgui bi, ǀgamǁî ǃnāsa ta nî dīs ǂhâbasa tidese.”
9 Xaweb ge Davida Abisaib ǃoa ge mî: “Tā ǃgam bi. Tari-e kha ǃKhūb ǀnausabeba ǂkhôadī tsî ǁkharahe tide?” 10 ǃAruǀîb ge Davida ge mî: “ǃKhūb a ûitsama ǃkhais ao; ǃKhūb ge amase aitsama nî ǃgam bi, ǁnaetihesa ǁōb ǀkhas kas, torob ǃnâb ka ǁōs hoasa. 11 Ab ǃKhūba ti ǃomma ta ǃKhūb ǀnausabeb ǃoagu nî ūkhâisa xu ǁkhae te. ǁHâigôab danaǂams âb tawa mâb tsî ǁgamxapas tsîra ǀguira ū î khom ǃgû.” 12 Ob ge Davida ǁhâigôab tsî ǁgamxapas tsîra Sauli danaǂamsa xu ge ū; tsî kha ge ǁîkha ge ǃgû, ǀguib Sauli digu dib tsîn mû tama tsî ǂanǃnâ tama tsî ǂkhaiǃnâs tsîna hî tamase. Hoagu ge ge ǁom hâ i, ǃKhūb ge ǁîga ǃgam ǂomsa ǁom kai hâ i amaga.
13 ǁNās khaoǃgâb ge Davida nauǀkhāb ǃoa ǃgâu tsî ǃhommi ǂaob ai sī ge mâ, kai soab ǁîgu ǁaegu hâse. 14 Tsîb ge Davida Sauli ǂnubis tsî Neri ôab Abneri tsîgu ǁga ge ǃhao: “Abnertse, ǃereamts tide?” ǁnâu tets ra?
Ob ge Abnera ge ǃeream: “Taritsa sats gao-aob ǃoa ra ǃhaotsa?”
15 Ob ge Davida Abnera ǃoa ge mî: “ǁĒ-ao tamatsa kha ǁnâi satsa? Tariba sats khami ī, Israeli ǃnâ? Tare xū-i ǃaromats sa gao-aoba go ǃûi tama hâ i? ǀGuib toroǂnubis dib kom sa gao-aobab nî ǃgamga ǀase go sī hâ io. 16 Nēts go dī ǃkhais ge ǃgâi tama hâ. ǃKhūb a ûitsama ǃkhais ao, sago ge ǁōba anu hâ, sadu gao-aob, ǃKhūb di ǀnausabeba go go ǃûi tama hâ i amaga. Kō re nēsi. Mâpa ra ǁhâigôab tsî ǁgamxapas tsîra ǁîb danaǂams tawa go mâ i ra hâ?”
17 Sauli ge ǂkhai tsî Davidi domma ǁnâuǃā tsî ge mî: “Satsa nē ra ǃhoatsa ti ôa Davitse?”
Ob ge Davida: “Tita ge, gao-aotse” ti ge mî. 18 Tsîb ge ǃaruǀî ge mî: “Tare xū-i ǃaromats kha ti gao-aotsa sa ǃgāta ra ǃgôaǃgon? Tare xū-e ta dī hâ? Mâ ǂkhabadī-e ta ge dī? 19 Xawe ti gao-aotse, nēsi ǁnâi toxopa ǃgâ te re. ǃKhūb nîs karao, ti ǃoagu ra khâikhâiǃnâ tsiba, o ǁguiba-e hā-ūba bi re; khoen nîs karao, an ǀâxarexūhe ǃKhūb di ais aiǃâ, titan go ǃKhūb di ǃhūba xu ǂhāǂui amaga, mî rase: ‘ǃGû, î ǃhao eloga sī ǃoaba’ ti. 20 Ab ti ǀaoba tā ǃnūse ǃKhūb di ǀgūsiba xu ǃhao ǃhūb ai ǂnâ. Israeli gao-aots ge go ǃgûǂoa ǀgui ǃaeda-ets nî ôase, ǃhomgu ǃnâts ra khoetsa ǃaub ani-e ǃau khami.”
21 Ob ge Saula ge mî: “Tsūse ta ge go dī. Oaǀkhī re ti ôa Davitse. ǁKhawa ta ge tsūdī tsi tide, ti ûibats go nē tsuxuba sâu amaga. Tita ge gârese go dī, ǁgaisi tsūdī-e ta ge go dī.”
22 Ob ge Davida ge mî: “Nēb ge gao-aots di ǁhâigôaba. Ab sa khoegu di ǀguiba ǃgâuxa tsî ǁîba hā ū re. 23 Ab ǃKhūba mâ khoeb hoaba ǁîb ǂhanu-aisib tsî ǂgomǂgomsasiba ǃoa mādawa-am. ǃKhūb ge nē tsuxuba satsa ti ǃomǁae go māǁnâ, xawe ta ge tita ti ǃomma sats ǃKhūb ǀnausabets ǃoagu ūkhâi ǂgao tama go i. 24 Sa ûiba ta go nē tsuxuba sâus ǁkhās khami ab ǃKhūba ti ûib ona sâu re, îb tita ǂōǂōsigu hoaga xu huiǂui.”
25 Ob ge Saula Davidi ǃoa ge mî: “Ab ǃKhūba ǀkhae tsi re ti ôa Davitse. Sats ge dīts ra xūn hoan ǃnâ nî ǃgâiǃgâ tsî nî dan.”
ǁNās khaoǃgâb ge Davida ǁîb daoba ge ǃgû tsî Sauli ge oms âb ǃoa ge ǁaru.
© Khoekhoegowab Elobmîs © Bible Society in Namibia, 2020.
